 |
ການລົງເຄື່ອນໄຫວພົບປະຄັ້ງນີ້, ໄດ້ຈັດຂຶ້ນໃນວັນທີ 8 ກຸມພາ 2026 ຊຶ່ງນໍາໂດຍ ທ່ານ ແກ້ວລັດຕະນະ ສີຫາວົງ ຄະນະປະຈຳພັກແຂວງ ຮອງປະທານສະພາປະຊາຊົນ ແຂວງຈຳປາສັກ ທັງເປັນຜູ້ສະໝັກເລືອກຕັ້ງນໍ້າເບີ 4 ປະຈຳເຂດເລືອກຕັ້ງທີ 15 ແຂວງຈຳປາສັກ, ພ້ອມກັບຜູ້ຮັບສະໝັກເລືອກຕັ້ງ ສສຊ ຄະນະທີ1, ໂດຍໃຫ້ກຽດຕ້ອນຮັບຂອງທ່ານ ໄພສານ ອ່ອນໄຊວຽງ ຮອງເລຂາພັກເມືອງ ປະທານຄະນະກໍາມະການປົກຄອງເມືອງໂພນທອງ, ມີຄະນະນໍາຂອງເມືອງ, ເລຂາຄະນະພັກຮາກຖານກຸ່ມບ້ານ,ມີເລຂາພັກບ້ານຕະຫຼອດຮອດພໍ່ແມ່ປະຊາຊົນເຂົ້າຮ່ວມຕ້ອນຮັບຢ່າງອົບອຸ່ນ.
ໃນວາລະການລົງສະເໜີໂຕ ແລະ ພົບປະ ແມ່ນໄດ້ນໍາສະເໜີໃຫ້ຮູ້ກ່ຽວກັບປະຫວັດ ແລະ ການເຄື່ອນໄຫວໂດຍຫຍໍ້ໃນແຕ່ລະໄລຍະຂອງບັນດາທ່ານຜູ້ຮັບສະໝັກເລືອກຕັ້ງ ສສຊ ເຂດເລືອກຕັ້ງທີ 15 ແຂວງຈໍາປາສັກ ຈໍານວນ 20 ທ່ານ, ທັງນີ້ກໍເພື່ອແນໃສ່ໃຫ້ປະຊາຊົນຜູ້ທີ່ມີສິດລົງຄະແນນສຽງເລືອກຕັ້ງ ໄດ້ຮັບຮູ້ເຖິງໝາກຜົນ, ຜົນງານດ້ານຕ່າງໆຂອງຜູ້ຮັບສະໝັກເລືອກຕັ້ງ ສສຊ ຊຸດທີ X ຢ່າງເລິກເຊິ່ງ.
ຈາກນັ້ນ, ຜູ້ສະໝັກຮັບເລືອກຕັ້ງ ຄະນະທີ 1 ໄດ້ຜັດປ່ຽນກັນ ແນະນໍາຕົນເອງ ແລະ ນໍາສະເໜີກ່ຽວກັບ ປະຫວັດການເຄື່ອນໄຫວຂອງຕົນ ພ້ອມທັງສະເໜີຈຸດປະສົງ ແລະ ພ້ອມທັງກ່າວສະແດງວິໄສທັດຂອງຕົນໃຫ້ຜູ້ມິສິດເລືອກຕັ້ງຮັບຮູ້ ແລະ ເປັນຕົວແທນຂອງປະຊາຊົນເຂົ້າໄປໃນສະພາ.
ໃນໂອກາດດໍາເນີນການປ່ອນບັດເລືອກຕັ້ງໃນວັນທີ 22 ກຸມພາ 2026 ຕ້ອງໄດ້ເອົາໃຈໃສ່ປະຕິບັດໃຫ້ມີຄວາມຮັບປະກັນໃຫ້ໄດ້ 400% ຄື:ນຳພາຜູ້ມີສິດເລືອກຕັ້ງໄປປ່ອນບັດເລືອກຕັ້ງໃຫ້ຄົບຖ້ວນ100%, ນຳພາຜູ້ມີສິດເລືອກຕັ້ງໃຫ້ຮູ້ໃຊ້ສິດໃນການປ່ອນບັດເລືອກຕັ້ງຖືກຕ້ອງຕາມລະບຽບການເລືອກຕັ້ງ100%, ນຳພາວຽກງານປ້ອງກັນຊາດປ້ອງກັນຄວາມສະຫງົບໃຫ້ມີຄວາມສະຫງົບ ແລະ ມີຄວາມປອດໄພ100% ແລະ ນຳພາວຽກງານປ່ອນບັດເລືອກຕັ້ງໃຫ້ຮັບປະກັນຄວາມໂປ່ງໃສ ແລະ ສຳເລັດທັນຕາມກຳນົດເວລາ100%. ທົ່ວເມືອງໂພນທອງມີ 71 ບ້ານ, ມີພົນລະເມືອງທັງໝົດ 102,692 ຄົນຍິງ 50,457 ຄົນ. ໃນນີ້, ຜູ້ມີສິດປ່ອນບັດເລືອກຕັ້ງຕົວຈິງ 53,964 ຄົນຍິງ 27,652 ຄົນ, ມີໜ່ວຍປ່ອນບັດທັງໝົດ 82 ໜ່ວຍ.
(ຂ່າວ: ນາງ ປະພິດ, ພາບ: ຈັນທະວີສັກ)
ຄໍາເຫັນ