ຜົ້ງສາລີ ປະກາດການນຳໃຊ້ກາໝາຍສິນຄ້າໂອດັອບໃຫ້6ຫົວໜ່ວຍທຸລະກິດ

ແຂວງຜົ້ງສາລີ ໄດ້ຈັດພິທີປະກາດການນຳໃຊ້ກາໝາຍໜຶ່ງເມືອງໜຶ່ງຜະລິດຕະພັນ ແຫ່ງຊາດ(ODOP) ຈໍານວນ 6 ກາໝາຍ ຂຶ້ນໃນວັນທີ 16 ມັງກອນຜ່ານມາ ທີ່ແຂວງຜົ້ງສາລີ ໂດຍມີ ທ່ານ ຄຳຜອຍ ວັນນະສານ ເຈົ້າແຂວງຜົ້ງສາລີ, ມີທ່ານ ທະນູຄຳ ປິດຈະວົງ ຫົວໜ້າພະແນກອຸດສະຫະກຳ ແລະ ການຄ້າແຂວງ, ມີພາກສ່ວນທີ່ກ່ຽວຂ້ອງເຂົ້າຮ່ວມ.
    ທ່ານ ນາງ ຄໍາ ວັນນະວົງ ຕາງໜ້າໂຮງງານປຸງແຕ່ງຊາ ຍອດຊາສັນພູມົງເຈົາ ໄດ້ລາຍງານປະຫວັດຄວາມເປັນມາຂອງສິນຄ້າໂອດັອບ 6 ກາໝາຍໂດຍຫຍໍ້. ຈາກນັ້ນ ທ່ານ ຄຳເຫຼັກ ແສນທະພູມ ຮອງຫົວໜ້າພະແນກອຸດສະຫະກຳ ແລະ ການຄ້າແຂວງ ທັງເປັນຄະນະກໍາມະການຄັດເລືອກສິນຄ້າ ໂອດັອບ ແຫ່ງຊາດ ຂັ້ນແຂວງ ໄດ້ລາຍງານວ່າ: ໄລຍະຜ່ານມາທາງພະແນກອຸດສະຫະກຳ ແລະ ການຄ້າແຂວງ ໄດ້ລົງສົມທົບກັບອົງການປົກຄອງເມືອງ, ຫ້ອງການອຸດສະຫະກຳ ແລະ ການຄ້າເມືອງ ແລະ ຄະນະກໍາມະການຄັດເລືອກສິນຄ້າ ແລະ ບໍລິການເອກະລັກ ໜຶ່ງເມືອງໜຶ່ງຜະລິດຕະພັນ ຂັ້ນເມືອງ ລົງເກັບກໍາສິນຄ້າທ່າແຮງຢູ່ບັນດາບ້ານເປົ້າໝາຍ ທີ່ມີທ່າແຮງ ມູນເຊື້ອໃນການຜະລິດສິນຄ້າຊົມໃຊ້ໃນຄອບຄົວ ແລະ ຈໍາໜ່າຍຕາມທ້ອງຕະຫຼາດ, ຈາກນັ້ນ ໄດ້ຈັດກອງປະຊຸມ ແລະ ສ້າງບົດບັນທຶກ ມອບຄວາມຮັບຜິດຊອບ ໃຫ້ແຕ່ລະຂະແໜງການຂັ້ນແຂວງ ແລະ ເມືອງ ເພື່ອສືບຕໍ່ໃນການຕິດຕາມ ແລະ ຊຸກຍູ້ການຜະລິດ ຂອງປະຊາຊົນ ຕາມພາລະບົດບາດ ດ້ວຍການຈັດຝືກອົບອົບຮົມສ້າງຄວາມເຂັ້ມແຂງ ດ້ານການບໍລິຫານຈັດການກຸ່ມ, ດ້ານເຕັກນິກການຜະລິດ, ການອອກແບບຜະລິດຕະພັນ, ການຫຸ້ມຫໍ່ ແລະ ການເຂົ້າສູ່ຕະຫຼາດ ທັງພາຍໃນ ແລະ ຕ່າງປະເທດ ໂດຍການໂຄສະນາຜ່ານທາງເຟສບຸກ, ແຜ່ນພັບ ແລະ ການນໍາເອົາສິນຄ້າໄປວາງສະແດງ-ຂາຍໃນ ງານຕະຫຼາດ, ງານບຸນສໍາຄັນຂອງຊາດ, ງານເທດສະການຊາ ທັງພາຍໃນ ແລະ ຕ່າງປະເທດ ຊຶ່ງຜ່ານຈາກການສົ່ງເສີມຂອງແຕ່ຂະແໜງການ, ຈາກຂັ້ນແຂວງ, ຂັ້ນເມືອງ ຕາມຂັ້ນຕອນແລ້ວທາງກົມສົ່ງເສີມການຄ້າ ຈຶ່ງໄດ້ພິຈາລະນາອອກໃບອະນຸຍາດ ນໍາໃຊ້ກາໝາຍໂອດັອບ ແຫ່ງຊາດ ຕາມລະບຽບການ ລວມ ມີ  6 ກາໝາຍຄື: ວິສາຫະກິດສ່ວນບຸກຄົນ ຮ້ານຂາຍຊາ ກຸ້ຍອີງ;ໂຮງງານປຸງແຕ່ງຊາ ຍອດຊາ ສັນພູມົງເຈົາ ຈໍາກັດຜູ້ດຽວ ຂອງເມືອງຜົ້ງສາລີ; ຍູກວາດ ຂອງບໍລິສັດ ຄໍາຕັນ ສຸກທອງ ຈໍາກັດຜູ້ດຽວ  ບ້ານໂພນໂຮມ;ກຸ່ມຜະລິດເຄື່ອງຫັດຖະກຳຈັກສານຫວາຍ ແລະ ໄມ້ປ່ອງ ບ້ານງາຍເໜືອ; ກຸ່ມຫັດຖະກຳເຄື່ອງຫັດຖະກໍາ ຊົນເຜົ່າອາຄາປີລາໂຈ ບ້ານຜາປູນເກົ່າ ຂອງເມືອງບຸນເໜືອ; ວິສາຫະກິດສ່ວນບຸກຄົນ ເຫຼົ້າພື້ນເມືອງ ກາພູຕ່າຊານ ຂອງ ເມືອງຍອດອູ; ປັດຈຸບັນທົ່ວແຂວງມີສິນຄ້າ ໂອດັອບ ທັງໝົດ 28 ກາໝາຍ, 119 ຜະລິດຕະພັນ ໃນນັ້ນ ເມືອງຜົ້ງ ສາລີ 9 ຫົວໜ່ວຍ ກວມ 32,1%, ເມືອງບຸນເໜືອ 7 ຫົວໜ່ວຍ ກວມ 25%, ເມືອງຂວາ 3 ຫົວໜ່ວຍ 10,7%, ເມືອງຍອດອູ 3 ຫົວໜ່ວຍ ກວມ 10,7%,  ເມືອງບຸນໃຕ້ 2 ຫົວໜ່ວຍ ກວມ 7,1%, ເມືອງສໍາພັນ 2 ຫົວໜ່ວຍ ກວມ 7,1% ແລະ ເມືອງໃໝ່ 2 ຫົວໜ່ວຍ ກວມ 7,1%; ສິນຄ້າໂອດັອບຂອງແຂວງຜົ້ງສາລີ ກວມເອົາ 7,9% ແລະ ຢູ່ໃນອັນດັບ 3 ຂອງສິນຄ້າໂອດັອບທົ່ວປະເທດມີມູນຄ່າການຜະລິດທັງໝົດ 10,47 ຕື້ກີບ, ມູນຄ່າຈໍາໜ່າຍ 18,38 ຕື້ກີບ. 
    ໃນໂອກາດນີ້, ທ່ານເຈົ້າແຂວງໄດ້ສະແດງຄວາມຍ້ອງຍໍຊົມເຊີຍມາຍັງພາກສ່ວນກ່ຽວຂ້ອງຂັ້ນແຂວງ-ເມືອງ, ຜູ້ປະກອບການ ທີ່ໄດ້ຄວາມພະຍາຍາມສູ້ຊົນ ເຂົ້າຮ່ວມຂະບວນການດັ່ງກ່າວ ຈົນໄດ້ຮັບກາໝາຍສິນຄ້າໂອດັອບຢ່າງເປັນທາງການ, ພ້ອມທັງ ໄດ້ຮຽກຮ້ອງມາຍັງທຸກພາກສ່ວນເອົາໃຈໃສ່ຕື່ມບາງບັນຫາເປັນຕົ້ນໃຫ້ຖືວຽກງານອຸດສາຫະກໍາ ແລະ ການຄ້າ ເປັນວຽກສໍາຄັນ ແລະ ເປັນວຽກຕ່ອງໂສ້ກັບທຸກຂົງເຂດວຽກງານ ໂດຍເຮັດໃຫ້ການຜະລິດ ຕິດພັນກັບການຈໍາໜ່າຍ, ຕິດພັນກັບຕະຫຼາດຮອງຮັບ ແລະ ສຸມໃສ່ຊຸກຍູ້ສົ່ງເສີມການຜະລິດຕິດພັນກັບການສົ່ງເສີມການຊົມໃຊ້ຜະລິດຕະພັນພາຍໃນ ເພື່ອທົດແທນການນໍາເຂົ້າ ແລະ ຜະລິດສົ່ງອອກ ໃຫ້ເພີ່ມຂຶ້ນຢ່າງບໍ່ຍຸດຢັ້ງ.
ຕໍ່ກັບການສົ່ງເສີມສິນຄ້າ ODOP ໃຫ້ເອົາໃຈໃສ່ ພັດທະນາສິນຄ້າ ODOP ໃຫ້ມີຄຸນນະພາບສູງຂຶ້ນ, ສຳຄັນແມ່ນໃຫ້ສະອາດ,ປອດສານພິດ ແລະ ການຫຸ້ມຫໍ່ໃຫ້ມີຄວາມຈົບງາມ; ສົ່ງເສີມ, ໂຄສະນາ ການຊົມໃຊ້ຜະລິດຕະພັນ ODOP ໃຫ້ກວ້າງຂວາງ ໂດຍແມ່ນຂະແໜງການທີ່ກ່ຽວຂ້ອງ ເປັນຜູ້ນໍາໜ້າພາທາງໃນການສົ່ງເສີມການຜະລິດ, ສົ່ງເສີມການຊົມໃຊ້ ໃຫ້ເປັນຂະບວນການກວ້າງຂວາງ ທັງຢູ່ພາຍໃນ ແລະ ຕ່າງປະເທດ ຢ່າງຕໍ່ເນື່ອງ; ພ້ອມກັນນັ້ນ ກໍຈັດໃຫ້ມີບ່ອນວາງສະແດງ, ຈໍາໜ່າຍຜະລິດຕະພັນ ທີ່ຜະລິດໄດ້ຢູ່ພາຍໃນ ແຂວງຕື່ມອີກ; ໃຫ້ພະແນກອຸດສາຫະກຳ ແລະ ການຄ້າແຂວງ ສືບຕໍ່ເປັນເຈົ້າການ, ເປັນໃຈກາງ ເຮັດໃຫ້ວຽກງານ ອຸດສາຫະກໍາ ແລະ ການຄ້າ ເປັນຕ່ອງໂສ້ກັບທຸກວຽກງານ, ທຸກຂະແໜງການ; ເພື່ອບັນລຸໄດ້ຄືແນວນັ້ນ ຕ້ອງເອົາໃຈໃສ່ສ້າງຄວາມເຂັ້ມແຂງໃຫ້ກົງຈັກບຸກຄະລາກອນທີ່ເຮັດວຽກງານດັ່ງກ່າວ ຢູ່ຂັ້ນແຂວງ ແລະ ຂັ້ນເມືອງ ແລະ ຜູ້ປະກອບການທຸລະກິດ ແລະ ຊ່ວຍຊຸກຍູ້ໃນການເຂົ້າເຖິງແຫຼ່ງທຶນ, ການເຂົ້າເຖິງຕະຫຼາດ, ຊ່ວຍຊີ້ນໍາການຜະລິດ ແລະ ພັດທະນາສິນຄ້າ ໃຫ້ໄດ້ມາດຖານ, ມີຄຸນນະພາບ ແລະ ມີເຄື່ອງໝາຍການຄ້າ ເພີ່ມຂຶ້ນເລື້ອຍໆໄປ.
(ຂ່າວ-ພາບ: ແສງຄຳ ສາລີວັນ)