ພິທີຕັກບາດຖວາຍທານງານສົມໂພດພຣະພຸດທະບາຣະມີສຼີຊຽງຮ່ອນ

ອົງການປົກຄອງແຂວງ ແລະ ອົງການປົກຄອງເມືອງຊຽງຮ່ອນ ແຂວງໄຊຍະບູລີ ໄດ້ຮ່ວມກັບພຸດທະສາສະນິກກະຊົນ ຈັດພິທີຕັກບາດຖວາຍທານໃນງານສົມໂພດພຣະພຸດທະບາຣະມີສຼີຊຽງຮ່ອນ ພິທີໄດ້ຈັດຂຶ້ນໃນຕອນເຊົ້າຂອງວັນທີ 10 ທັນວາ ຜ່ານມາ ທີ່ອົງພຸດທະບາຣະມີສະສຼີຊຽງຮ່ອນ ເມືອງຊຽງຮ່ອນ ແຂວງໄຊຍະບູລີ ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ເປັນກຽດເຂົ້າຮ່ວມຂອງພະອາຈານໃຫຍ່  ປອ ມະຫາເຫວດ ມະເສໄນ ຮອງປະທານສູນກາງ ອົງການພຸດທະສາສະໜາສຳພັນ ແຫ່ງ ສປປລາວ ພ້ອມດ້ວຍການນຳຂັ້ນແຂວງ, ການນຳຂັ້ນເມືອງ, ພຸດທະສາສະນິກກະຊົນທັງພາຍໃນ, ຕ່າງແຂວງ ແລະ ຕ່າງປະເທດເຂົ້າຮ່ວມຢ່າງຫຼວງຫຼາຍ.
   ໃນພິທີທີ່ເປັນມົງຄຸນນີ້ ທ່ານເຈົ້າແຂວງໄຊຍະບູລີໄດ້ຂຶ້ນໄຕ້ທຽນບູຊາພະສີລັດຕະນະໄຕຣ, ຈາກນັ້ນການນຳແຕ່ລະຂັ້ນພ້ອມດ້ວຍພຸດທະສາສະນິກກະຊົນໄດ້ໄຫວ້ພະຮັບສິນ, ສູດມົນ-ຖວາຍພອນພະ, ສົມມາຄົວທານ-ຖວາຍທານ, ຂຶ້ນຖວາຍສັງຄະທານ, ກ່າວສຳໂມທະນິຍະຄາຖາ, ປະເຄນກັນບູຊາທຳ ຈາກນັ້ນການນຳຂັ້ນແຂວງ, ເມືອງ ແລະ ຊາວພຸດທະສາສະນິກກະຊົນ ໄດ້ຮັບຟັງຄາຣະວະພອນຈາກພຣະອາຈານໃຫຍ່ ປອ ມະຫາເຫວດ ມະເສໄນ ຮອງປະທານສູນກາງ ອົງການພຸດທະສາສະໜາສຳພັນ ແຫ່ງ ສປປລາວ  ໂດຍພຣະອາຈານໄດ້ສະແດງຄວາມຊົມເຊີຍຕໍ່ ອົງການພຸດທະສາສະໜາສຳພັນ ແຂວງ ແລະ ເມືອງ ພ້ອມກັບ ອົງການປົກຄອງແຂວງ ແລະ ອົງການປົກຄອງເມືອງ ຕະຫຼອດຮອດຊາວພຸດທະສາສະໜາສະນິກກະຊົນທຸກທ່ານ ທີ່ໄດ້ຮ່ວມແຮງຮ່ວມໃຈໃນການກໍ່ສ້າງອົງພະພຸດທະບາຣະມີສຼີຊຽງຮ່ອນຈົນສຳເລັດໃນຄັ້ງນີ້ ແລະ ພຣະອາຈານໃຫຍ່ຍັງໄດ້ມອບໃຫ້ການນຳຂັ້ນແຂວງ ແລະ ເມືອງຈົ່ງພ້ອມກັນສືບຕໍ່ປົກປັກຮັກສາ ອົງພະ ແລະ ສະຖານທີ່ດັ່ງກ່າວ ໃຫ້ເປັນສະຖານທີ່ສັກກາລະບູຊາ ຂອງຊາວພຸດທັງຫຼາຍ ເພື່ອໃຫ້ເປັນແຫຼ່ງທ່ອງທ່ຽວທີ່ມີຄວາມສວຍສົດງົດງາມຢູ່ຄູ່ບ້ານຄູ່ເມືອງ ພ້ອມນັ້ນການນຳຂັ້ນແຂວງ, ເມືອງ ແລະ ຊາວພຸດທະສາສະນິກກະຊົນທີ່ເຂົ້າຮ່ວມງານໃນຄັ້ງນີ້ຍັງໄດ້ຮັບພອນຈາກພຣະອາຈານໃຫຍ່ ປອ ມະຫາເຫວດ ມະເສໄນ ຮອງປະທານສູນກາງ ອົງການພຸດທະສາສະໜາສຳພັນ ແຫ່ງ ສປປລາວ ອີກດ້ວຍ.
ຂ່າວ-ພາບ: ດອນ ຂຽວພະນາ