ສາລະວັນ ຈັດກອງປະຊຸມຄົບຄະນະບໍລິຫານງານພັກແຂວງ ເປີດກວ້າງ ຄັ້ງທີ 13 ສະໄໝທີ IX

ກອງປະຊຸມຄົບຄະນະບໍລິຫານງານພັກແຂວງສາລະວັນ ເປີດກວ້າງ ຄັ້ງທີ 13 ສະໄໝທີ IX ໄດ້ເປີດຂຶ້ນໃນວັນທີ 9 ມັງກອນ ນີ້ ທີ່ແຂວງສາລະວັນ, ພາຍໃຕ້ການເປັນປະທານຂອງ ສະຫາຍ ດາວວົງ ພອນແກ້ວ ກໍາມະການສູນກາງພັກເລຂາພັກແຂວງເຈົ້າແຂວງສາລະວັນ, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການພັກແຂວງ, ເລຂາພັກເມືອງ ຄະນະພັກຮາກຖານ ແລະ ພາກສ່ວນກ່ຽວຂ້ອງເຂົ້າຮ່ວມ.
ສະຫາຍ ດາວວົງ ພອນແກ້ວ  ກ່າວວ່າ: ໃນ 1 ປີຜ່ານມາ, ສະພາບການທົ່ວແຂວງ ພົບກັບຄວາມຫຍຸ້ງຍາກ ອັນເປັນຜົນມາຈາກສະພາບພາກພື້ນ ແລະສາກົນ ຍັງສືບຕໍ່ຜັນແປໄປຢ່າງໄວວາ ແຕ່ເຖິງຢ່າງໃດກໍຕາມ ຄະນະບໍລິຫານງານພັກແຂວງ ໄດ້ພ້ອມກັນເອົາໃຈໃສ່ ນໍາພາ - ຊີ້ນໍາຄະນະພັກແຕ່ລະຂັ້ນ ຈົນສາມາດເຮັດໃຫ້ຫຼາຍວຽກມີຜົນສຳເລັດ ແລະພົ້ນເດັ່ນ ເປັນຕົ້ນທົ່ວແຂວງສືບຕໍ່ມີຄວາມສະຫງົບໂດຍພື້ນຖານ, ສັງຄົມມີຄວາມສະຫງົບປອດໄພ. ການຈັດເກັບລາຍຮັບເຂົ້າງົບປະມານ ເຫັນວ່າແຕ່ລະເມືອງ ແລະພະແນກການ ສາມາດປະຕິບັດໄດ້ເກີນແຜນ; ການຜະລິດກະສິກໍາເຫັນວ່າເປັນຂະບວນກວ້າງຂວາງ, ການສົ່ງເສີມການລົງທຶນພາຍໃນ ແລະຕ່າງປະເທດ ມີບັນຍາກາດດີ ຊຶ່ງມີນັກລົງທຶນໃຫ້ຄວາມສົນໃຈຫຼາຍ; ການພົວພັນຮ່ວມມືກັບບັນດາແຂວງ ປະເທດເພື່ອນມິດຍຸດທະສາດ ເຫັນວ່າມີບັນຍາກາດດີ ເພື່ອເປັນການກະກຽມຍົກລະດັບ ດ່ານທ້ອງຖິ່ນຢາກຕາພານ ເມືອງລະຄອນເພັງ ແລະດ່ານໂກຕ່າຍ ເມືອງສະໝ້ວຍ ຂຶ້ນເປັນດ່ານສາກົນກໍມີຄວາມຄືບໜ້າສົມຄວນ ຊຶ່ງເປັນທ່າແຮງຕົ້ນຕໍ ແລະໂອກາດທີ່ດີໃຫ້ແຂວງສາລະວັນ ທີ່ຈະໄດ້ຮັບການພັດທະນາດີຂຶ້ນ; ກົງຈັກການຈັດຕັ້ງຂອງຫຼາຍຂະແໜງການນັບທັງຂັ້ນແຂວງ ແລະຂັ້ນເມືອງ ກໍໄດ້ຮັບການປັບປຸງ, ພ້ອມກັນນັ້ນ ກໍໄດ້ຫັນພະນັກງານສືບທອດປ່ຽນແທນ ລົງກໍ່ສ້າງຮາກຖານການເມືອງ ແລະເຂດຈຸດສຸມຕ່າງໆໃຫ້ມີຄວາມເຂັ້ມແຂງ, ຈາກນັ້ນ ຍັງໄດ້ຈັດຕັ້ງເຜີຍແຜ່, ເຊື່ອມຊຶມ ແລະ ເອກະສານສຳຄັນຕ່າງໆຂອງພັກ ຂອງຊາດ.
ພ້ອມນັ້ນ, ຜູ້ເຂົ້າຮ່ວມກອງປະຊຸມຍັງໄດ້ຮັບຟັງການຜ່ານຮ່າງບົດສະຫຼຸບຕີລາຄາການນໍາພາຮອບດ້ານຂອງຄະນະບໍລິຫານງານພັກແຂວງ ປະຈຳປີ 2023 ແລະ ທິດທາງແຜນການ ປີ 2024; ບົດລາຍງານການທົບທວນການແກ້ໄຂກໍລະນີລວມ ແລະບຸກຄົນ ຕາມຜົນກອງປະຊຸມກາງສະໄໝ ຂອງຄະນະບໍລິຫານງານພັກແຂວງ ສະໄໝທີ IX; ຮ່າງແຜນຄາດຄະເນດໍາເນີນກອງປະຊຸມໃຫຍ່ຂອງໜ່ວຍພັກ, ຄະນະພັກຮາກຖານ, ອົງຄະນະພັກເມືອງ ແລະ ແຜນດຳເນີນກອງປະຊຸມໃຫຍ່ 3 ຂຶ້ນຂອງພັກ; ບົດລາຍງານ ກ່ຽວກັບທິດທາງ, ການແກ້ໄຂສະພາບການຂາດແຄນຄູ ຕິດພັນກັບການປະລະການຮຽນຂອງນັກຮຽນພາຍໃນແຂວງ ແລະຕົວຊີ້ວັດໃນຂົງເຂດສຶກສາທີ່ຍັງບໍ່ທັນບັນລຸ; ຄົ້ນຄວ້າ ປະກອບຄໍາເຫັນ ກ່ຽວກັບບົດລາຍງານການກະກຽມຄວາມພ້ອມປະກາດແຂວງສາລະວັນ ເປັນແຂວງ ຢຸດຕິການຖ່າຍຊະຊາຍ. ພ້ອມທັງໄດ້ຮ່ວມກັນຄົ້ນຄວ້າປຶກສາຫາລື ແລະປະກອບຄຳເຫັນໃສ່ຮ່າງວຽກງານດັ່ງກ່າວ ໃຫ້ມີເນື້ອໃນຄົບຖ້ວນ ສົມບູນສອດຄ່ອງກັບສະພາບຄວາມເປັນຈິງ.
ຂ່າວ-ພາບ: ລັດຕະນາ ແສງສຸວັນ