 |
ໂອກາດນີ້, ທ່ານ ຄໍາຟອງ ອີນມານີ ຮອງເລຂາພັກແຂວງ ຮອງປະທານຄະນະກຳມະການເລືອກຕັ້ງຂັ້ນແຂວງໄດ້ໃຫ້ຮູ້ວ່າ: ຈໍານວນຜູ້ລົງສະໝັກຮັບເລືອກຕັ້ງເປັນ ສສຊ ຊຸດທີ X ແລະ ສສຂ ຊຸດທີ V ມີທັງໝົດ 45 ທ່ານ ຍິງ 13 ທ່ານ, ຜູ້ສະໝັກຮັບເລືອກຕັ້ງເປັນ ສສຊ ຊຸດທີ X ປະຈໍາເຂດເລືອກຕັ້ງທີ 3 ແຂວງຫຼວງນໍ້າທາມີ 10 ທ່ານ ຍິງ 3 ທ່ານ; ເລືອກເອົາ 7 ທ່ານ ແລະ ຜູ້ສະໝັກຮັບເລືອກຕັ້ງເປັນ ສສຂ ຊຸດທີ V ຈໍານວນ 35 ທ່ານ ຍິງ 10 ທ່ານ ເລືອກເອົາ 25 ທ່ານ; ພ້ອມນັ້ນທ່ານຍັງໄດ້ຮຽກຮ້ອງມາຍັງບັນດາທ່ານ ຜູ້ມີສິດປ່ອນບັດເລືອກຕັ້ງທຸກທ່ານຈົ່ງເຊີດຊູຄວາມຮັບຜິດຊອບທາງດ້ານການເມືອງຂອງຕົນໃນໂອກາດດໍາເນີນການປ່ອນບັດເລືອກຕັ້ງໃນວັນທີ22ກຸມພາ 2026 ຕ້ອງໄດ້ເອົາໃຈໃສ່ປະຕິບັດໃຫ້ມີຄວາມຮັບປະກັນໃຫ້ໄດ້ 400% ຄື: ນຳພາຜູ້ມີ
ສິດເລືອກຕັ້ງໄປປ່ອນບັດເລືອກຕັ້ງໃຫ້ຄົບຖ້ວນ100%, ນຳພາຜູ້ມີສິດເລືອກຕັ້ງໃຫ້ຮູ້ໃຊ້ສິດໃນການປ່ອນບັດເລືອກຕັ້ງຖືກຕ້ອງຕາມລະບຽບການເລືອກຕັ້ງ100%, ນຳພາວຽກງານປ້ອງກັນຊາດປ້ອງກັນຄວາມສະຫງົບໃຫ້ມີຄວາມສະຫງົບ ແລະ ມີຄວາມປອດໄພ100% ແລະ ນຳພາວຽກງານປ່ອນບັດເລືອກຕັ້ງໃຫ້ຮັບປະກັນຄວາມໂປ່ງໃສ ແລະ ສຳເລັດທັນຕາມກຳນົດເວລາ100%.
 |
ໃນໂອກາດນີ້, ຜູ້ສະໝັກຮັບເລືອກຕັ້ງໄດ້ຜັດປ່ຽນກັນແນະນໍາຕົນເອງ ແລະ ນໍາສະເໜີກ່ຽວກັບປະຫວັດການເຄື່ອນໄຫວໂດຍຫຍໍ້ຂອງຕົນໃນໄລຍະຜ່ານມາ ແລະ ແຜນການເຄື່ອນໄຫວ ວິໄສທັດຂອງຕົນເອງໃນຕໍ່ໜ້າເພື່ອແນໃສ່ໃຫ້ຜູ້ທີ່ມີສິດລົງຄະແນນສຽງເລືອກຕັ້ງ ໄດ້ຮັບຮູ້ເຖິງໝາກ
ຜົນ, ຜົນງານດ້ານຕ່າງໆຂອງຜູ້ຮັບສະໝັກເລືອກຕັ້ງ ສສຊ ຊຸດທີ X ແລະ ສສຂ ຊຸດທີ V ຢ່າງເລິກເຊິ່ງ. ທົ່ວເມືອງຫຼວງນໍ້າທາມີ 78 ບ້ານ, ມີພົນລະເມືອງທັງໝົດ 68,190 ຄົນ ຍິງ 33,911 ຄົນ. ໃນນີ້, ຜູ້ມີສິດປ່ອນບັດເລືອກຕັ້ງ (ຕາມສໍາມະໂນຄົວ) 41,544 ຄົນ ຍິງ 20,457 ຄົນ, ຜູ້ມີສິດປ່ອນບັດເລືອກຕັ້ງຢູ່ທ້ອງຖິ່ນອື່ນ (ຕາມສະໂນຄົວ) 1,859 ຄົນ ຍິງ 934 ຄົນ. ພ້ອມກັນນີ້ ໃນຕອນແລງ
ຂອງວັນດຽວກັນ, ຄະນະຜູ້ສະໝັກຮັບເລືອກຕັ້ງ ສສຊ ເຂດເລືອກຕັ້ງທີ 3 ແຂວງຫຼວງນໍ້າທາ ແລະ ສສຂ ເຂດເລືອກຕັ້ງເມືອງຫຼວງນໍ້າທາຍັງລົງໂຄສະນາຫາສຽງ ແລະ ສະເໜີຕົວຢູ່ວິທະຍາໄລຄູຫຼວງນໍ້າທາຕື່ມອີກ.
(ແຫຼ່ງຂ່າວ: ເມືອງຫຼວງນໍ້າທາ)
ຄໍາເຫັນ