ກອງປະຊຸມຄັ້ງນີ້, ໄດ້ຮັບຟັງການຜ່ານຮ່າງບົດລາຍງານການເມືອງ ທັງສອງພາກ ເພື່ອຕີລາຄາຜົນການຈັດຕັ້ງປະຕິບັດວຽກງານໃນ 5 ປີຜ່ານມາ ແລະ ພາກທິດທາງແຜນການ 2025-2029, ພ້ອມທັງຮ່າງແຜນພັດທະນາເສດຖະກິດ-ສັງຄົມ 5 ປີ ແລະ ແຜນວຽກຈຸດສຸມຕໍ່ໜ້າ ຊຶ່ງໄດ້ຕີລາຄາໃຫ້ເຫັນຜົນງານໃນຫຼາຍດ້ານ ຕະຫຼອດເຖິງດ້ານດີ, ດ້ານຄົງຄ້າງ ພ້ອມທັງບົດຮຽນທີ່ຖອດຖອນໄດ້.
ຜ່ານການປ່ອນບັດຄັດເລືອກ ແລະ ຜົນການດໍາເນີນກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາຄະນະບໍລິຫານງານພັກເມືອງຫີນບູນສະໄໝທີ XIII ມີຈຳນວນ 27 ສະຫາຍ ຍິງ 3 ສະຫາຍ. ເລືອກຕັ້ງເອົາຄະນະປະຈໍາພັກເມືອງ ຈໍານວນ 9 ສະຫາຍ ຍິງ 1 ສະຫາຍ ແລະ ໄດ້ຕົກລົງເຫັນດີໃຫ້ ສະຫາຍ ຄຳສິງ ອໍລະວັນ ເປັນເລຂາຄະນະບໍລິຫານພັກເມືອງ, ສະຫາຍ ກອນແກ້ວ ເພັດບົວພາ ແລະ ສະຫາຍ ນິກອນ ຄຸດມະນີ ເປັນຮອງເລຂາຄະນະບໍລິຫານງານພັກເມືອງອີກ 1 ສະໄໝ, ພ້ອມນີ້ກອງປະຊຸມໃຫຍ່ໄດ້ປ່ອນບັດເລືອກເອົາຜູ້ແທນສົມບູນ ໄປຮ່ວມກອງປະຊຸມໃຫຍ່ຜູ້ແທນອົງຄະນະພັກແຂວງ ສະໄໝທີ XI ຈໍານວນ 21 ສະຫາຍ ຍິງ 1 ສະຫາຍ ຜູ້ແທນສໍາຮອງ 3 ສະຫາຍ.
ສະຫາຍ ວັນໄຊ ພອງສະຫວັນ ໄດ້ເນັ້ນໜັກໃຫ້ບັນດາສະຫາຍໃນຄະນະບໍລິຫານງານພັກເມືອງຊຸດໃໝ່ ຈົ່ງໄດ້ມີຄວາມສາມັກຄີພາຍໃນຢ່າງໜັກແໜ້ນ ເພື່ອເຮັດສໍາເລັດໜ້າທີ່ຄວາມຮັບຜິດຊອບ ທີ່ພັກ-ລັດມອບໝາຍໃຫ້ ຢ່າງມີປະສິດທິຜົນ, ສືບຕໍ່ເຜີຍແຜ່ໂຄສະນາແນວທາງນະໂຍບາຍຂອງພັກ-ລັດ ເພື່ອຍົກສູງນໍ້າໃຈຮັກຊາດຂອງປະຊາຊົນບັນດາເຜົ່າ, ເພີ່ມທະວີໃນວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນທົ່ວສັງຄົມ, ຂຸດຄົ້ນທຸກທ່າແຮງບົ່ມຊ້ອນເພື່ອພັດທະນາເສດຖະກິດ, ຍົກລະດັບຊີວິດການເປັນຢູ່ຂອງປະຊາຊົນ, ສົ່ງເສີມດ້ານການປູກ-ການລ້ຽງ ໃຫ້ກາຍເປັນສິນຄ້າ, ພ້ອມນັ້ນ ກໍຕ້ອງສົ່ງເສີມຜະລິດຕະພັນທີ່ເປັນສີໄມ້ລາຍມືຂອງປະຊາຊົນ ເອົາໃຈໃສ່ໃນການພັດທະນາບັນດາພື້ນຖານໂຄງລ່າງ ໃຫ້ໄດ້ຮັບການພັດທະນາຢ່າງຕໍ່ເນື່ອງ, ໄປຄຽງຄູ່ກັບການພັດທະນາ ໃນດ້ານຂົງເຂດວັດທະນະທໍາ-ສັງຄົມ, ວຽກງານອົງການຈັດຕັ້ງມະຫາຊົນ, ຕະຫຼອດຮອດວຽກງານການກໍ່ສ້າງ ແລະ ຂະຫຍາຍພັກ, ວຽກງານຄຸ້ມຄອງພະນັກງານ.
(ຂ່າວ: ມະນີວັນ)
ຄໍາເຫັນ