ພາຍຫຼັງທີ່ໄດ້ພັກຜ່ອນແລ້ວ ດ້ວຍໃຈຮັກມັກດ້ານການປູກຝັງ-ລ້ຽງສັດ ບວກກັບຕົນເອງມີດິນຕອນໜຶ່ງຢູ່ບ້ານແລ້ງ. ໃນປີ 1998 ຈຶ່ງໄດ້ມີແນວຄິດຢາກປູກໝາກພ້າວນໍ້າຫອມ ແລະ ປູກພືດແບບປະສົມປະສານ ຊຶ່ງໄດ້ເລີ້ມສຶກສາຄົ້ນຄວ້າຊອກຫາຂໍ້ມູນ, ວິທີການ, ຂັ້ນຕອນການປູກໝາກພ້າວນຳໝູ່ເພື່ອນຜູ້ມີປະສົບການ ແລະ ຄົ້ນຄວ້າຮຽນຮູ້ນໍາເອກະສານຕ່າງໆ. ພໍໄດ້ຄວາມຮູ້ໂດຍພື້ນຖານແລ້ວ ຈຶ່ງໄດ້ຕັດສິນໃຈບຸກເບີກເນື້ອທີ່ດິນສວນຂອງຕົນ ແລະ ໄດ້ໄປຕິດຕໍ່ຊື້ເບ້ຍໝາກພ້າວນຳຜູ້ຮູ້ ໂດຍເລືອກເອົາແນວພັນຢາງຈາກໄທມາປູກຈຳນວນ 300 ເບ້ຍ, ຊຶ່ງໄດ້ບຸກເບີກໜ້າດິນເຮັດເປັນຮ່ອງ, ເປັນແຖວຍາວ ແລະ ຂຸດຂຸມມີຂະໜາດ 30x30 ຊັງຕີແມັດ, ເລິກ 30 ຊັງຕີແມັດ ຊຶ່ງມີໄລຍະຫ່າງຂອງແຖວ 5 ແມັດ, ໄລຍະຫ່າງລະຫວ່າງຕົ້ນ 5 ແມັດ, ຫຼັງຈາກນັ້ນ ໄດ້ຊື້ເບ້ຍມາປູກເພີ້ມອີກ 200 ຕົ້ນ ລວມທັງໝົດ 500 ຕົ້ນ ໃນເນື້ອທີ່ທັງໝົດ 8 ເຮັກຕາ. ໂດຍນຳໃຊ້ທຶນໃນເບື້ອງຕົ້ນ ເຂົ້າໃນການບຸກເບີກສວນ, ຊື້ເບ້ຍໝາກພ້າວ, ການອະນາໄມສວນໝາກພ້າວ ແລະ ອື່ນໆໃນມູນຄ່າ 30 ລ້ານກວ່າກີບ. ພ້ອມທັງເອົາໃຈໃສ່ເບິ່ງແຍງ, ອານາໄມຖາງຫຍ້າ, ຫົດນ້ຳ, ໃຫ້ຝຸ່ນຕົ້ນໝາກພ້າວຢ່າງເປັນປົກກະຕິ ຈົນອາຍຸ 4 ປີ ຈຶ່ງເລີ້ມເກັບຜົນຜະລິດຂາຍ ໃນລາຄາ 15 ພັນ ຫາ 20 ພັນກີບຕໍ່ໜ່ວຍ. ດ້ານການຕະຫຼາດແມ່ນບໍ່ພຽງພໍກັບຄວາມຕ້ອງການຂອງຜູ້ບໍລິໂພກ ສ່ວນໃຫຍ່ແມ່ນມີຜູ້ມາຊື້ຢູ່ກັບສວນເລີຍ. ນອກນັ້ນ, ຍັງປູກຕົ້ນໝາກກະທັນ, ຫວາຍຂົມ, ປູກພືດຜັກສວນຄົວ, ໝາກເຜັດ, ໝາກນາວ, ໄມ້ໃຫ້ໝາກອື່ນໆ ຕິດພັນກັບການລ້ຽງງົວ, ຄວາຍ, ລ້ຽງເປັດ, ໄກ່, ປາ ແລະ ອື່ນໆ. ສາມາດສ້າງລາຍຮັບຈາກການຂາຍໝາກພ້າວ, ຫວາຍຂົມ, ໝາກກະທັນ, ສັດລ້ຽງ ແລະ ຜົນຜະລິດອື່ນໆ ສະເລ່ຍແລ້ວເປັນເງິນ 150-200 ລ້ານກວ່າກີບຕໍ່ປີ.
ສຳລັບປີນີ້, ແມ່ນມີລາຍຮັບຈາກການຂາຍພືດຜົນຜະລິດ, ສັດລ້ຽງທັງໝົດ 250 ລ້ານກວ້າກີບ ລວມລາຍຮັບທັງໝົດ 5 ປີຜ່ານມາ ສາມາດສ້າງລາຍຮັບເຂົ້າຄອບຄົວທັງໝົດເກືອບ 800 ລ້ານກີບ ໄດ້ເຮັດໃຫ້ສະພາບເສດຖະກິດ, ຊີວິດການເປັນຢູ່ຂອງຄອບຄົວນັບມື້ດີຂຶ້ນເລື້ອຍໆ.
ທ່ານ ນາງ ຄຳຫຼ້າ ທອງສະບາ ຍັງໄດ້ກ່າວອີກວ່າ: ເຄັດລັບໃນການຮັກສາໝາກພ້າວໃຫ້ມີໝາກຫຼາຍ ແລະ ອອກໝາກເປັນປົກກະຕິ ເວລາປູກໝາກພ້າວໃໝ່ຕ້ອງໃຫ້ໄລຍະຫ່າງລະຫວ່າງຕົ້ນໝາກພ້າວປະມານ 7 ແມັດ, ໄລຍະຫ່າງຂອງແຖວ 5 ແມັດ, ໃສ່ຝຸ່ນຄອກຕົ້ນລະ 1 ກະສອບ, ເກືອເຄີ່ງກິໂລຕໍ່ຕົ້ນໃສ່ປີລະ 2 ເທື່ອ ບວກກັບການບົວລະບັດຮັກສາ, ຖາງຫຍ້າອະນາໄມ, ຫົດນ້ຳໃຫ້ພຽງພໍ ເວລາໝາກພ້າວໝາກໃຫ້ນຳເຊືອກ ຫຼື ຂໍເຫຼັກ ໄປເກາະເອົາແຊງໝາກພ້າວ ຫ້ອຍກັບກ້ານຂອງໃບໄວ້ ເພື່ອໃຫ້ແຊງສາມາດຮັບນ້ຳໜັກຂອງໝາກພ້າວໄວ້ໄດ້ດີ ຈະເຮັດໃຫ້ໝາກພ້າວສົມບູນ, ມີໝາກຫຼາຍ ແລະ ມີລົດຊາດຫວານຫອມ ສິ່ງສຳຄັນແມ່ນເລື່ອງການໃຫ້ຢາປ້ອງກັນພະຍາດຢ່າງເປັນປົກກະຕິ. ສຳລັບໃນຕໍ່ໜ້າ ຈະຂະຫຍາຍເນື້ອທີ່ ແລະ ປູກພືດຜັັກ, ຕົ້ນໄມ້ໃຫ້ໝາກໃຫ້ມີຄວາມຫຼາກຫຼາຍ ຄົບຖ້ວນແບປະສົມປະສານຫຼາຍຂຶ້ນ,
(ໂດຍ: ທອງເພັດ ບົວສະຫວັນ)
ຄໍາເຫັນ