ປວງຊົນລາວຮັກສາໄດ້ຮີດຄອງປະເພນີອັນດີງາມໃນງານບຸນອອກພັນສາ ແລະ ຊ່ວງເຮືອທີ່ທ່າວັດຈັນ

ໃນແຕ່ລະວັນໄດ້ມີປະຊາຊົນໃຫ້ຄວາມສົນໃຈຫຼັ່ງໄຫຼເຂົ້າມາທ່ຽວງານບຸນຢ່າງຄັບຄາໜາແໜ້ນ ມີບັນ ຍາກາດເບີກບານມ່ວນຊື່ນເຂົ້າຮ່ວມໃນກິດຈະກຳຕ່າງເຊັ່ນ: ກິດຈະກໍາທາງສາສະໜາ ແລະ ຮີດຄອງປະເພນີມີການຄອບໄຄວ່ສະຖານທີ່ສັກສິດ, ມີພິທີສູດອອກພັນສາປະວໍລະນາ, ຕັກບາດຖວາຍສັງຄະທານຕາມປະເພນີລາວ, ວຽນທຽນໄຫຼເຮືອໄຟໂຄກ, ຈູດບັ້ງໄຟພຸ-ໄຟດອກ ແລະ ບັ້ງໄຟຕະໄລ,

ການສະແດງສິລະປະວັນນະ ຄະດີ, ລອຍກະໂທງ ແລະ ກິດຈະກໍາຊ່ວງເຮືອໃນວັນທີ 8 ຕຸລາ 2025 ຊຶ່ງມີເຮືອເຂົ້າຮ່ວມແຂ່ງຂັນທັງໝົດ 12 ລໍາ, ມີເຮືອປະເພນີ 55 ສີພາຍ (ຍິງ-ຊາຍ) ແລະ ເຮືອສູດຊາຍ, ກິດຈະກຳວາງສະແດງ ແລະ ຊື້-ຂາຍສິນຄ້າ ແລະ ອື່ນໆ. ພາຍໃນງານບຸນໄດ້ມີຫຼາກຫຼາຍກິດຈະກຳໃຫ້ມວນຊົນໄດ້ທ່ຽວຊົມທັງເວັນ ແລະ ຄືນ ໂດຍມີງານວາງສະແດງ-ຈໍາໜ່າຍສິນຄ້າເຄື່ອງທົ່ວໄປທັງພາຍໃນ ແລະ ຕ່າງປະເທດ ຊຶ່ງອຳນາດການປົກ ຄອງໄດ້ເນັ້ນການສົ່ງເສີມຜະລິດຕະພັນສິນຄ້າທີ່ພົ້ນເດັ່ນຂອງທ້ອງຖິ່ນ, ຂອງບ້ານ, ເມືອງ, ຄອບຄົວຕົວແບບ, ຜະລິດສິນຄ້າໂອດັອບ ແລະ ອື່ນໆ; ໂດຍມີຫົວໜ່ວຍທຸລະກິດ, ຫ້າງຮ້ານທີ່ມາວາງສະແດງ, ຂາຍສິນຄ້າ ແລະ ຂາຍເຂົ້າຫຼາມ, ປີ້ງໄກ່ ເພື່ອໃຫ້ປະຊາຊົນລາວບັນດາເຜົ່າ ແລະ ນັກທ່ອງທ່ຽວຕ່າງປະເທດທີ່ມາທ່ຽວງານບຸນໄດ້ຈັບຈ່າຍຊື້-ຂາຍ, ແລກປ່ຽນຜະລິດຕະພັນພາຍໃນ, ສົ່ງເສີມສິນຄ້າພາຍໃນ ກໍຄືການທ່ອງທ່ຽວພາຍໃນລາວທ່ຽວລາວເຊິ່ງກັນ ແລະ ກັນ.

ການຈັດງານບຸນຄັ້ງນີ້, ເພື່ອຮັກສາຮີດຄອງປະເພນີອັນດີງາມຂອງຊາດ ປະກອບສ່ວນດຶງດູດນັກທ່ອງທ່ຽວພາຍໃນ ແລະ ຕ່າງປະເທດໃຫ້ເຂົ້າມາທ່ຽວ ນວ ເພື່ອຊຸກຍູ້ສົ່ງເສີມການຜະລິດສິນຄ້າໜຶ່ງເມືອງໜຶ່ງຜະ ລິດຕະພັນທົດແທນການນໍາເຂົ້າ ແລະ ສົ່ງເສີມການຄ້າ-ຂາຍເຮັດໃຫ້ເສດຖະກິດດີຂຶ້ນ ເພື່ອເປັນການປົກປັກຮັກສາ ແລະ ສົ່ງເສີມຮີດຄອງປະເພນີອັນດີງາມຂອງຊາດໄວ້ຢ່າງຍືນຍົງ. ປີນີ້ເຫັນວ່າປະຊາຊົນໂດຍສ່ວນໃຫຍ່ຮັກສາໄດ້ຮີດຄອງປະເພນີລາວ ມີຄວາມສາມັກຄີ ຮັກສາໄດ້ຄວາມສະຫງົບ ຄວາມເປັນລະບຽບຮຽບຮ້ອຍເປັນຢ່າງດີ.