ສະຫາຍ ບຸນຫຼາຍ ບຸດທິ ຂຶ້ນເປັນຮັກສາການເລຂາພັກແຂວງ-ເຈົ້າແຂວງເຊກອງ

ໃນພິທີສະຫາຍ ເຫຼັກໄຫຼ ສີວິໄລ ໄດ້ຂຶ້ນຜ່ານບົດສະຫຼຸບການນໍາພາ-ຊີ້ນໍາຕະຫຼອດໄລຍະຜ່ານມາ ຊຶ່ງໄດ້ຍົກໃຫ້ເຫັນຜົນສໍາເລັດຫຼາຍດ້ານໃນການປະຕິບັດໜ້າທີ່ການເມືອງອັນໜັກໜ່ວງ ແລະ ມີກຽດສະຫງ່າທີ່ພັກ - ລັດ ແລະປະຊາຊົນຊາວແຂວງເຊກອງມອບໝາຍໃຫ້ນັບແຕ່ໄດ້ຮັບໜ້າທີ່ເປັນເລຂາພັກແຂວງ, ເຈົ້າແຂວງເຊກອງເປັນຕົ້ນມາ. ຈາກນັ້ນ, ສະຫາຍ ດອນ ໄພວົງ ຮອງຫົວໜ້າຄະນະຈັດຕັ້ງສູນກາງພັກ ໄດ້ຂຶ້ນອ່ານມະຕິຄໍາສັ່ງຂອງກົມການເມືອງສູນກາງພັກວ່າດ້ວຍການຍົກຍ້າຍແຕ່ງຕັ້ງພະນັກງານຂັ້ນສູງໄປຮັບໜ້າທີ່ໃໝ່, ມະຕິຕົກລົງ ວ່າດ້ວຍການແຕ່ງຕັ້ງຮັກສາການແທນເລຂາຄະນະບໍລິຫານງານພັກແຂວງ, ດໍາລັດວ່າດ້ວຍການແຕ່ງຕັ້ງຮັກສາການແທນເຈົ້າແຂວງເຊກອງ ຊຶ່ງເນື້ອໃນສຳຄັນແມ່ນໄດ້ຕົກລົງຍົກຍ້າຍ ສະຫາຍ ເຫຼັກໄຫຼ ສີວິໄລ ກໍາມະການສູນກາງພັກ ເລຂາຄະນະບໍລິຫານງານພັກແຂວງເຈົ້າແຂວງເຊກອງ ໄປຮັບໜ້າທີ່ໃໝ່ຢູ່ກະຊວງໂຍທາທິການ ແລະ ຂົນສົ່ງ ແລະ ຕົກລົງແຕ່ງຕັ້ງ ສະຫາຍ ບຸນຫຼາຍ ບຸດທິ ເປັນຮັກສາການແທນເລຂາພັກແຂວງ, ຮັກສາການແທນເຈົ້າແຂວງເຊກອງ.

ໂອກາດນີ້, ສະຫາຍ ສອນໄຊ ສີພັນດອນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານອັນພົ້ນເດັ່ນໃນການນຳພາ-ຊີ້ນໍາວຽກງານຂອງສະຫາຍຄະນະບໍລິຫານງານພັກແຂວງ ກໍຄືສະຫາຍເລຂາພັກແຂວງ ເຈົ້າແຂວງເຊກອງ ໃນຕະຫຼອດໄລຍະຜ່ານມາ; ພ້ອມນີ້, ກໍໃຫ້ຮູ້ວ່າການປັບປຸງສັບຊ້ອນໜ້າທີ່ຂອງບັນດາການນໍາຂັ້ນຕ່າງໆນັ້ນ, ກໍເພື່ອແນໃສ່ປັບປຸງການຈັດຕັ້ງ ແລະ ບຸກຄະລາກອນ ໃນແຕ່ລະໄລຍະໃຫ້ເຂັ້ມແຂງ, ໜັກແໜ້ນ, ຕອບສະໜອງຄວາມຮຽກຮ້ອງຕ້ອງການຂອງໜ້າທີ່ການເມືອງຂອງພັກ ໂດຍສະເພາະພະນັກງານນໍາພາ-ຄຸ້ມຄອງແຕ່ລະຂັ້ນຢູ່ແຕ່ລະບ່ອນ ເພື່ອເຮັດໃຫ້ການພັດທະນາເສດຖະກິດ-ສັງຄົມຂອງປະເທດເຮົາຂະຫຍາຍຕົວດີຂຶ້ນກວ່າເກົ່າ. ການຍົກຍ້າຍ ແລະ ແຕ່ງຕັ້ງຮັກສາການແທນການນໍາແຂວງເຊກອງ, ກໍເນື່ອງດ້ວຍຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່; ສະນັ້ນ, ຈຶ່ງຮຽກຮ້ອງມາຍັງສະຫາຍຜູ້ຖືກແຕ່ງຕັ້ງຮັກສາການແທນຈົ່ງສືບຕໍ່ເປັນຫຼັກແຫຼ່ງ, ເປັນຄັນທຸງ ແລະ ເປັນແກນນໍາໃນການນໍາພາເຕົ້າໂຮມຄວາມສາມັກຄີໃນຖັນແຖວພະນັກງານ-ສະມາຊິກພັກ ແລະ ປະຊາຊົນບັນດາເຜົ່າ; ສືບຕໍ່ເພີ່ມທະວີສ້າງຄວາມເຂັ້ມແຂງໃນລະບົບການເມືອງແຕ່ຂັ້ນແຂວງລົງຮອດຮາກຖານ ໂດຍຖືເອົາການປັບປຸງ-ກໍ່ສ້າງພັກເປັນໃຈກາງ; ສ້າງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນໃຫ້ມີຄຸນນະພາບ; ສ້າງການຫັນປ່ຽນໃໝ່ຢ່າງແຂງແຮງເລິກເຊິ່ງເພີ່ມກໍາລັງແຮງນໍາພາເຮັດຕົວຈິງຢູ່ຂັ້ນຮາກຖານ; ປັບປຸງກົນໄກ, ລະບອບ-ລະບຽບ, ແບບແຜນນໍາພາວິທີເຮັດວຽກ; ສືບຕໍ່ຊີ້ນໍາການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກໃຫ້ເລິກເຊິ່ງ ນັບທັງການຕີລາການນໍາພາລວມຂອງຄະນະພັກ ແລະ ສຳຫຼວດຕີລາຄາຄວາມຮັບຜິດຊອບຂອງແຕ່ລະສະຫາຍໃນຄະນະພັກແຂວງ; ຄົ້ນຄວ້າກຳແໜ້ນ, ຍູ້ແຮງການພັດທະນາເສດຖະກິດ-ສັງຄົມຂອງແຂວງໃຫ້ແຂງແຮງ ແລະ ດ້ານອື່ນໆ.

ທ່ານນາຍົກລັດຖະມົນຕີ ຍັງໄດ້ສະແດງຄວາມເຊື່ອໝັ້ນວ່າ: ດ້ວຍຄວາມຮູ້ຄວາມສາມາດ, ປະສົບປະການ ແລະ ບົດຮຽນຂອງ ສະຫາຍ ບຸນຫຼາຍ ບຸດທິ ຈະສາມາດນໍາພາ-ຊີ້ນໍາວຽກງານມີການເຕີບໃຫຍ່ຂະຫຍາຍຕົວດີຂຶ້ນໄປເລື້ອຍໆ, ທັງນີ້ບັນດາສະຫາຍການນໍາ, ສະມາຊິກພັກ ແລະ ພະນັກງານຂໍໃຫ້ມີຄວາມເປັນເອກະພາບ, ມີຄວາມສາມັກຄີເປັນປຶກແຜ່ນພ້ອມກັນປະຕິບັດຕາມແນວທາງຂອງພັກ-ລັດວາງອອກໃນແຕ່ລະໄລຍະໃຫ້ມີຜົນສໍາເລັດຕາມລະດັບຄາດໝາຍ.

(ຂ່າວ-ພາບ: ອັດສະວິນ)