ມີບັນດາສະຫາຍຮອງເລຂາພັກແຂວງ, ຄະນະປະຈຳພັກແຂວງ, ເລຂາພັກເມຶອງ, ບັນດາສະຫາຍເລຂາຄະນະພັກຮາກຖານ, ເລຂາໜ່ວຍພັກຮາກຖານເຂົ້າຮ່ວມ.
ສະຫາຍ ດາວວົງ ພອນແກ້ວ ໄດ້ກ່າວໄຂກອງປະຊຸມວ່າ: ກອງປະຊຸມຄົບຄະນະບໍລິຫານງານເປີດກວ້າງ ຄັ້ງທີ 18 ສະໄໝທີ IX ເທື່ອນີ້ ຊຶ່ງເປັນກອງປະຊຸມທີ່ມີຄວາມໝາຍຄວາມສຳຄັນຫຼາຍ ເພາະຈະໄດ້ພ້ອມກັນຮັບຟັງການລາຍງານ, ການຄົ້ນຄວ້າປຶກສາຫາລື, ປະກອບຄຳເຫັນ ແລະ ຈະໄດ້ຮັບຟັງການເຜີຍແຜ່ຜົນສຳເລັດກອງປະຊຸມວິສາມັນຄົບຄະນະບໍລິຫານງານສູນກາງພັກ ສະໄໝທີ 11, ຮັບຟັງການຜ່ານຮ່າງບົດຕີລາຄາການນຳພາຮອບດ້ານ ຂອງຄະນະບໍລິຫານງານພັກແຂວງ ໄລຍະ 3 ເດືອນຕົ້ນປີ, ທິດທາງ 9 ເດືອນທ້າຍປີ 2025 ແລະ ທົບທວນຄືນ ການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 17 ສະໄໝທີ IX, ຮັບຟັງການລາຍງານກ່ຽວກັບການສະຫຼຸບ-ຖອດຖອນບົດຮຽນ ຈາກການດໍາເນີນກອງປະຊຸມໃຫຍ່ອົງຄະນະພັກ 8 ເມືອງ ແລະ ການຜັນຂະຫຍາຍມະຕິຂອງຄະນະບໍລິຫານງານສູນກາງພັກເລກທີ 03/ຄລສພ, ລົງວັນທີ 12 ມີນາ 2025 ວ່າດ້ວຍການປັບປຸງກົງຈັກການຈັດຕັ້ງ, ຈະໄດ້ຮັບຟັງການລາຍງານກ່ຽວກັບ ຄວາມຄືບໜ້າຂອງກະກຽມ ແລະ ດຳເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ຈາກບັນດາອະນຸກຳມະການຕ່າງໆ, ຈະໄດ້ຮັບຟັງການລາຍງານໂດຍຫຍໍ້ ກ່ຽວກັບການຈັດວາງໂຄງປະກອບ, ແຜນດຳເນີນງານຂອງຄະນະບໍລິຫານງານພັກເມືອງ ຈາກສະຫາຍການນຳຂອງແຕ່ລະເມືອງ ແລະ ຈະໄດ້ຮັບຟັງການລາຍງານ ແລະ ຄົ້ນຄວ້າປຶກສາຫາລືກ່ຽວກັບການສ້າງຕາແສງ. ພ້ອມນັ້ນ ຍັງໄດ້ຮຽກຮ້ອງມາຍັງບັນດາສະຫາຍ ຈົ່ງເຊີດຊູຄວາມ ຮັບຜິດຊອບຂອງຕົນ ເຂົ້າໃນການຄົ້ນຄວ້າ ໃຫ້ທັດສະນະທີ່ເປັນທາງອອກ ແລະ ວິທີແກ້ໄຂບັນຫາ ສິ່ງອຸດຕັນທັງຫຼາຍທີ່ປະເຊີນຢູ່ໃຫ້ດີຂຶ້ນ.
ສະຫາຍ ປະເດີມພອນ ສົນທະນີ ຮອງເລຂາພັກແຂວງ ຮອງເຈົ້າແຂວງ ໄດ້ຜ່ານຮ່າງຕີລາຄາການນຳພາຮອບດ້ານຂອງຄະນະບໍລິຫານງານພັກແຂວງສາລະວັນ ໄລຍະ 3 ເດືອນ ຕົ້ນປີ, ທົ່ວແຂວງ ແມ່ນມີຄວາມສະຫງົບ ເປັນລະບຽບຮຽບຮ້ອຍດີ, ສາມາດສະກັດກັ້ນ ແລະ ແກ້ໄຂປະກົດການຫຍໍ້ທໍ້ທີ່ເກີດຂຶ້ນໃນສັງຄົມໄດ້ເປັນຢ່າງດີ, ວຽກງານເສດຖະກິດ ເຫັນວ່າການຂະຫຍາຍຕົວຢ່າງຕໍ່ເນື່ອງໃນຈັ່ງຫວະທີ່ດີ ໂດຍໄດ້ສຸມໃສ່ພັດທະນາເສດຖະກິດຂອງແຂວງໃຫ້ເຂັ້ມແຂງຕາມທິດເສດຖະກິດເອກກະລາດ ເປັນເຈົ້າຕົນເອງໄລຍະໃໝ່, ດຶງດູດ-ຍາດແຍ່ງການລົງທຶນພາຍໃນ ແລະ ຕ່າງປະເທດ, ເອົາໃຈໃສ່ຢ່າງແຂງແຮງໃນການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ຊຸກຍູ້ການບົວລະບັດຮັກສາເຂົ້ານາແຊງ ແຜນການຜະລິດ 14,000 ເຮັກຕາ ປະຕິບັດໄດ້ 13,586 ເຮັກຕາ ເທົ່າກັບ 97% ຂອງແຜນການ ທຽບໃສ່ປີຜ່ານມາຫຼຸດລົງ 1.4%, ພືດສະບຽງອາຫານ ປະຕິບັດໄດ້ 8,685 ໂຕນ ເທົ່າກັບ 92% ຂອງແຜນການປີ ທຽບໃສ່ປີຜ່ານມາ ເພີ່ມຂຶ້ນ 55% ປັດຈຸບັນ ເກັບກູ້ແລ້ວ 3,652 ເຮັກຕາ, ເອົາໃຈໃສ່ໃນການຄຸ້ມຄອງລາຄາສິນຄ້າໃນທ້ອງຕະຫຼາດ, ຕິດຕາມການສະໜອງນໍ້າມັນເຊື້ອໄຟຢ່າງເປັນປົກກະຕິ, ປະຕິບັດການສົ່ງອອກສິນຄ້າໄດ້ທັງໝົດ ມູນຄ່າ 657 ຕື້ກກີບ ເທົ່າກັບ 18%, ໄດ້ຈັຕັ້ງປະຕິບັດການຮຽນ-ການສອນ ຮັບປະກັນໄດ້ 3 ລັກສະນະ, 5 ຫຼັກມູນຂອງການສຶກສາພາກລັດ ແລະ ເອກກະຊົນ, ຕິດຕາມປິ່ນປົວພະຍາດ, ຍົກລະດັບຄວາມຮູ້ໃຫ້ແພດໝໍ, ສະໜອງຢາປິ່ນປົວພະຍາດຢ່າງພຽງພໍ, ເອົາໃຈໃສ່ປັບປຸງສັນຍານວິທະຍຸກະຈາຍສຽງ, ຍົກລະດັບຄວາມສາມາດໃຫ້ພະນັກງານຜູ້ທີ່ເຮັດວຽກກ່ຽວກັບການຜະລິດຂ່າວ ແລະ ບັນດາວຽກວານອື່ນໆ ກໍໄດ້ເອົາເອົາໃຈໃສ່ໃຫ້ມີຜົນສຳເລັດ.
(ພາບ-ຂ່າວ: ທິດລານີ ໂຄດໂຍທາ)
ຄໍາເຫັນ