ຜູ້ມີສິດປ່ອນບັດເລືອກຕັ້ງເມືອງໄຊຈຳພອນ ຮັບຟັງການລົງໂຄສະນາຫາສຽງ ຂອງຜູ້ຮັບສະໝັກຮັບເລືອກຕັ້ງເປັນ ສສຊ

ບັນດາທ່ານຜູ້ຮັບສະໝັກເລືອກຕັ້ງ ສສຊ ທັງໝົດ ນັບແຕ່ນ້ຳເບີ 1 ຫານ້ຳເບີ 10 ໄດ້ສະແດງຄວາມດີອົກດີໃຈ, ນຳເອົາຄວາມອົບອຸ່ນ, ຢື້ຢາມຖາມຂ່າວ ຕໍ່ຜູ້ມີສິດເລືອກຕັ້ງໃນແຕ່ລະຈຸດ, ແຕ່ລະບ້ານ ແລະ ໄດ້ຜັດປ່ຽນກັນສະເໜີຕົນເອງ, ຊື່-ປະຫວັດການເຄື່ອນໄຫວໃນແຕ່ລະໄລຍະ, ໜ້າທີ່ຄວາມຮັບຜິດຊອບ ເພື່ອໃຫ້ຜູ້ມີສິດປ່ອນບັດເລືອກຕັ້ງ ໄດ້ຮັບຮູ້ຂໍ້ມູນຂອງແຕ່ລະທ່ານ ທັງດ້ານປະຫວັດການເຄື່ອນໄຫວ, ດ້ານຄວາມຮູ້ຄວາມສາມາດ ຢ່າງລະອຽດ. ການຈັດຕັ້ງການໂຄສະນາຫາສຽງໃຫ້ແກ່ຜູ້ສະໝັກຮັບເລືອກຕັ້ງແມ່ນວຽກງານໜຶ່ງ ທີ່ມີບົດບາດສໍາຄັນໃນວຽກງານເລືອກຕັ້ງ ແນໃສ່ເຮັດໃຫ້ການປ່ອນບັດເລືອກຕັ້ງຄັ້ງນີ້ ມີປະສິດທິພາບ, ປະສິດທິຜົນ ແລະ ເຂັ້ມງວດຕາມກົດໝາຍ ເພື່ອສະໜອງຂໍ້ມູນຂ່າວສານທີ່ຖືກຕ້ອງ ໃຫ້ຜູ້ມີສິດເລືອກຕັ້ງໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງຕໍ່ກັບຜູ້ສະໝັກແຕ່ລະທ່ານ, ພ້ອມນັ້ນ ຍັງເປັນໂອກາດໃຫ້ປະຊາຊົນໄດ້ພົບປະ ແລະ ແລກປ່ຽນຄໍາຄິດເຫັນ ເພື່ອນໍາໄປສູ່ການພິຈາລະນາຕັດສິນໃຈຕາມສິດຂອງຕົນ, ໂດຍລວມບັນຍາກາດການໂຄສະນາໃນແຕ່ລະຈຸດຂອງກູ່ມປະຊາຊົນບັນດາເຜົ່າໄດ້ເຂົ້າຮ່ວມຢ່າງໜາ ແໜ້ນ ແລະ ມີການສະເໜີຄໍາຄິດເຫັນ ພ້ອມທັງຕັ້ງຄໍາຖາມຕໍ່ຜູ້ສະໝັກ ເພື່ອຂໍຄໍາອະທິບາຍໃນປະເດັນຕ່າງໆ ທີ່ສົນໃຈເພື່ອນໍາໄປສູ່ການພິຈາລະນາຕັດສິນໃຈຕາມສິດຂອງຕົນ.

ໂອກາດນີ້, ຄະນະຜູ້ສະໝັກ ຍັງໄດ້ຮຽກຮ້ອງມາຍັງປະຊາຊົນຜູ້ມີສິດເລືອກຕັ້ງທຸກຄົນ ຈົ່ງພ້ອມກັນໄປໃຊ້ສິດໃນວັນເລືອກຕັ້ງໃຫ້ຄົບຖ້ວນ, ໃຊ້ສິດຖືກຕ້ອງເຮັດໃຫ້ການເລືອກຕັ້ງ ບັນລຸຕາມຈຸດປະສົງ ແລະ ລະດັບຄາດໝາຍທີ່ວາງໄວ້. ຜູ້ມີສິດລົງເລືອກຕັ້ງເປັນ ສສຊ ຊຸດທີ X ປະຈຳເຂດ 11 ແຂວງ ບໍລິຄຳໄຊ ຈຳນວນ 10 ທ່ານ ຍິງ 2 ທ່ານ, ເລືອກເອົາ 7 ທ່ານ. ສຳລັບຜູ້ລົງສະໝັກເລືອກຕັ້ງເປັນສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງເມືອງໄຊຈຳພອນຈຳນວນ 7 ທ່ານ ຍິງ 3 ທ່ານ ເລືອກເອົາ 5 ທ່ານ. (ຂ່າວ-ພາບ: ສາຍສະໝອນ)