 |
ທ່ານ ເດດສັກດາ ມະນີຄຳ ຮອງປະທານຄະນະກຳມະການປົກຄອງແຂວງ, ປະທານຄະນະກຳມະ ການຄຸ້ມຄອງໄພພິບັດຂັ້ນແຂວງຄຳມ່ວນ ໄດ້ລາຍງານຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານຄຸ້ມຄອງໄພພິບັດປະຈໍາປີ 2025 ແລະ ວາງທິດທາງປີ 2026 ໃນວັນທີ 17 ມິຖຸນາຜ່ານມາວ່າ: ໃນໄລຍະ 1 ປີ ຜ່ານມາ, ໄດ້ມີເຫດການໄພພິບັດເກີດຂຶ້ນໃນຂອບເຂດທົ່ວປະເທດ 70 ຄັ້ງ, ໃນນັ້ນ, ນໍ້າຖ້ວມ 38 ຄັ້ງ, ດິນເຈື່ອນ 1 ຄັ້ງ, ລົມພາຍຸພັດ 16 ຄັ້ງ, ໄຟໄໝ້ເຮືອນ 15 ຄັ້ງ, ມີຜູ້ໄດ້ຮັບຜົນກະທົບທັງໝົດ 403,373 ເທື່ອຄົນ, ເສຍຊີວິດ 55 ຄົນ, ສູນຫາຍ 5 ຄົນ, ສົ່ງຜົນກະທົບຕໍ່ການພັດທະນາເສດຖະກິດ-ສັງຄົມຢ່າງໜັກໜ່ວງ ມູນຄ່າຄວາມເສຍຫາຍປະມານ 2,940 ຕື້ກວ່າກີບ. ສໍາລັບແຂວງຄຳມ່ວນ ເປັນແຂວງໜຶ່ງທີ່ໄດ້ຮັບຜົນກະທົບເຊັ່ນ: ນໍ້າຖ້ວມ, ລົມພະຍຸພັດ, ໄຟໄໝ້ເຮືອນປະຊາຊົນ, ຟ້າຜ່າ ແລະ ອື່ນໆ, ແຕ່ການຟື້ນຟູກໍຍັງບໍ່ທັນສຳເລັດ ຍັງເປັນສິ່ງທ້າທາຍຂອງແຂວງ. ພ້ອມນີ້, ຮຽກຮ້ອງມາຍັງບັນດາຄະນະກຳມະການຄຸ້ມຄອງໄພພິບັດຂັ້ນແຂວງ, ຂັ້ນເມືອງ ຈົ່ງໄດ້ພ້ອມກັນຍົກສູງຄວາມຮັບຜິດຊອບຂອງຕົນ, ເອົາໃຈໃສ່ຕິດຕາມປະກອບຄຳເຫັນເພື່ອຄົ້ນຄວ້າປຶກສາຫາລືແລກປ່ຽນບົດຮຽນ ຈາກຜົນກະທົບໃນໄລຍະຜ່ານມາ, ຊອກຫາວິທີປັບປຸງແກ້ໄຂສິ່ງອຸດຕັນໃຫ້ມີເນື້ອໃນຄົບຖ້ວນ ແລະ ເປັນເອກະພາບໃນການຈັດຕັ້ງປະຕິບັດໃນຕໍ່ໜ້າ ໃຫ້ໄດ້ຮັບຜົນດີກວ່າເກົ່າ ເພື່ອຈະໄດ້ພ້ອມກັນສຳເລັດຕາມຈຸດປະສົງ ແລະ ລະດັບຄາດໝາຍທີ່ກຳນົດໄວ້.
ໂອກາດນີ້, ປະທານຄະນະກຳມະການຄຸ້ມຄອງໄພພິບັດຂັ້ນແຂວງ ໄດ້ມອບເງິນກອງທຶນໄພພິບັດຂັ້ນແຂວງໃຫ້ 10 ຕົວເມືອງຂອງແຂວງ, ສະເລ່ຍເມືອງລະ 30 ລ້ານກີບ ເພື່ອປະກອບສ່ວນໃຫ້ກອງທຶນໄພພິບັດຂັ້ນເມືອງ ກະກຽມຕອບໂຕ້ໄພພິບັດທີ່ອາດຈະເກີດຂຶ້ນ. ຂ່າວ-ພາບ: ແດງສະຫວັດ ແສນພານິດ
ຄໍາເຫັນ