ປີດຊຸດຝຶກອົບຮົມໃຫ້ນັກກວດສອບຂັ້ນ 1 ຊຸດທີ 4

ໃນຕອນເຊົ້າຂອງວັນທີ 8ທັນວາ ນີ້ທີ່ ອົງການກວດສອບປະຈຳພາກກາງ ໄດ້ມີພິທີປີດຊຸດຝຶກອົບຮົມນັກກວດສອບແຫ່ງລັດ ຂັ້ນ 1 ຊຸດ 4 ຂອງອົງການກວດສອບແຫ່ງລັດ ແລະ ອົງການກວດສອບປະຈຳພາກ ປະຈໍາປີ 2023,ຊຶ່ງມີຜູ້ເຂົ້າຮ່ວມຝຶກອົບຮົມທັງໝົດ ຈໍານວນ 37 ທ່ານ ຍິງ 13 ທ່ານ, ໃນນີ້, ອົງການກວດສອບແຫ່ງລັດ ຈໍານວນ 22 ທ່ານ, ອົງການກວດສອບປະຈຳພາກກາງ 1 ຈໍານວນ 5 ທ່ານ, ອົງການກວດສອບປະຈຳພາກເໜືອ 1 ຈໍານວນ 4 ທ່ານ, ອົງການກວດສອບປະຈໍາພາກເໜືອ 2 ຈຳນວນ 1 ທ່ານ ແລະ ອົງການກວດສອບປະຈໍາພາກໃຕ້ ຈໍານວນ 5 ທ່ານ, ພາຍໃຕ້ການສະໜັບສະໜູນທຶນຊ່ວຍເຫຼືອ ຈາກອົງການສະຫະປະຊາຊາດເພື່ອການພັດທະນາ (UNDP).
ການຈັດຕັ້ງຝຶກອົບຮົມໃນຄັ້ງນີ້ ໄດ້ດຳເນີນເປັນເວລາ 49 ວັນ ໃນລະຫວ່າງວັນທີ 2 ຕຸລາ ຫາ 8 ທັນວາ 2023 ທີ່ຫ້ອງປະຊຸມ ຊັ້ນ 5 ຂອງອົງການກວດສອບປະຈໍາພາກກາງ 1 (ບໍ່ນັບວັນພັກລັດຖະການ) ຊຶ່ງຝຶກອົບຮົມໃນຮູບແບບຮຽນເຊິ່ງໜ້າ ແລະ ແບບລະບົບທາງໄກ. ໂດຍນອນໃນຫຼັກສູດຝຶກອົບຮົມນັກກວດສອບຂັ້ນ 1 ທີ່ຮັບຮອງໂດຍອົງການກວດສອບແຫ່ງລັດ.
ທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດ ຜູ້ຊີ້ນຳວຽກງານສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບໄດ້ກ່າວວ່າ:  ການຈັດຊຸດຝຶກອົບຮົມເປັນນັກກວດສອບ ຂັ້ນ 1 ຊຸດທີ4 ແມ່ນມີຄວາມສໍາຄັນຫຼາຍໃນການບໍາລຸງກໍ່ສ້າງນັກກວດສອບ ຫຼື ຜູ້ເຂົ້າຮ່ວມຊຸດຝຶກອົບຮົມ ທີ່ໄດ້ສໍາເລັດ ແລະ ໄດ້ຍົກລະດັບຂີດຄວາມສາມາດຂອງນັກກວດສອບ ກາຍເປັນນັກກວດສອບມືອາຊີບຂຶ້ນເທື່ອລະກ້າວ ຕາມວິໄສທັດຮອດປີ 2023 ແລະ ຍຸດທະສາດການພັດທະນາວຽກງານກວດສອບແຫ່ງລັດ ຮອດປີ 2025 ທີ່ ອົງການກວດສອບແຫ່ງລັດໄດ້ວາງໄວ້.ຊຸດຝຶກອົບຮົມໃນຄັ້ງນີ້.
ທ່ານຮອງປະທານອົງການກວດສອບແຫ່ງລັດຍັງໄດ້ຢ້ຳວ່າ: ພວກເຮົາສາມາດບໍາລຸງກໍ່ສ້າງໄດ້ທາງດ້ານຈໍານວນ ແຕ່ຄຸນນະພາບນັ້ນຈະຕ້ອງເບິ່ງຄືນໃນການປະຕິບັດໜ້າທີ່ວຽກງານຕົວຈິງ, ສະນັ້ນຈຶ່ງສະເໜີໃຫ້ສະຖາບັນຄົ້ນຄວ້າ ແລະ ຝຶກອົບຮົມວຽກງານກວດສອບ ໄດ້ຈັດຕັ້ງປະເມີນເບິ່ງໃນການປະຕິບັດວຽກງານກວດສອບຂອງແຕ່ລະກົມ, ພະແນກ ແລະບັນດາທ່ານທີ່ກ່ຽວຂ້ອງ; ສະເໜີຕໍ່ບັນດາທ່ານຜູ້ທີ່ໄດ້ເຂົ້າຝຶກອົບຮົມບໍາລຸງກໍ່ສ້າງ ແລະ ຮັບຮອງເປັນນັກກວດສອບ ຂັ້ນ 1 ໃນຊຸດນີ້ຕ້ອງໄດ້ເອົາໃຈໃສ່ນໍາເອົາບົດຮຽນ, ຄວາມຮູ້ປະສົບການທີ່ໄດ້ຄົ້ນຄວ້າຮໍ່າຮຽນໝູນໃຊ້ເຂົ້າໃນການເຄື່ອນໄຫວຈັດຕັ້ງວຽກງານກວດສອບໃນຕໍ່ໜ້າໃຫ້ໄດ້ຮັບຜົນດີຕາມວິໄສທັດ, ຍຸດທະສາດພັດທະນາວຽກງານກວດສອບ, ທິດທາງໃນການບໍາລຸງກໍ່ສ້າງນັກກວດສອບ ໃຫ້ກາຍເປັນມືອາຊີບຂອງ ອົງການກວດສອບແຫ່ງລັດວາງໄວ້.
ຂ່າວ:ກວດສອບປະຈຳພາກກາງ,ພາບ:ພັດ ລໍວັນໄຊ