 |
ໃນວາລະດຳເນີນກອງປະຊຸມ, ຜູ້ແທນກອງປະຊຸມສົມບູນ ໄດ້ພ້ອມກັນໃຊ້ສິດປະຊາທິປະໄຕປ່ອນບັດຄັດເລືອກເອົາຄະນະບໍລິຫານງານພັກແຂວງ ຜົ້ງສາລີຊຸດໃໝ່, ບົນພື້ນຖານການໃຊ້ສິດປະຊາທິປະໄຕ, ທັງຖືກຕ້ອງສອດຄ່ອງກັບມາດຖານ-ເງື່ອນໄຂທີ່ກຳນົດໄວ້, ຊຶ່ງມີຜູ້ອອກສະໝັກຮັບເລືອກຕັ້ງຈໍານວນ 40 ສະຫາຍ, ຍິງ 3 ສະຫາຍ ແລະ ເລືອກໄດ້ 35 ສະຫາຍ ຍິງ 3 ສະຫາຍ.
 |
ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກແຂວງຊຸດທີ XII ໄດ້ເລືອກຕັ້ງເອົາຄະນະປະຈໍາພັກແຂວງ 11 ສະຫາຍ, ພ້ອມນັ້ນໄດ້ເປັນເອກະສັນຢ່າງສົມບູນ ເລືອກເອົາເລຂາ, ຮອງເລຂາພັກແຂວງ ແລະ ເລືອກຕັ້ງເອົາປະທານ-ຮອງປະທານກວດກາພັກຄື: ເລືອກເອົາສະຫາຍ ພົນຕີ ສົມພອນ ມິດຕະພອນ ເປັນເລຂາຄະນະບໍລິຫານງານພັກແຂວງ, ສະຫາຍ ສັນຕິ ແກ້ວຍະສານ ແລະ ສະຫາຍ ບຸນທະວີ ສໍສຸກັນ ເປັນຮອງເລຂາ, ສະຫາຍ ວັນໄຊ ສຸກສັນ ເປັນປະທານກວດກາພັກແຂວງ, ສະຫາຍ ໂລ ອາຢີງ, ສະຫາຍ ຄໍາແດງ ອິນດາວົງ ແລະ ສະຫາຍ ບຸນນໍາ ພົມມະເກດ ເປັນຮອງປະທານກວດກາພັກແຂວງ, ເລືອກຕັ້ງຜູ້ແທນສົມບູນ 22 ສະຫາຍ ແລະ ສໍາຮອງ 4 ສະຫາຍ ໄປຮ່ວມກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກ.
 |
ບັນດາສະຫາຍຄະນະບໍລິຫານງານພັກແຂວງ ທີ່ໄດ້ຮັບການເລືອກຕັ້ງຄັ້ງນີ້, ລ້ວນແຕ່ແມ່ນບຸກຄົນທີ່ມີຄວາມຮູ້, ຄວາມສາມາດ, ມີລະດັບທິດສະດີ, ການສຶກສາສາມັນ, ມີລະດັບວິຊາສະເພາະ, ມີປະສົບການ, ເປັນຜູ້ມີບົດບາດ ແລະ ເປັນຕົວແທນໃຫ້ແກ່ສະມາຊິກພັກໃນແຕ່ລະຂົງເຂດວຽກງານ, ທັງໄດ້ຮັບການຝຶກຝົນຫຼໍ່ຫຼອມ ແລະ ທົດສອບຈາກຂະບວນການຕົວຈິງ.
(ພາບ-ຂ່າວ: ແສງຄຳ ສາລີວັນ)
ຄໍາເຫັນ