ພົນເອກ ຄຳລຽງ ອຸທະໄກສອນ ເຄື່ອນໄຫວຕິດຕາມສະພາບນໍ້າຖ້ວມຢູ່ແຂວງຫຼວງນໍ້າທາ

ໂອກາດດັ່ງກາວ, ທ່ານ ພົນໂທ ຄໍາກິ່ງ ຜຸຍຫຼ້າມະນີວົງ ໄດ້ລາຍງານສະພາບນໍ້າຖ້ວມຢູ່ແຂວງຫຼວງ ນໍ້າທາ ວ່າ: ໃນລະຫວ່າງວັນທີ 28-30 ສິງຫາ ໄດ້ມີຝົນຕົກໜັກຢູ່ແຂວງຫຼວງນ້ຳທາ ເຮັດໃຫ້ມີສະພາບນ້ຳຊຸ, ນ້ຳຖ້ວມໜັກຢູ່ຫຼາຍບ້ານພາຍໃນແຂວງ, ເຂດເສດຖະກິດພິເສດບໍ່ເຕ່ນແດນງາມ, ໂຮງຮຽນ ມສ ຊົນເຜົ່າ, ໂຮງຮຽນ ມສ ນາເຕີຍ, ເສັ້ນທາງຫຼາຍສາຍຖືກຕັດຂາດ, ເຂດການຜະລິດ, ເຮືອນຊານ, ຊັບສິນຂອງປະຊາຊົນ, ມີ 2 ເມືອງທີ່ຖືກຜົນກະທົບຄື: ເມືອງຫຼວງນໍ້າທາຈໍານວນ 33 ບ້ານ, 2,463 ຫຼັງຄາເຮືອນ ແລະ ເມືອງນາແລ 21 ບ້ານ, ຊຶ່ງໄດ້ຮັບຜົນເສຍຫາຍເປັນຈໍານວນຫຼວງຫຼາຍທີ່ຍັງບໍ່ສາມາດປະເມີນມູນຄ່າໄດ້. ປັດຈຸບັນລະດັບນໍ້າ ໄດ້ຫຼຸດລົງ ແຕ່ຍັງມີນໍ້າຖ້ວມຂັງຢູ່ຫຼາຍພື້ນທີ່ ຕ້ອງໄດ້ສືບຕໍ່ເຝົ້າລະວັງ ແລະ ຕິດຕາມຢ່າງໃກ້ສິດ ຍ້ອນວ່າຝົນ ຍັງຕົກຢ່າງຕໍ່ເນື່ອງ. ຕໍ່ກັບບັນຫາດັ່ງກ່າວ, ການນໍາແຂວງໄດ້ຊີ້ນໍາບັນດາຂະແໜງການກ່ຽວຂ້ອງ, ບັນດາເມືອງ ປຸກລະດົມທຸກພາກສ່ວນໃນສັງຄົມ ເຂົ້າຊ່ວຍເຫຼືອປະຊາຊົນ ແລະ ຍົກຍ້າຍອອກຈາກພື້ນທີ່ ທີ່ມີຄວາມສ່ຽງໄປຢູ່ ສູນຮັບຕ້ອນຜູ້ປະສົບໄພທີ່ແຂວງໄດ້ຈັດສັນໄວ້ ຊຶ່ງມີຈໍານວນ 6 ຈຸດ, ພ້ອມທັງໂຄສະນາໃຫ້ປະຊາຊົນ ແລະ ສັງ ຄົມ ຍົກສູງສະຕິລະວັງຕົວ ແລະ ກະກຽມຮັບມືແກ້ໄຂຜົນກະທົບທີ່ເກີດຂຶ້ນ ແລະ ອາດຈະເກີດຂຶ້ນໃນຕໍ່ໜ້າ.

ພາຍຫຼັງທີ່ໄດ້ປະກາດແຂວງຫຼວງນໍ້າທາ ເປັນເຂດປະສົບໄພພິບັດ ແຂວງໄດ້ນໍາໃຊ້ 2 ກໍາລັງ ປກສ-ປກຊ ຍົກຍ້າຍປະຊາຊົນ, ຊັບສິນໄປໄວ້ບ່ອນປອດໄພ, ໄດ້ຊ່ວຍນໍ້າດື່ມ, ນໍ້າໃຊ້, ອາຫານແຫ້ງ, ເຄື່ອງອຸປະໂພກ-ບໍລິໂພກໃຫ້ບັນດາບ້ານທີ່ໄດ້ຮັບຜົນກະທົບຈາກໄພພິບັດ ແລະ ໄດ້ລະດົມກຳລັງ ປກຊ-ປກສ, ຊາວໜຸ່ມອາສາ ສະໝັກ ເພື່ອຊ່ວຍປະຊາຊົນທໍາຄວາມສະອາດເຮືອນ, ເລັ່ງເກັບກໍາຂໍ້ມູນຜົນເສຍຫາຍຈາກນໍ້າຖ້ວມໃຫ້ໄວເທົ່າ ທີ່ຈະໄວໄດ້. ປັດຈຸບັນແຂວງຫຼວງນໍ້າທາຕ້ອງການເຂົ້າສານ, ອາຫານແຫ້ງ, ເຄື່ອງນຸ່ງຫົ່ມ, ເຄື່ອງອຸປະໂພກ-ບໍລິ ໂພກ, ເຄື່ອງໃຊ້ປະຈໍາວັນທີ່ຈໍາເປັນ.

ກອງປະຊຸມຄັ້ງນີ້, ໄດ້ພ້ອມກັນປຶກສາຫາລື ເພື່ອຊອກຫາສາເຫດການເກີດໄພພິບັດນໍ້າຖ້ວມ ລວມ ເຖິງນະໂຍບາຍຕ່າງໆ ຕໍ່ຜູ້ທີ່ຖືກຜົນກະທົບຈາກໄພນໍ້າຖ້ວມ. ໂອກາດນີ້, ທ່ານຮອງນາຍົກລັດຖະມົນຕີ, ລັດຖະ ມົນຕີກະຊວງປ້ອງກັນປະເທດ ໄດ້ຮຽກຮ້ອງໃຫ້ການນຳແຂວງ ຈົ່ງພ້ອມກັນເອົາໃຈໃສ່ຟື້ນຟູສະພາບການເປັນ ຢູ່ຂອງປະຊາຊົນ ເປັນຕົ້ນ ຖະໜົນຫົນທາງ, ເຮືອນຊານບ້ານຊ່ອງ, ໄຮ່ນາ, ຮົ້ວສວນຂອງປະຊາຊົນໃຫ້ກັບຄືນ ສູ່ສະພາບປົກກະຕິໂດຍໄວ. ຂ່າວ: ຫຼວງນໍ້າທາ