 |
ທ່ານ ນາງ ສີໃສ ລືເດດມູນສອນ ກ່າວວ່າ: ຄະນະກຳມະການເລືອກຕັ້ງລະດັບຊາດໄດ້ອອກນິຕິກຳຕ່າງໆ ພ້ອມທັງຊີ້ນໍາຄະນະກຳມະການເລືອກຕັ້ງຂັ້ນທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ກະກຽມເງື່ອນໄຂ ແລະ ອໍານວຍຄວາມສະດວກດ້ານຕ່າງໆ ໃຫ້ການເລືອກຕັ້ງຢູ່ແຕ່ລະເຂດເລືອກຕັ້ງໃນທົ່ວປະເທດ, ການເລືອກຕັ້ງ ສສຊ ຊຸດທີ X ໄດ້ແບ່ງອອກເປັນ 18 ເຂດເລືອກຕັ້ງ, ມີໜ່ວຍປ່ອນບັດເລືອກຕັ້ງທົ່ວປະເທດທັງໝົດ 8,351 ໜ່ວຍ, ທົ່ວປະເທດມີຜູ້ມີສິດປ່ອນບັດເລືອກຕັ້ງທັງໝົດ 4,764,384 ທ່ານ ຍິງ 2,384,104 ທ່ານ ແລະ ມີຜູ້ໄປໃຊ້ສິດປ່ອນບັດເລືອກຕັ້ງຕົວຈິງ 4,620,353 ທ່ານ, ເທົ່າກັບ 96,97% ຂອງຈໍານວນຜູ້ມີສິດເລືອກຕັ້ງ. ໃນນີ້, ຜູ້ມີສິດປ່ອນບັດເລືອກຕັ້ງຢູ່ຕ່າງປະເທດ 23,378 ທ່ານ ຍິງ 7,782 ທ່ານ.
ຜ່ານການເລືອກຕັ້ງໃນວັນທີ 22 ກຸມພາ 2026 ສາມາດເລືອກຕັ້ງໄດ້ ສສຊ ຊຸດທີ X ທັງໝົດ 175 ທ່ານ ຍິງ 52 ທ່ານ (ກວມເອົາ 29,71%). ສໍາລັບດ້ານໂຄງປະກອບ ແລະ ບຸກຄະລາກອນຂອງ ສສຊ ແລະ ສສຂ ຄະນະກຳມະ ການເລືອກຕັ້ງລະດັບຊາດ ໄດ້ມອບໃຫ້ຄະນະພັກ, ກະຊວງ-ອົງການ ແລະ ອົງການປົກຄອງທ້ອງຖິ່ນຮັບຜິດຊອບຄົ້ນຄວ້າຄັດເລືອກເປົ້າໝາຍທີ່ມີມາດຕະຖານ, ເງື່ອນໄຂຄົບຖ້ວນຕາມທີ່ໄດ້ກຳນົດໄວ້ໃນກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ ເພື່ອລົງສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ຊຶ່ງໂຄງປະກອບ ຂອງຜູ້ສະໝັກຮັບເລືອກຕັ້ງໃນຄັ້ງນີ້ ປະກອບມີຕົວແທນຈາກຫຼາຍຂົງເຂດວຽກງານ, ຂະແໜງການລັດວິສາຫະກິດ ແລະ ວິສາຫະກິດພາກເອກະຊົນຢູ່ສູນກາງ ແລະ ທ້ອງຖິ່ນ, ປະກອບມີຮຸ່ນໜຸ່ມ, ຮຸ່ນກາງ, ຮຸ່ນອາວຸໂສ, ເພດ, ເຜົ່າ ໃນອັດຕາສ່ວນທີ່ເໝາະສົມ. ໃນການເລືອກຕັ້ງຄັ້ງນີ້, ມີຜູ້ສະໝັກຮັບເລືອກຕັ້ງທັງໝົດ 1,284 ທ່ານ, ໃນນັ້ນ ຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ຈໍານວນ 243 ທ່ານ ຍິງ 66 ທ່ານ ແລະ ສສຂ/ນວ ຊຸດທີ V ຈໍານວນ 1,041 ທ່ານ ຍິງ 290 ທ່ານ.
ຄຸນລັກສະນະຂອງຜູ້ໄດ້ຮັບການເລືອກຕັ້ງເປັນ ສສຊ ຊຸດທີ X ມີທັງໝົດ 175 ທ່ານ ຍິງ 52 ທ່ານ ກວມ 29,71%, ຜູ້ສະໝັກຈາກສູນກາງຈໍານວນ 51 ທ່ານ ຍິງ 14 ທ່ານ ໂດຍມີບັນດາທ່ານກົມການເມືອງສູນກາງພັກ, ເລຂາທິ ການສູນກາງພັກ, ກຳມະການສົມບູນ ແລະ ສໍາຮອງສູນກາງພັກຈໍານວນ 18 ທ່ານ ຍິງ 3 ທ່ານ, ຜູ້ສະໝັກຈາກທ້ອງຖິ່ນ ຈໍານວນ 124 ທ່ານ ຍິງ 38 ທ່ານ. ໃນນີ້ມີບັນດາທ່ານກຳມະການສູນກາງພັກ ທີ່ເປັນເລຂາພັກແຂວງຈໍານວນ 18 ທ່ານ, ສສຊ ຊຸດທີ IX ສືບຕໍ່ສະໝັກຈໍານວນ 32 ທ່ານ ຍິງ 14 ທ່ານ, ກວມເອົາ 18,2% ຂອງຈໍານວນ ສສຊ; ສສຊ ຜູ້ໃໝ່ ມີຈໍານວນ 143 ທ່ານ ເທົ່າກັບ 81,7% ຂອງຈໍານວນ ສສຊ ທັງໝົດ, ຈາກລັດວິສາຫະກິດຈໍານວນ 1 ທ່ານ ຍິງ 1 ທ່ານ, ຈາກທຸລະກິດພາກເອກະຊົນຈໍານວນ 2 ທ່ານ ຍິງ 1 ທ່ານ.
ຄຸນລັກສະນະຂອງຜູ້ທີ່ໄດ້ຮັບການເລືອກຕັ້ງເປັນ ສສຂ ຊຸດທີ V ມີຈໍານວນທັງໝົດ 745 ທ່ານ ຍິງ 211 ທ່ານ (ກວມ 28.32 %), ຈາກພະແນກການຂອງແຂວງ 229 ທ່ານ ຍິງ 61 ທ່ານ, ຈາກຂັ້ນເມືອງ 496 ທ່ານ ຍິງ 144 ທ່ານ, ຈາກລັດວິສາຫະກິດ 7 ທ່ານ, ຈາກທຸລະກິດພາກເອກະຊົນ 13 ທ່ານ ຍິງ 6 ທ່ານ.
ຜ່ານການກວດກາ ຂອງຄະນະກຳມະການເລືອກຕັ້ງລະດັບຊາດ ເຫັນວ່າ ສສຊ ຊຸດທີ X ຈໍານວນ 175 ທ່ານ ຍິງ 52 ທ່ານ ແລະ ສສຂ ຈໍານວນ 745 ທ່ານ ຍິງ 211 ທ່ານ ທີ່ໄດ້ຮັບການເລືອກຕັ້ງຈາກຜູ້ມີສິດເລືອກຕັ້ງໃນທົ່ວປະເທດ ໃນຄັ້ງວັນທີ 22 ກຸມພາ 2026 ຜ່ານມານັ້ນ ແມ່ນມີຄຸນລັກສະນະຖືກຕ້ອງຕາມມາດຕະຖານ ທີ່ໄດ້ກຳນົດໄວ້ຢູ່ໃນກົດໝາຍວ່າດ້ວຍການເລືອກຕັ້ງ ສສຊ ແລະ ສສຂ ສາມາດເປັນຕົວແທນແຫ່ງສິດຜົນປະໂຫຍດຂອງປະຊາຊົນລາວບັນດາເຜົ່າໃນທົ່ວປະເທດຢ່າງຖືກຕ້ອງຕາມທີ່ກຳນົດໃນລັດຖະທຳມະນູນ ແລະ ກົດໝາຍ. ຂ່າວ: ແສງຈັນ; ພາບ: ຕຸໄລເພັດ
ຄໍາເຫັນ