ກອງປະຊຸມ ສະຫຼູບວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ປະຈຳປີ 2023 ພ້ອມດ້ວຍວາງທິດທາງແຜນການ ປະຈຳປີ 2024 ໄດ້ຈັດຂຶ້ນໃນວັນທີ 11 ມີນານີ້ ທີ່ຫໍວັດທະນະທໍາຂອງແຂວງ ໂດຍພາຍໃຕ້ການເປັນປະທານຂອງຂອງທ່ານ ຄຳເຫຼັກ ໃຈອິສານ ຮອງເຈົ້າແຂວງຜົ້ງສາລີ ຜູ້ຊີ້ນຳຂົງເຂດວັດທະນະທຳ-ສັງຄົມຂັ້ນແຂວງ ແລະ ທ່ານ ບຸນຈັນ ເຈີເອີ ຫົວໜ້າພະແນກ ຖທວ ແຂວງ, ມີແຂກຖືກເຊີນ ແລະ ພາກສ່ວນກ່ຽວຂ້ອງທົ່ວແຂວງເຂົ້າຮ່ວມ.
ທ່ານ ຄຳດີ ວັນມະນີວົງ ຮອງຫົວໜ້າພະແນກ ຖວທ ແຂວງ ໄດ້ຂຶ້ນຜ່ານບົດສະຫຼູບການຈັດຕັ້ງປະຕິບັດວຽກງານ ຖວທ ປະຈໍາປີ 2023 ແລະ ທິດທາງແຜນການປະຈໍປີ 2024 ຊຶ່ງໄລຍະ 1 ປີທີ່ຜ່ານມາ ວຽກງານຖະແຫຼງຂ່າວ-ສື່ມວນຊົນ ໄດ້ລົງເຄື່ອນໄຫວເກັບກໍາຂ່າວ ແລະ ຂຽນບົດ-ຂ່າວ ອອກຜ່ານທາງວິທະຍຸ, ໂທລະພາບ,ໂທລະໂຄ່ງ, ສື່ອອນລາຍ ແລະ ສົ່ງໃຫ້ສື່ຕ່າງໆຂອງສູນກາງ ໄດ້ 351 ຄັ້ງ ປະຕິບັດໄດ້ 85,61% ຂອງແຜນການປີ. 1 ປີຜ່ານມາສາມາດສ້າງບ້ານວັດທະນະທໍາໄດ້ 19 ບ້ານ ທຽບໃສ່ແຜນການປີປະຕິບັດໄດ້ 79,17%, ສ້າງຄອບຄົວວັດທະນະທໍາໄດ້ 1,234 ຄອບຄົວ ທຽບໃສ່ແຜນການປີປະຕິບັດໄດ້ 75,94%. ຮອດປັດຈຸບັນທົ່ວແຂວງມີຄອບຄົວທີ່ໄດ້ຮັບໃບຢັ້ງຢືນເປັນຄອບຄົວວັດທະນະທໍາທັງໜົດ 20.752 ຄອບຄົວ ກວມ 45,68% ຂອງຄອບຄົວທົ່ວແຂວງ, ສ້າງບ້ານວັດທະນະທໍາໄດ້ 286 ບ້ານ ກວມ 56.74 % ຂອງຈໍານວນບ້ານທົ່ວແຂວງ. ໃນປີ 2023 ຜ່ານສາມາດດຶງດູດນັກທ່ອງທ່ຽວເຂົ້າມາທ່ຽວແຂວງຜົ້ງສາລີ ໄດ້ 143.341 ເທື່ອຄົນ, ສ້າງລາຍຮັບຈາກນັກທ່ອງທ່ຽວໄດ້ 15.389.990 ໂດລາ ທຽບໃສ່ແຜນການປະຕິບັດໄດ້ 68,26% ທຽບໃສ່ 1 ປີຜ່ານມານັກທ່ອງທ່ຽວເພີ່ມຂຶ້ນ 75.062 ເທື່ອຄົນ.
ໃນກອງປະຊຸມຜູ້ເຂົ້າຮ່ວມໄດ້ຄົ້ນຄວ້າປະກອບຄຳຄິດຄຳເຫັນ ແລະ ກຳນົດແນວທາງໃນການຈັດຕັ້ງປະຕິບັດໃນຕໍ່ໜ້າລະຫວ່າງຂັ້ນແຂວງຂັ້ນເມືອງໃຫ້ໄປລວງດຽວກັນໃນການຈັດຕັ້ງປະຕິບັດ ເພື່ອພ້ອມກັນພັດທະນາວຽກງານຂົງເຂດ ຖວທ ໃຫ້ມີຜົນສຳເລັດໃນຕໍ່ໜ້າ.
(ພາບ-ຂ່າວ: ແສງຄຳ ສາລີວັນ)
ຄໍາເຫັນ