 |
ປີ 2022, ເມືອງເຈີ້ງຕິ້ງ ໄດ້ຕ້ອນຮັບນັກທ່ອງທ່ຽວ 5,305,800 ເທື່ອຄົນ, ປີ2023, ບັນລຸຫຼາຍກວ່າ 15,000,000 ເທື່ອຄົນ, ມາຮອດປີ 2024, ສະເພາະແຕ່ຫົກເດືອນຕົ້ນປີໄດ້ຕ້ອນຮັບນັກທ່ອງທ່ຽວຫຼາຍກວ່າ 33,970,000 ເທື່ອຄົນ.
ການທ່ອງທ່ຽວວັດທະນະທຳຂອງເມືອງເຈີ້ງຕິ້ງໄດ້ຮັບຄວາມນິຍົມສູງນີ້ ແມ່ນຍ້ອນໄດ້ຮັບຜົນປະໂຫຍດຈາກຊາວເຈີ້ງຕິ້ງເອົາໃຈໃສ່ການປົກປັກຮັກສາເອກະລັກອັນໂດດເດັ່ນຂອງເມືອງບູຮານດັ່ງກ່າວ.
ທ່ານ ຫວາງຈື້ມິນ ຮອງປະທານສະຖາບັນຄົ້ນຄວ້າວັດທະນະທຳບູຮານເຈີ້ງຕິ້ງໃຫ້ຮູ້ວ່າ: “ແນວຄິດສຳຄັນຂອງທ່ານປະທານ ສີຈິ້ນຜິງ ກ່ຽວກັບການອະນຸລັກຮັກສາວັດຖຸບູຮານແມ່ນມີລັກສະນະເບິ່ງກວ້າງມອງໄກ ແລະ ລັກສະນະເປັນລະບົບຢ່າງພົ້ນເດັ່ນທີ່ສຸດ. ໄລຍະທີ່ເຮັດວຽກຢູ່ເຈີ້ງຕິ້ງ, ເພິ່ນໄດ້ຊຸກຍູ້ການດຳເນີນວຽກງານຕ່າງໆໃນການປົກປັກຮັກສາວັດຖຸບູຮານຢ່າງປະດິດສ້າງ ຊຶ່ງສາມາດຮັກສາຊັບສົມບັດດ້ານວັດຖຸບູຮານຂອງເມືອງບູຮານວັດທະນະທຳແຫ່ງນີ້ໄວ້ໄດ້.”
ຕົ້ນຊຸມປີ 1980, ທ່ານ ສີຈິ້ນຜິງ ໄດ້ໄປເຮັດວຽກເປັນການນຳຢູ່ເມືອງເຈີ້ງຕິ້ງ. ໃນຕອນນັ້ນ, ປະຊາຊົນຍັງຂາດສະຕິຕໍ່ການອະນຸລັກວັດຖຸບູຮານ, ເຂົາເຈົ້າໄດ້ທຸບມ້າງເອົາດິນຈີ່ຈາກກຳແພງເມືອງບູຮານໄປປຸກເຮືອນ, ສ້າງຄອກໝູ ແລະ ອື່ນໆ. ສະນັ້ນ, ກຳແພງເມືອງບູຮານເຈີ້ງຕິ້ງ ຈຶ່ງຖືກເສຍຫາຍຢ່າງໜັກໜ່ວງ.
ເມື່ອເຫັນວັດຖຸບູຮານບໍ່ໄດ້ຮັບການຖະໜອມຫວງແຫນ, ທ່ານ ສີຈິ້ນຜິງ ຮູ້ສຶກເສຍໃຈທີ່ສຸດ: “ພວກເຮົາປົກປັກຮັກສາບໍ່ໄດ້ດີກໍຖືວ່າເປັນໂທດກຳ, ທັງຈະອັບອາຍຕໍ່ຄົນຮຸ່ນຫຼັງ.” ເພິ່ນໄດ້ສະເໜີຍຸດທະສາດ “ພັດທະນາເມືອງໃຫ້ຈະເລີນດ້ວຍວັດທະນະທຳ” ແລະ“ພັດທະນາເມືອງໃຫ້ຈະເລີນດ້ວຍການທ່ອງທ່ຽວ” ຢ່າງມີວິໄສທັດເບິ່ງກວ້າງມອງໄກ, ເພິ່ນໄດ້ເປັນຜູ້ຊີ້ນຳວຽກງານສຳຫຼວດວັດຖຸບູຮານທົ່ວເມືອງເພື່ອເກັບມ້ຽນສຳເນົາ, ນອກນີ້ຍັງໄດ້ສ້າງແຜນການປົກປັກຮັກສາວັດຖຸບູຮານກັບທີ່ນຳອີກ.
ທ່ານນາງ ເຫີຢວີ້ ຮອງເຈົ້າເມືອງທີ່ຮັບຜິດຊອບວຽກງານວັດທະນະທຳ ແລະ ການສຶກສາໃນເວລານັ້ນໄດ້ໃຫ້ຮູ້ວ່າ: “ທ່ານປະທານ ສີຈິ້ນຜິງ ເຮັດແນວນີ້ກໍມີຈຸດປະສົງເພື່ອໃຫ້ພະນັກງານ ແລະ ປະຊາຊົນທົ່ວເມືອງຮັບຮູ້ວ່າອັນໃດແມ່ນວັດຖຸບູຮານ, ອັນໃດແມ່ນສະຖາປັດຕະຍະກຳບູຮານ ແລະ ຮ່ອງຮອຍວັດທະນະທຳບູຮານທີ່ບຸກລຸກຈັບຈອງບໍ່ໄດ້, ເປັນຫຍັງຈຶ່ງຕ້ອງປົກປັກຮັກສາວັດຖຸບູຮານ.”
ວັດໂຫຼງຊິ່ງ ເປັນພາກສ່ວນໜຶ່ງທີ່ສະຫງ່າງາມໃນກຸ່ມສະຖາປັດຕະຍະກຳບູຮານຂອງເມືອງເຈີ້ງຕິ້ງທັງເປັນກຸ່ມສະຖາປັດຕະຍະກຳສະໄໝລາຊະວົງຊົ້ງເໜືອຂອງຈີນທີ່ມີປະຫວັດສາດດົນນານທີ່ສຸດ, ມີຂະໜາດໃຫຍ່ທີ່ສຸດ ແລະ ມີແຜນຜັງຄົບຖ້ວນທີ່ສຸດ ຊຶ່ງສາມາດຮັກສາໄວ້ຈົນເຖິງປັດຈຸບັນ. ປີ 1984, ທ່ານ ສີຈິ້ນຜິງ ພະຍາຍາມຍາດແຍ່ງໄດ້ງົບປະມານສະເພາະປະຕິສັງຂອນສະຖາປັດຕະຍະກຳບູຮານຈາກຂັ້ນເທິງຈຳນວນ 1,720,000 ຢວນ. ເມືອງເຈີ້ງຕິ້ງ ໄດ້ນຳໃຊ້ເງິນບ້ວງນີ້ເຂົ້າໃນການປະຕິສັງຂອນວັດໂຫຼງຊິ່ງແບບລັກສະນະກອບກູ້, ນອກນີ້, ຍັງໄດ້ສ້າງສະຖານທີ່ຈອດລົດຢູ່ນອກວັດດັ່ງກ່າວເພື່ອໃຫ້ການບໍລິການທີ່ດີແກ່ນັກທ່ອງທ່ຽວທັງຫຼາຍ. ຈາກນັ້ນມາ, ວັດເກົ່າແກ່ພັນປີແຫ່ງນີ້ຈຶ່ງໄດ້ຟື້ນຟູຄວາມສະຫງ່າລາສີຄືນໃໝ່.
ຫຼາຍສິບປີຜ່ານມານີ້, ນະໂຍບາຍ ແລະ ແຜນການອັນມີວິໄສທັດເບິ່ງກວ້າງມອງໄກດັ່ງກ່າວຂອງທ່ານ ສີຈິ້ນຜິງ ໄດ້ຮັບການຈັດຕັ້ງປະຕິບັດຢູ່ເມືອງເຈີ້ງຕິ້ງຢ່າງຕໍ່ເນື່ອງ, ໄດ້ເຮັດໃຫ້ແນວຄິດອະນຸລັກຮັກສາ ແລະ ພັດທະນາເມືອງບູຮານໄປຄຽງຄູ່ກັນນັ້ນໄດ້ຖືກຝັງຮາກເລິກເຂົ້າໃນຈິດໃຈຂອງຊາວເມືອງເຈີ້ງຕິ້ງແຕ່ລະຮຸ່ນຄົນເທື່ອລະກ້າວ.
 |
ປີ 2015, ເມືອງເຈີ້ງຕິ້ງ ໄດ້ເລີ່ມປະຕິບັດວຽກງານຂຸດຄົ້ນບູຮານຄະດີຢູ່ຮ່ອງຮອຍບູຮານສະຖານທີ່ເດີ່ນທາງທິດໃຕ້ຂອງວັດຄ່າຍຢວນ. ຮ່ອງຮອຍດັ່ງກ່າວຕັ້ງຢູ່ເຂດໃຈກາງຂອງເມືອງບູຮານເຈີ້ງຕິ້ງ. ພາກສ່ວນທີ່ກ່ຽວຂ້ອງຂອງທ້ອງຖິ່ນນີ້ບໍ່ໄດ້ປິດບັງຮ່ອງຮອຍບູຮານສະຖານຈົນໝົດ, ແຕ່ແມ່ນກັ້ນດ້ວຍຝາແກ້ວແຜ່ນໃຫຍ່ຢູ່ສະຖານທີ່ຂຸດຄົ້ນບູຮານຄະດີເພື່ອໃຫ້ນັກທ່ອງທ່ຽວສາມາດໄດ້ເຫັນຮ່ອງຮອຍປະຫວັດສາດຕ່າງໆເຊັ່ນ: ນ້ຳສ້າງ, ກຳແພງເມືອງ, ທາງຮ່ອມ ແລະ ຖະໜົນບູຮານເປັນຕົ້ນ ຊຶ່ງເຮັດໃຫ້ມໍລະດົກທີ່ຢັ່ງຢາຍຢູ່ຕາມດິນແດນອັນກວ້າງໃຫຍ່ໄພສານ ຖືກຟື້ນຟູຄວາມມີຊີວິດຊີວາຄືນໃໝ່.
ທ່ານ ຊ້ານຈີ້ສຽງ ອະດີດຜູ້ອຳນວຍການຫໍພິພິທະພັນພະລາຊະວັງກູ້ກົ່ງປັກກິ່ງທີ່ດຳລົງຕຳແໜ່ງເປັນຜູ້ອຳນວຍການກິດຕິມະສັກຂອງຫໍພິພິທະພັນເຈີ້ງຕິ້ງເຫັນວ່າ: “ເມື່ອມໍລະດົກວັດທະນະທຳຄົງຕົວຢູ່ໃນຊີວິດຂອງຊາວເມືອງ, ເຮັດໃຫ້ເຂົາເຈົ້າສາມາດເວົ້າກັບນັກທ່ອງທ່ຽວຢ່າງພາກພູມໃຈວ່າ ‘ນີ້ແມ່ນມໍລະດົກວັດທະນະທຳເຈີ້ງຕິ້ງຂອງພວກເຮົາ’, ເມື່ອນັກທ່ອງທ່ຽວຍອມມາທ່ຽວທີ່ແຫ່ງນີ້, ມາແລ້ວກໍບໍ່ຢາກຈາກໄປ, ຈາກໄປແລ້ວຍັງຢາກກັບມາທ່ຽວອີກ, ມັນຈຶ່ງສົມກັບວ່າ ປົກປັກຮັກສາມໍລະດົກວັດທະນະທຳໄດ້ດີ.” “ສ່ວນເຈີ້ງຕິ້ງແມ່ນເຮັດໄດ້ສຳເລັດແລ້ວ.
ເລື່ອງລາວຂອງເຈີ້ງຕິ້ງເປັນພາບຫຍໍ້ອັນໜຶ່ງທີ່ສ່ອງແສງເຖິງແນວຄິດ “ປົກປັກຮັກສາມໍລະດົກວັດທະນະທຳປະຫວັດສາດຂອງຕົວເມືອງໃຫ້ດີປານກັບຖະໜອມຮັກຊີວິດຂອງຕົນ”ໄດ້ເຂົ້າສູ່ຈິດໃຈຂອງປະຊາຊົນຢ່າງແທ້ຈິງ.
ທຸກມື້ນີ້, ຢູ່ປະເທດຈີນ, ທ້ອງຖິ່ນຕ່າງໆ ແລະ ພາກສ່ວນຕ່າງໆໄດ້ຖືເອົາວຽກງານປົກປັກຮັກສາໄວ້ຢູ່ໃນຖານະສຳຄັນອັນດັບໜຶ່ງ ໂດຍສາມາດເຮັດໃຫ້ມໍລະດົກທີ່ຢັ່ງຢາຍຢູ່ຕາມດິນແດນອັນກວ້າງໃຫຍ່ໄພສານນັ້ນ ຖືກຟື້ນຟູຄວາມມີຊີວິດຊີວາຄືນໃໝ່ ແລະ ເປັ່ງປະກາຍລັດສະໝີຂອງຍຸກສະໄໝ.
ໂດຍ: ຊີອາໄອ
ຄໍາເຫັນ