ນັກຄົ້ນຄວ້າໄດ້ວິເຄາະຂໍ້ມູນໃນໄລຍະ 20 ປີຈາກການສຶກສາດ້ານສຸຂະພາບຂອງແມ່ຍິງອົສຕຣາລີ ຊຶ່ງມີຜູ້ເຂົ້າຮ່ວມທັງໝົດ 57,000 ກວ່າຄົນ ເປັນແມ່ຍິງອາຍຸລະຫວ່າງ 48-55 ປີ.
ນັກຄົ້ນຄວ້າຈາກມະຫາວິທະຍາໄລ Sydney, ມະຫາວິທະຍາໄລ New South Wales ແລະ ມະຫາວິທະຍາໄລ Western Sydneyພົບວ່າ: ແມ່ຍິງທີ່ບໍ່ມີຄວາມຮູ້ສຶກໂດດດ່ຽວເປັນປະຈຳ ມີຄວາມສ່ຽງຕໍ່ການເສຍຊີວິດ 5%, ໃນຂະນະທີ່ຄວາມສ່ຽງດັ່ງກ່າວເພີ່ມຂຶ້ນເປັນ 15% ໃນບັນດາຜູ້ຍິງທີ່ມີຄວາມຮູ້ສຶກໂດດດ່ຽວຢ່າງຕໍ່ເນື່ອງ.
ທ່ານ ເນຕາ ຮາການີ ຜູ້ຂຽນຫຼັກຂອງການສຶກສາຄັ້ງນີ້ ກ່າວວ່າ:ຄວາມຮູ້ສຶກໂດດດ່ຽວເປັນປັດໄຈຄວາມສ່ຽງທີ່ຄວນຈະໄດ້ຮັບການກວດກາໂດຍທ່ານໝໍ ເຊັ່ນດຽວກັບການກວດຄວາມດັນເລືອດສູງຫຼື cholesterol ແລະຈໍາເປັນເພື່ອສ້າງຄວາມຮັບຮູ້ໃນສັງຄົມກ່ຽວກັບຄວາມໂດດ່ຽວເພື່ອຊ່ວຍໃຫ້ປະຊາຊົນມີຄວາມເຂົ້າໃຈຫຼາຍຂຶ້ນ.
ທ່ານສາດສະດາຈານ ເມໂລດີ ຕິງ ຈາກມະຫາວິທະຍາໄລ Sydney ລະບຸວ່າ: ແມ່ຍິງໄວກາງຄົນມັກຈະເປັນຜູ້ເບິ່ງແຍງລູກ ແລະພໍ່ແມ່ຜູ້ອາຍຸສູງ. ໃນເວລາດຽວກັນ, ພວກເຂົາເຈົ້າຕ້ອງປະເຊີນກັບການປ່ຽນແປງຊີວິດທີ່ສໍາຄັນເຊັ່ນ: ການໝົດປະຈໍາເດືອນ, ການກິນເບັ້ຍບໍານານ ຫຼື ການທີ່ລູກຍ້າຍອອກຈາກເຮືອນ ຊຶ່ງປັດໄຈທັງໝົດເຫຼົ່ານີ້ສາມາດນໍາໄປສູ່ການແຍກຕົວອອກຈາກສັງຄົມ ໄດ້.
ການສຶກສາດັ່ງກ່າວຊຶ່ງຈັດພິມເຜີຍແຜ່ໃນວາລະສານ BMJ Medicine, ຍັງພົບເຫັນການເຊື່ອມໂຍງທີ່ຂຶ້ນຢູ່ກັບຄວາມຮູ້ສຶກໂດດດ່ຽວ(dose-dependent relationship) ໂດຍແມ່ຍິງຮູ້ສຶກໂດດດ່ຽວຫຼາຍເທົ່າໃດ, ຄວາມສ່ຽງຕໍ່ການເສຍຊີວິດກ່ອນໄວອັນຄວນແມ່ນສູງຍິ່ງຂຶ້ນເທົ່ານັ້ນ ແລະເຖິງແມ່ນວ່າບໍ່ມີຂໍ້ມູນໃນໄລຍະຍາວທີ່ສົມທຽບກ່ຽວກັບສຸຂະພາບຂອງຜູ້ຊາຍ, ແຕ່ໄລຍະໄວກາງຄົນແມ່ນເວລາຂອງການປ່ຽນແປງທີ່ສົ່ງຜົນກະທົບຕໍ່ແມ່ຍິງທາງລົບຫຼາຍກວ່າ.
ຄໍາເຫັນ