ທ່ານ ສຸບັນ ສະວະບຸດໄດ້ລາຍງານໃຫ້ຮູ້ວ່າ: ພາຍຫຼັງມີມະຕິຂອງຄະນະປະຈຳສະພາແຫ່ງຊາດ ແລະ ລັດຖະດຳລັດ ຂອງປະທານປະເທດ ຢ່າງເປັນທາງການແລ້ວ, ຄະນະກໍນະການເລືອກຕັ້ງລະດັບຊາດ ໄດ້ດໍາເນີນກອງປະຊຸມຄັ້ງປະຖົມມະລືກຂອງຕົນຂຶ້ນ ເພື່ອພ້ອມກັນເຊື່ອມຊຶມ ມະຕິຂອງກົມການເມືອງສູນກາງພັກ ສະບັບເລກທີ 26/ກມສພ, ລົງວັນທີ 12 ກັນຍາ 2025 ແລະ ແຈ້ງເປັນທາງການຕໍ່ບັນດາທ່ານຄະນະກໍາມະການເລືອກຕັ້ງລະດັບຊາດ ກ່ຽວກັບມະຕິຂອງຄະນະປະຈໍາສະພາແຫ່ງຊາດ ວ່າດ້ວຍການແຕ່ງຕັ້ງຄະນະກໍາມະການເລືອກຕັ້ງລະດັບຊາດ ແລະ ພ້ອມກັນປຶກສາຫາລື 4 ຮ່າງເອກະສານ ຄື: ຮ່າງມະຕິ ຂອງຄະນະກຳມະການເລືອກຕັ້ງລະດັບຊາດ ວ່າດ້ວຍການຈັດຕັ້ງ ແລະ ເຄື່ອນໄຫວຂອງຄະນະກຳມະການເລືອກຕັ້ງລະດັບຊາດ, ຮ່າງມະຕິຂອງຄະນະກຳມະການເລືອກຕັ້ງລະດັບຊາດ ວ່າດ້ວຍການແບ່ງງານພາຍໃນຄະນະກຳການເລືອກຕັ້ງລະດັບຊາດ, ຮ່າງມະຕິ ຂອງຄະນະກຳມະການເລືອກຕັ້ງລະດັບຊາດ ວ່າດ້ວຍແຕ່ງຕັ້ງບັນດາອະນຸກໍາມະການ ແລະ ສິດ, ໜ້າທີ່ ຂອງຄະນະກຳມະການເລືອກຕັ້ງລະດັບຊາດ ແລະ ສ້າງແຜນດໍາເນີນງານຂອງຄະນະກຳມະການເລືອກຕັ້ງລະດັບຊາດ ນັບແຕ່ໄດ້ຮັບການແຕ່ງຕັ້ງ ຈົນເຖິງກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ Xຊຶ່ງຄະນະກຳມະການເລືອກຕັ້ງລະດັບຊາດ ກໍໄດ້ປັບປຸງ 4 ເອກະສານ ແລະ ໄດ້ຖະແຫຼ່ງຂ່າວຕໍ່ສື່ມວນຊົນພາຍໃນ ເພື່ອໃຫ້ສື່ມວນຊົນ ໄດ້ນຳເອົາຜົນການຖະແຫຼງຂ່າວນີ້ໄປໂຄສະນາໃຫ້ສັງຄົມໄດ້ຮັບຊາບ ແຕ່ຫົວທີ ແລະ ພ້ອມກັນປະກອບສ່ວນຕາມສິດ, ໜ້າທີ ແລະ ພັນທະຂອງຕົນ.
ສຳລັບວຽກງານຈຸດສຸມໃນຕໍ່ໜ້າແມ່ນປະຕິບັດຕາມແຜນການດໍາເນີນງານຂອງຄະນະກຳມະການເລືອກຕັ້ງລະດັບຊາດ ສະບັບເລກທີ 02/ຄລຊ, ລົງວັນທີ 3 ພະຈິກ 2025 ໄດ້ກຳນົດວຽກງານ 13 ວຽກຕົ້ນກໍ ແລະ ແບ່ງການປະຕິບັດອອກ ເປັນ 4 ບາດກ້າວຄື:
1). ເລີ່ມປະຕິບັດແຕ່ເດືອນຕຸລາ ເປັນຕົ້ນມາ ຫາຕົ້ນເດືອນພະຈິກ 2025 ປະກອບມີ 9 ວຽກເປັນຕົ້ນການແຕ່ງຕັ້ງຄະນະກໍາມະການເລືອກຕັ້ງລະດັບຊາດ, ການສ້າງຕັ້ງອະນຸກໍາມະການຂອງຄະນະກຳມະການເລືອກຕັ້ງລະດັບຊາດ (ໄດ້ຈັດຕັ້ງປະຕິບັດສໍາເລັດແລ້ວ), ການກະກຽມດ້ານງົບປະມານ ແລະ ອອກຄໍາແນະນໍາໃຫ້ຄະນະພັກນະຄອນຫຼວງ, ແຂວງ ແລະ ຄະນະປະຈຳສະພາປະຊາຊົນຂັ້ນແຂວງ ເພື່ອກະກຽມວຽກຕ່າງໆ, ການຜັນຂະຫຍາຍມະຕິຂອງກົມການເມືອງສູນກາງພັກ ອອກເປັນນິຕິກຳ ຂອງຄະນະພັກຂັ້ນທ້ອງຖິ່ນ ເພື່ອນໍາພາ-ຊີ້ນຳໃຫ້ສອດຄ່ອງກັບສະພາບຈຸດພິເສດ, ເງື່ອນໄຂຂອງທ້ອງຖິ່ນຕົນ, ການແຕ່ງຕັ້ງ ຄະນະກໍາມະການເລືອກຕັ້ງຂັ້ນທ້ອງຖິ່ນ, ການກຳນົດແຜນການດໍາເນີນງານ ແລະ ອື່ນໆ.
2). ເລີ່ມປະຕິບັດເລີ່ມຕົ້ນເດືອນພະຈິກ ຫາທ້າຍເດືອນທັນວາ 2025 ກໍານົດວຽກ ເຊັ່ນ: ຈັດຕັ້ງເຊື່ອມຊຶມເອກະສານຕ່າງໆ, ປະກາດວັນເລືອກຕັ້ງ, ປະກາດຈໍານວນຜູ້ສະໝັກເລືອກຕັ້ງ ແລະ ຈໍານວນ ສສຊ ຊຸດທີ X ແລະ ສສຂ ຊຸດທີ V, ເກັບກຳສະຖິຕິຈຳນວນພົນລະເມືອງ, ຜູ້ມີສິດເລືອກຕັ້ງ ແລະ ອື່ນໆ.
3). ເລີ່ມປະຕິບັດແຕ່ຕົ້ນເດືອນມັງກອນ ຫາທ້າຍເດືອນກຸມພາ 2026 ກໍານົດ 12 ວຽກເປັນຕົ້ນແມ່ນຂຶ້ນບັນຊີລາຍຊື່ຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ທົ່ວປະເທດ ແລະ ປະກາດລາຍຊື່ຜູ້ສະໝັກເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V, ປະກາດຈໍານວນຜູ້ມີສິດເລືອກຕັ້ງ, ຈັດພິມ ແລະ ຈັດສົ່ງຮູບ-ປະຫວັດຜູ້ສະໝັກຮັບເລືອກຕັ້ງ, ບັດລົງຄະແນນສຽງ ແລະ ດໍາເນີນການປ່ອນບັດ.
4). ເລີ່ມປະຕິບັດຫຼັງມື້ປ່ອນບັດ ຈົນເຖິງກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ແລະ ກອງປະຊຸມຄັ້ງປະຖົມມະລືກຂອງສະພາປະຊາຊົນຂັ້ນແຂວງ ຊຸດທີ V ຊຶ່ງມີວຽກຕົ້ນຕໍ ດັ່ງນີ້: ນັບຄະແນນ, ປະກາດລາຍຊື່ຜູ້ໄດ້ຮັບການເລືອກຕັ້ງເປັນ ສສຊຊຸດທີ X ແລະສສຂV;ດໍາເນີນກອງປະຊຸມຖອດຖອນບົດຮຽນການເລືອກຕັ້ງທົ່ວປະເທດ, ສົມທົບກັບຄະນະປະຈຳສະພາແຫ່ງຊາດ ດໍາເນີນກອງປະຊຸມຄັ້ງປະຖົມມະລືກຂອງສະພາແຫ່ງຊາດ ຊຸດທີ X ຄາດຄະເນດໍາເນີນທ້າຍເດືອນມີນາ 2026. ສໍາລັບ, ກອງປະຊຸມຄັ້ງປະຖົມມະລືກຂອງສະພາປະຊາຊົນຂັ້ນ ແຂວງ ຊຸດທີ V ຄາດຄະເນໃຫ້ສໍາເລັດກ່ອນບຸນປີໃໝ່ລາວ (ກາງເດືອນເມສາ 2026).
ຄຽງຄູ່ກັບການປະຕິບັດວຽກງານຕົ້ນຕໍ 4 ບາດກ້າວຂ້າງເທິງ, ຄະນະກໍາມະການເລືອກຕັ້ງລະດັບຊາດ ຈະສຸມໃສ່ເຮັດວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ຮັບປະກັນ 100% ຕະຫຼອດໄລຍະກະກຽມ ແລະ ດຳເນີນການເລືອກຕັ້ງ, ເອົາໃຈໃສ່ຕໍ່ວຽກງານໂຄສະນາປຸກລະດົມຂະບວນການ ເພື່ອເຮັດໃຫ້ຂະບວນການເລືອກຕັ້ງກາຍເປັນປາງບຸນໃຫຍ່ ຂອງຊາດ.ສໍາລັບງົບປະມານຮັບໃຊ້ການເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V, ຄະນະເລຂາທິການສະພາແຫ່ງຊາດ ໄດ້ຂຶ້ນແຜນງົບປະມານ ໄປຫາກະຊວງການເງິນ ໂດຍໄດ້ຂຶ້ນແຜນຢູ່ໃນ 2 ປີງົບປະມານຄື: ງົບປະມານປີ 2025 ແລະ ປີ 2026. ພາຍຫຼັງອະນຸກຳມະການງົບປະມານ ໄດ້ຮັບການແຕ່ງຕັ້ງຢ່າງເປັນທາງການ ຈາກຄະນະກຳມະການເລືອກຕັ້ງລະດັບຊາດສະບັບເລກທີ 04/ຄລຊ, ລົງວັນທີ 3 ພະຈິກ 2025;ຄະນະອະນຸກໍາມະການດັ່ງກ່າວ, ໄດ້ເປີດກອງປະຊຸມຂອງຕົນຂຶ້ນໃນວັນທີ 11 ພະຈິກ 2025 ໂດຍໄດ້ຄົ້ນຄວ້າ ແລະ ກະກຽມອອກນິຕິກຳຕ່າງໆເປັນຕົ້ນແຈ້ງການແນະນໍາກ່ຽວກັບການສ້າງແຜນງົບປະມານຮັບໃຊ້ການເລືອກຕັ້ງ, ການຈັດສັນງົບປະມານໃຫ້ເຂດເລືອກຕັ້ງຕ່າງໆ ເພື່ອສະເໜີກະຊວງການເງິນດຸ່ນດ່ຽງງົບປະມານໃຫ້ຄະນະກຳມະການເລືອກຕັ້ງລະດັບທ້ອງຖິ່ນ. ສະນັ້ນ, ສະເໜີໃຫ້ທ້ອງຖິ່ນກະກຽມເປີດບັນຊີເງິນຝາກສະເພາະຢູ່ຄັງເງິນແຫ່ງລັດ ປະຈຳແຂວງຂອງຕົນ ເພື່ອຮັບເອົາການໂອນເງິນ ຈາກຄະນະກຳມະການເລືອກຕັ້ງລະດັບຊາດ ຄາດວ່າຈະແຈ້ງອອກໃນໄວໆ.
ທ່ານ ສຸບັນ ສະວະບຸດຍັງໄດ້ລາຍງານໃຫ້ຮູ້ກ່ຽວກັບມາດຕະການຈັດຕັ້ງປະຕິບັດ ຊຶ່ງປະກອບມີ 5 ມາດຕະການທີ່ສຳຄັນ ເພື່ອຮັບປະກັນໃຫ້ການກະກຽມ ການເລືອກຕັ້ງ ສສຊ ຊຸດທີ X ແລະ ສສຂຊຸດທີ V ບັນລຸຕາມຈຸດປະສົງ ແລະ ຄາດໝາຍທີ່ວາງໄວ້.
(ຂ່າວ: ບຸນຕອມ, ພາບ: ເກດ)
ຄໍາເຫັນ