ຂ່າວຕ່າງປະເທດລາຍງານ ໃນວັນທີ 3 ຕຸລາ ຜ່ານມາ, ກະຊວງການກວດຄົນເຂົ້າເມືອງ ແລະ ປະຊາກອນຂອງມຽນມາ ໄດ້ເປີດເຜີຍວ່າ: ມຽນມາ ມີປະຊາກອນປະມານ 56,2 ລ້ານຄົນໃນປີນີ້ ຊຶ່ງເປັນເພດຊາຍ 26,8 ລ້ານຄົນ ແລະ ເພດຍິງ 29,4 ລ້ານຄົນ.
ກະຊວງການກວດຄົນເຂົ້າເມືອງ ແລະ ປະຊາກອນຂອງມຽນມາ ລະບຸວ່າ: ຈຳນວນປະຊາກອນໂດຍປະມານໃນປີ 2023 ທີ່ເຜີຍແຜ່ໂດຍອີງຕາມການສຳຫຼວດສຳມະໂນປະຊາກອນ ແລະ ເຄຫະສະຖານຂອງມຽນມາໃນປີ 2014. ທ່ານ ອູ ວິນຊໍອອງ ອະທິການບໍດີສັງກັດກະຊວງການກວດຄົນເຂົ້າເມືອງ ແລະ ປະຊາກອນຂອງມຽນມາ ລະບຸວ່າ: ປະຊາກອນມຽນມາມີຈຳນວນຫຼາຍກວ່າ 51 ລ້ານຄົນ ໃນການສຳຫຼວດສຳມະໂນປະຊາກອນປີ 2014 ໂດຍຈາກໂຕເລກດັ່ງກ່າວປະຊາກອນມຽນມາໃນປີນີ້ສູງກວ່າປີ 2014 ແລະ ກຳລັງມີການສຳຫຼວດສຳມະໂນປະຊາກອນ ສຳລັບປີ 2024. ຂໍ້ມູນຂ້າງເທິງເປີດເຜີຍວ່າ: ຢ່າງກຸ້ງ ມີປະຊາກອນອາໄສຢູ່ຫຼາຍທີ່ສຸດໃນມຽນມາ ຢູ່ທີ່ 9 ລ້ານຄົນ, ຮອງລົງມາຄື ມັນທະເລ ທາງພາກກາງ ແລະ ລັດສານ ທາງຕາເວັນອອກ ຊຶ່ງຕ່າງກໍມີປະຊາກອນ 6,8 ລ້ານຄົນ.
ອີກຢ່າງໜຶ່ງ, ກະຊວງການກວດຄົນເຂົ້າເມືອງ ແລະ ປະຊາກອນຂອງມຽນມາ ໄດ້ເປີດເຜີຍຜົນການສຳຫຼວດສຳມະໂນປະຊາກອນທຸກປີ ເພື່ອໃຊ້ເປັນຂໍ້ມູນອ້າງອີງໃນການເຮັດນະໂຍບາຍ ແລະ ໂຄງການຂອງລັດ ໂດຍພາກລັດ ແລະ ອົງກອນຂອງລັດ.
ຄໍາເຫັນ