ຜູ້ແທນອົງຄະນະພັກແຂວງຫຼວງພະບາງ ເລືອກເອົາສະຫາຍ ບຸນເລື່ອມ ມະນີວົງ ເປັນເລຂາຄະນະບໍລິຫານງານພັກແຂວງສະໄໝທີ IX

 ຊຶ່ງຜູ້ແທນກອງປະຊຸມໃຫຍ່ ໄດ້ພ້ອມກັນຄົ້ນຄວ້າຢ່າງເລິກເຊິ່ງ ແລະ ໄດ້ຮັບຮອງເອົາຢ່າງເປັນເອກະສັນ ເນື້ອໃນລາຍງານການເມືອງ ຂອງຄະນະບໍລິຫານງານພັກແຂວງ ຄັ້ງທີ VIII ທີ່ໄດ້ສະຫຼຸບຕີລາຄາ ໝາກຜົນແຫ່ງການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ຊຶ່ງຜົນສຳເລັດທີ່ບັນລຸໃນ 5 ປີ ຜ່ານມາ ໄດ້ສ້າງຜົນງານ ແລະ ທ່ວງທ່າອັນໃໝ່ໃຫ້ແຂວງຫຼວງພະບາງ ສືບຕໍ່ພັດທະນາຖືກຕ້ອງຕາມທິດທາງ ແລະ ຈຸດໝາຍທີ່ວາງໄວ້, ທັງໄດ້ເປັນເອກະພາບ ກ່ຽວກັບຂໍ້ຄົງຄ້າງ ໃນການນຳພາ-ຊີ້ນຳ ຂອງຄະນະບໍລິຫານງານພັກແຂວງ, ຄະນະພັກຂັ້ນຕ່າງໆ ຊຶ່ງເປັນສາເຫດຕົ້ນຕໍ ທີ່ພາໃຫ້ການຈັດຕັ້ງປະຕິບັດໜ້າທີ່ວຽກງານຈຸດສຸມ ໃນບາງດ້ານ ບໍ່ບັນລຸຕາມຄາດໝາຍ ທີ່ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງວາງໄວ້ ແລະ ໄດ້ເລັ່ງທວງໃຫ້ມີມາດຕະການທີ່ແທດເໝາະ, ເພື່ອດຳເນີນການແກ້ໄຂ ຂໍ້ຄົງຄ້າງທີ່ຜ່ານມາຢ່າງຈິງຈັງ ແນໃສ່ສ້າງການຫັນປ່ຽນຢ່າງຕັ້ງໜ້າຫຼາຍຂຶ້ນ ໃນການຈັດຕັ້ງປະຕິບັດ ແນວທາງຂອງພັກ ກໍຄືມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ໃນຕໍ່ໜ້າ. ກອງປະຊຸມໃຫຍ່ ໄດ້ຮັບຟັງການລາຍງານ ຜົນຂອງການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ 5 ປີ ຜ່ານມາ, ສັງລວມແລ້ວ ເສດຖະກິດ-ສັງຄົມຂອງແຂວງ ຍັງສືບຕໍ່ຂະຫຍາຍຕົວ ຢູ່ໃນລະດັບດີສົມຄວນ, ຊຶ່ງເປັນພື້ນຖານ ໃຫ້ແກ່ການສືບຕໍ່ກ້າວຂຶ້ນ, ພ້ອມທັງໄດ້ກຳນົດທິດຊີ້ນຳ ກ່ຽວກັບຍຸດທະສາດ, ທິດທາງໃນການພັດທະນາເສດຖະກິດ-ສັງຄົມ 5 ປີຕໍ່ໜ້າ (2025-2029) ລວມມີ 6 ເປົ້າໝາຍໃຫຍ່ ໄປຕາມທິດທາງລວມ, ຄາດໝາຍສູ້ຊົນ ແລະ ທິດທາງວຽກງານຈຸດສຸມ ໃສ່ໃນແຕ່ລະຂົງເຂດວຽກງານ ທີ່ໄດ້ກໍານົດ ໃນລາຍງານການເມືອງ, ໂດຍໄດ້ມອບໃຫ້ ຄະນະບໍລິຫານງານພັກແຂວງ ຊີ້ນຳອົງການປົກຄອງແຂວງ ໃຫ້ຕັ້ງໜ້າຜັນຂະຫຍາຍເປັນແຜນງານ, ໂຄງການແຜນວຽກຕົວຈິງຂອງແຕ່ລະຂະແໜງການ ແລະບັນດາເມືອງ-ນະຄອນ ຫຼວງພະບາງ ລວມເຖິງກໍານົດການລົງທຶນ ໃຫ້ສອດຄ່ອງ ພ້ອມທັງປຸກລະດົມຍາດແຍ່ງທຶນຮອນ ຈາກທຸກພາກສ່ວນ ໃນທົ່ວແຂວງຫຼວງພະບາງເຂົ້າໃນການຈັດຕັ້ງປະຕິບັດ ໃຫ້ປະກົດຜົນເປັນຈິງ. ກອງປະຊຸມໃຫຍ່ ໄດ້ຮັບຮອງເອົາບົດສຳຫຼວດການນຳພາລວມ ຂອງຄະນະບໍລິຫານງານພັກແຂວງ ຊຸດທີ VIII.

ພ້ອມດຽວກັນນີ້, ຜູ້ແທນສົມບູນກອງປະຊຸມໃຫຍ່ ໄດ້ພ້ອມກັນໃຊ້ສິດ ປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະບໍລິຫານງານພັກແຂວງ ສະໄໝທີ IX ຈຳນວນ 39 ສະຫາຍ ຍິງ 5 ສະຫາຍ, ຜ່ານການດຳເນີນກອງປະຊຸມຄັ້ງປະຖົມມະລຶກ ໄດ້ເປັນເອກະສັນຢ່າງສົມບູນ ເລືອກຕັ້ງເອົາຄະນະປະຈຳພັກແຂວງ ຈຳນວນ 13 ສະຫາຍ ຍິງ 1 ສະຫາຍ. ໃນນັ້ນ ໄດ້ເລືອກເອົາ ສະຫາຍ ບຸນເລື່ອມ ມະນີວົງ ເປັນເລຂາ ຄະນະບໍລິຫານງານພັກແຂວງ, ສະຫາຍ ບຸຍເຫຼືອ ສີນໄຊວໍຣະວົງ ແລະສະຫາຍ ຄຳຫຼ້າ ລຽນປະດິດ ເປັນຮອງເລຂາຄະນະບໍລິຫານງານພັກແຂວງ, ເລືອກເອົາ ສະຫາຍ ຊົມຊື່ນ ໄຊເກີຢາຈົງຕົວ ເປັນປະທານຄະນະກວດກາພັກ, ສະຫາຍ ທອງຈັນ ລັດຕະນະປະດິດ, ສະຫາຍ ຄຳພວງ ດວງມະນີ ແລະ ສະຫາຍ ນາງ ສົມໝາຍ ວິນາກອນ ເປັນຮອງປະທານຄະນະກວດກາພັກ, ພ້ອມນີ້ ກອງປະຊຸມໄດ້ປ່ອນບັດຄັດເລືອກເອົາຜູ້ແທນສົມບູນ ຈຳນວນ 34 ສະຫາຍ, ສໍາຮອງ 6 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XII ຂອງພັກ.

ຕອນທ້າຍ ສະຫາຍ ຄໍາພັນ ພົມມະທັດ ກໍາມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກວດກາສູນກາງພັກ ປະທານອົງການກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ເນັ້ນໜັກໃຫ້ຄະນະບໍລິຫານງານພັກແຂວງຫຼວງພະບາງ ຊຸດໃໝ່ ສຸມໃສ່ການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ IX ຂອງອົງຄະນະພັກແຂວງ ອັນໄດ້ເປັນທິດຊີ້ນຳແກ່ຄະນະພັກ, ສະມາຊິກພັກ, ພະນັກງານ, ທະຫານ-ຕຳຫຼວດ ຕະຫຼອດເຖິງປະຊາຊົນບັນດາເຜົ່າ ໃນການຜັນຂະຫຍາຍ, ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງນີ້ ໃຫ້ປະກົດຜົນເປັນຈິງ ໃນຕໍ່ໜ້າ.