ປຶກສາຫາລື ການຈັດພິທີອັງເຊີນພະເຈົ້າໃຫຍ່ອົງຫຼວງຜາສຸກ ຈາກນະຄອນຫຼວງວຽງຈັນ ມາປະດິດສະຖານຢູ່ວັດປ່າຜາໂອ ນະຄອນ ຫຼວງພະບາງ

ໃນກອງປະຊຸມ ໄດ້ຮັບຟັງການລາຍງານໂຄງການກໍ່ສ້າງ ແລະ ຫຼໍ່ພະເຈົ້າໃຫຍ່ອົງຫຼວງຜາສຸກ ທີ່ມີໜ້າຕັກກວ້າງ 3 ແມັດ 20 ຊັງຕີແມັດ, ສູງ 4 ແມັດ 20 ຊັງຕີແມັດ, ມີນ້ຳໜັກທັງໝົດ 2,800 ກິໂລ, ມູນຄ່າ 1 ຕື້ 575 ລ້ານກີບ. ປັດຈຸບັນສໍາເລັດແລ້ວຫຼາຍກວ່າ 80%. ຈາກນັ້ນ, ໄດ້ຮັບຟັງແຜນການອັງເຊີນພະເຈົ້າໃຫຍ່ອົງຫຼວງຜາສຸກ ຊຶ່ງຈະໄດ້ມີພິທີອັງເຊີນແຫ່ຈາກໂຮງຫຼໍ່ ຢູ່ນະຄອນຫຼວງວຽງຈັນ ມາປະດິດສະຖານໃນພັດທະສິມາວັດຜາໂອ ໃນລະຫວ່າງວັນທີ 18-19 ມິຖຸນາ 2025 ທີ່ຈະມາເຖິງນີ້, ພາຍຫຼັງມາຮອດ ນະຄອນ ຫຼວງພະບາງ ຈະມີພິທີແຫ່ຈາກຕົວເມືອງໄປຫາວັດປ່າຜາໂອ. ຈາກນັ້ນ, ຜູ້ເຂົ້າຮ່ວມໄດ້ມີຄຳເຫັນ ແລກປ່ຽນກ່ຽວກັບບັນດາໜ້າວຽກ ທີ່ຈະຈັດຕັ້ງປະຕິບັດ. ຜ່ານການປະກອບຄຳເຫັນ ໄດ້ມີການຮັບຮອງເອົາບາງບັນຫາ ໂດຍເຫັນດີສະເໜີທ່ານເຈົ້າແຂວງ ອອກຂໍ້ຕົກລົງລະດັບແຂວງ ແຕ່ງຕັ້ງຄະນະຮັບຜິດຊອບພິທີອັງເຊີນພະເຈົ້າໃຫຍ່ອົງຫຼວງຜາສຸກ, ເຫັນດີເຮັດໜັງສືແຈ້ງອົງການປົກຄອງແຂວງວຽງຈັນ ໄດ້ຮັບຮູ້ກ່ຽວກັບຂະບວນແຫ່ພະເຈົ້າໃຫຍ່ອົງຫຼວງຜາສຸກ ເພາະຂະບວນແຫ່ຈະໄດ້ເດີນທາງຜ່ານບັນດາເມືອງຂອງແຂວງວຽງຈັນ, ເຫັນດີກຳນົດເສັ້ນທາງ ທີ່ຈະມີຂະບວນແຫ່ພະເຈົ້າໃຫຍ່ອົງຫຼວງຜາສຸກ ຈາກນະຄອນຫຼວງວຽງຈັນ ມາສູ່ນະຄອນ ຫຼວງພະບາງ ໃນວັນທີ 18 ມິຖຸນາ 2025 ແລ້ວນໍາໄປປະດິດສະຖານພັກແຮມ ຢູ່ສວນສາທາລະນະລ້ານຊ້າງ, ໃນຕອນຄໍ່າຈະມີການຄົບງັນຕາມປະເພນີຫຼວງພະບາງ, ຕອນເຊົ້າວັນທີ 19 ມິຖຸນາ 2025 ຈິ່ງມີພິທີອັງເຊີນ ແຫ່ຂະບວນຈາກສວນສາທາລະນະລ້ານຊ້າງ ໄປປະດິດສະຖານໃນພັດທະສິມາວັດປ່າຜາໂອ. ເຫັນດີໃຫ້ຄະນະກໍາມະການຮັບຜິດຊອບ ກຳນົດພິທີການແຫ່ພະເຈົ້າໃຫຍ່ອົງຫຼວງຜາສຸກ ຕະຫຼອດເສັ້ນທາງ ໃຫ້ມີການເສບດົນຕີພື້ນເມືອງລາວ ແລະ ການຄົບງັນຕາມປະເພນີອັນດີງາມ ຂອງຊາວນະຄອນ ຫຼວງພະບາງ ແລະ ມີການໂຄສະນາ ຜ່ານສື່ມວນຊົນໃຫ້ມວນຊົນໄດ້ຮັບຮູ້ກ່ຽວກັບເຫດການອັນສຳຄັນໃນຄັ້ງນີ້ ຢ່າງທົ່ວເຖິງ. ເຫັນດີໃຫ້ມີການຮັກສາຄວາມສະຫງົບປອດໄພ ແລະ ອຳນວຍຄວາມສະດວກ ໃຫ້ແກ່ພິທີອັງເຊີນແຫ່ພະເຈົ້າໃຫຍ່ອົງຫຼວງຜາສຸກ ໂດຍມອບໃຫ້ເຈົ້າໜ້າທີ່ກຳນົດແຜນການຮັກສາຄວາມສະຫງົບ ຕະຫຼອດເສັ້ນທາງ ຢ່າງລະອຽດຊັດເຈນ.

(ແຫຼ່ງຂ່າວ: ສາທຸ ຄຳຫຼ້າ, ພາບ: ເພັດສາຄອນ ສີມມະວົງ)