ໃນວັນທີ 23 ພະຈິກ ນີ້, ກຳມາທິການກົດໝາຍ ສະພາແຫ່ງຊາດ ໄດ້ຈັດກອງປະຊຸມປຶກສາຫາລື ແລະ ກະກຽມແຜນການສ້າງ ແລະ ປັບປຸງກົດໝາຍ ປະຈຳປີ 2024 ທີ່ຈະນຳເຂົ້າພິຈາລະນາໃນກອງປະຊຸມສະໄໝສາມັນເທື່ອທີ 7 ແລະ ເທື່ອທີ 8 ຂອງສະພາແຫ່ງຊາດ ຊຸດທີ IX ທີ່ຫ້ອງປະຊຸມອະເນກປະສົງ (426) ສະພາແຫ່ງຊາດ ໂດຍການເປັນປະທານຂອງທ່ານຈະເລີນ ເຢຍປາວເຮີ ຮອງປະທານສະພາແຫ່ງຊາດ ປະທານກຳມາທິການກົດໝາຍ, ເຂົ້າຮ່ວມມີບັນດາປະທານກຳມາທິການ, ຮອງປະທານກຳມາທິການທີ່ກ່ຽວຂ້ອງ, ຕາງໜ້າຈາກກະຊວງ ແລະພາກສ່ວນທີ່ກ່ຽວຂ້ອງ.
ໃນກອງປະຊຸມທ່ານ ຈະເລີນ ເຢຍປາວເຮີ ໄດ້ມີຄຳເຫັນກ່າວເປີດກອງປະຊຸມວ່າ: ປະຕິບັດຕາມກົດໝາຍວ່າດ້ວຍການສ້າງນິຕິກໍາສະບັບເລກ 06/ສພຊ, ລົງວັນທີ 16ພະຈິກ 2021 ມາດຕາ 28 ກ່ຽວກັບການພິຈາລະນາແຜນການສ້າງ ແລະ ປັບປຸງກົດໝາຍ, ມື້ນີ້ ກໍາມາທິການກົດໝາຍ ຈຶ່ງໄດ້ສົມທົບກັບກຳມາທິການທີ່ກ່ຽວຂ້ອງຂອງສະພາແຫ່ງຊາດຈັດກອງປະຊຸມໃນຄັ້ງນີ້ຂຶ້ນ ເພື່ອປຶກສາຫາລື ແລະ ກະກຽມແຜນການສ້າງ ແລະ ປັບປຸງກົດໝາຍ ປະຈຳປີ 2024 ຊຶ່ງກ່ອນການກໍານົດເປັນແຜນການສ້າງ ແລະ ປັບປຸງກົດໝາຍ ປະຈຳປີ 2024 ນີ້ ແມ່ນມີຄວາມຈຳເປັນຕ້ອງໄດ້ປຶກສາຫາລື ແລະ ຂໍການຢັ້ງຢືນຄວາມກຽມພ້ອມຂອງບັນດາຮ່າງກົດໝາຍສະບັບຕ່າງໆ ທີ່ຢູ່ໃນຄວາມຮັບຜິດຊອບຂອງບັນດາກະຊວງ, ອົງການກ່ອນ, ບົນພື້ນຖານຂອງຮ່າງກົດໝາຍ ທີ່ໄດ້ກຳນົດໄວ້ໃນແຜນການສ້າງ ແລະ ປັບປຸງກົດໝາຍ ແຕ່ປີ 2023-2025 ສະບັບເລກທີ 02/ຄປຈ, ລົງວັນທີ 28 ທັນວາ 2022 ຈໍານວນ 26 ສະບັບ, ສ້າງໃໝ່ 8 ສະບັບ, ປັບປຸງ 18ສະບັບ ໂດຍຈັດແບ່ງໃສ່ກອງປະຊຸມສະໄໝສາມັນ ເທື່ອທີ 7 ຈຳນວນ 13 ສະບັບ, ສ້າງໃໝ່ 5ສະບັບ, ປັບປຸງ 8 ສະບັບ ແລະ ກອງປະຊຸມສະໄໝສາມັນ ເທື່ອທີ 8 ຈຳນວນ 13 ສະບັບ, ສ້າງໃໝ່3 ສະບັບ, ປັບປຸງ 10 ສະບັບ ແລະ ຍັງມີຮ່າງກົດໝາຍທີ່ເລື່ອນມາຈາກກອງປະຊຸມສະໄໝສາມັນເທື່ອທີ 5 ແລະ ເທື່ອທີ 6 ຈຳນວນ 8 ສະບັບ ຊຶ່ງລວມແລ້ວມີຮ່າງກົດໝາຍຈຳນວນທັງໝົດ 34ສະບັບ ທີ່ຈະນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນ ເທື່ອທີ 7 ແລະ ເທື່ອທີ 8ຂອງສະພາແຫ່ງຊາດຊຸດທີ IX ເຫັນວ່າເປັນຈຳນວນທີ່ຫຼາຍເກີນໄປ ອີງຕາມໄລຍະເວລາ ແລະຈຳນວນກົດໝາຍນັ້ນອາດເຮັດໃຫ້ບໍ່ສາມາດນຳເອົາຮ່າງກົດໝາຍເຂົ້າພິຈາລະນາຮັບຮອງໄດ້ທັງໝົດ ເນື່ອງຈາກວ່າໃນທ້າຍປີ 2024 ສະພາແຫ່ງຊາດ ໄດ້ເປັນເຈົ້າພາບກອງປະຊຸມໃຫຍ່ສະມັດຊາລັດຖະສະພາລະຫວ່າງຊາດອາຊຽນ (AIPA) ຄັ້ງທີ 45 ໃນປີ 2024.ກອງປະຊຸມຂອງພວກເຮົາໃນຄັ້ງນີ້ ແມ່ນຈະຮັບຟັງການລາຍງານຂອງບັນດາທ່ານຜູ້ຕາງໜ້າກະຊວງ ແລະ ອົງການ ທີ່ຮັບຜິດຊອບສ້າງ ແລະ ປັບປຸງກົດໝາຍ ກ່ຽວກັບຄວາມກຽມພ້ອມຂອງຮ່າງກົດໝາຍ ທີ່ຈະກໍານົດເຂົ້າໃນແຜນການສ້າງ ແລະ ປັບປຸງກົດໝາຍ ແຕ່ປີ 2024-2025 ທັງເປັນການປຶກສາຫາລື ແລະ ຢັ້ງຢືນຄືນຄວາມກຽມພ້ອມທາງດ້ານເນື້ອໃນຂອງຮ່າງກົດໝາຍທີ່ຕົນຮັບຜິດຊອບ ແລະ ສັບຊ້ອນ ຮ່າງກົດໝາຍທີ່ເຫັນວ່າມີຄວາມຈຳເປັນ ແລະ ຮີບດ່ວນ ທີ່ເປັນບຸລິມະສິດໃນການກຳນົດເຂົ້າແຜນການສ້າງ ແລະ ປັບປຸງກົດໝາຍ ປະຈຳປີ 2024 ຄາດຄະເນວ່າຮ່າງກົດໝາຍທີ່ສັບຊ້ອນເຂົ້າໃນກອງປະຊຸມສະໄໝສາມັນ ແຕ່ລະເທື່ອນັ້ນ ແມ່ນ ບໍ່ໃຫ້ເກີນ 10ສະບັບ, ສ່ວນທີ່ເຫຼືອນັ້ນ ສະເໜີໃຫ້ເລື່ອນໄປໃສ່ສະພາແຫ່ງຊາດ ຊຸດທີ X ທັງໝົດທີ່ກ່າວມານັ້ນກໍເພື່ອໃຫ້ການສ້າງ ແລະ ປັບປຸງກົດໝາຍ ມີຄຸນນະພາບ ໂດຍບໍ່ແລ່ນນຳປະລິມານຫຼາຍເກີນໄປ.
ຈາກນັ້ນ, ກອງປະຊຸມໄດ້ຮັບຟັງລາຍງານແຜນການສ້າງ ແລະ ປັບປຸງກົດໝາຍ ປະຈຳປີ 2024ແລະ ຮ່າງກົດໝາຍທີີ່ເລື່ອນມາຈາກກອງປະຊຸມສະໄໝສາມັນ ເທື່ອທີ 5 ແລະ 6 ຂອງສະພາແຫ່ງຊາດ ຊຸດທີ IX; ຕາງໜ້າບັນດາ ກະຊວງ, ອົງການ ລາຍງານ: ແຜນສ້າງ ແລະ ປັບປຸງກົດໝາຍ ປະຈຳປີ 2024 ທີີ່ຈະນາເຂົ້າພິຈາລະນາ ໃນກອງປະຊຸມສະໄໝສາມັນ ເທື່ອທີ 7 ແລະ ເທື່ອທີ 8 ຂອງສະພາແຫ່ງຊາດ ຊຸດທີ IX; ຈໍານວນຮ່າງກົດໝາຍທີີ່ເລື່ອນມາຈາກກອງປະຊຸມສະໄໝສາມັນ ເທື່ອທີ 5 ແລະ ເທື່ອທີ 6 ທີີ່ມີຄວາມກຽມພ້ອມ ຈະນໍາເຂົ້າພິຈາລະນາໃນກອງປະຊຸມສະໄໝສາມັນ ເທື່ອທີ 7 ແລະ 8 ຂອງສະພາແຫ່ງຊາດ ຊຸດ IX. ພ້ອມນັ້ນ, ຜູ້ເຂົ້າຮ່ວມກໍໄດ້ມີການປະກອບຄຳຄິດຄຳເຫັນ ແລະ ປະທານກອງປະຊຸມກໍໄດ້ສະຫຼຸບສັງລວມ ແລະກ່າວປິດກອງປະຊຸມຢ່າງເປັນທາງການ.
(ຂາວ-ພາບ: ສພຊ)
ຄໍາເຫັນ