ສາລະວັນ ເຜີຍແຜ່ຜົນກອງປະຊຸມຄົບຄະນະບໍລິຫານງານກາງສະໄໝຂອງສູນກາງພັກ

ວັນທີ 19 ຕຸລາ ນີ້, ແຂວງສາລະວັນ ໄດ້ຈັດພິທີເຜີຍແຜ່ເຊື່ອມຊຶມ ແລະ ຜັນຂະຫຍາຍຜົນສຳເລັດກອງປະຊຸມຄົບຄະນະກາງສະໄໝຂອງສູນກາງພັກ ສະໄໝທີ XI ແລະ ເຜີຍແຜ່ເຊື່ອມຊຶມເອກະສານກະກຽມດໍາເນີນກອງປະຊຸມໃຫຍ່ 3 ຂັ້ນຂອງພັກໃນທົ່ວແຂວງ ທີ່ສະໂມສອນແຂວງ, ໂດຍການເຂົ້າຮ່ວມເປັນປະທານຂອງ ສະຫາຍ ດາວວົງ ພອນແກ້ວ ກຳມະການສູນກາງພັກ ເລຂາພັກແຂວງ ເຈົ້າແຂວງສາລະວັນ, ມີຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ເລຂາຄະນະພັກຮາກຖານ, ໜ່ວຍພັກຮາກຖານອ້ອມຂ້າງເຂົ້າຮ່ວມ.
ສະຫາຍ ດາວວົງ ພອນແກ້ວ ໄດ້ກ່າວວ່າ: ເພື່ອຈັດຕັ້ງເຜີຍແຜ່, ເຊື່ອມຊຶມ ແລະ ຜັນຂະຫຍາຍຜົນສຳເລັດກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກສະໄໝທີ XI ແລະເຜີຍແຜ່ເຊື່ອມຊຶມເອກະສານກະກຽມດຳເນີນກອງປະຊຸມໃຫຍ່ 3 ຂັ້ນຂອງພັກໃນທົ່ວແຂວງ ກໍເພື່ອເຮັດໃຫ້ຄະນະພັກທຸກຂັ້ນ, ພະນັກງານຫຼັກແຫຼ່ງ ແລະ ສະມາຊິກພັກ-ພະນັກງານ ໄດ້ຮັບຮູ້ ແລະ ເຂົ້າໃຈ, ເຊື່ອມຊຶມ, ກຳແໜ້ນຢ່າງເລິກເຊິ່ງ ແລະ ສາມາດນຳໄປຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງໃນຂອບເຂດຄວາມຮັບຜິດຊອບຂອງຄະນະພັກແຕ່ລະຂັ້ນຢ່າງເລິກເຊິ່ງ ແລະ ກວ້າງຂວາງ ທັງນີ້ກໍເພື່ອກະກຽມໃຫ້ແກ່ການດຳເນີນກອງປະຊຸມໃຫຍ່ 3 ຂັ້ນຂອງພັກທີ່ຈະໄດ້ດຳເນີນໃນມໍ່ໆນີ້.  ພ້ອມນັ້ນ ສະຫາຍ ດາວວົງ ພອນແກ້ວ ກໍໄດ້ເຜີຍແຜ່ມະຕິກອງປະຊຸມຄົບຄະນະກາງສະໄໝ ຄັ້ງທີ XI ໄດ້ຍົກໃຫ້ເຫັນເນື້ອໃນບາງຕອນທີ່ສຳຄັນວ່າ:  ກອງປະຊຸມໄດ້ຄົ້ນຄວ້າ ປຶກສາຫາລືບັນຫາສຳຄັນເປັນຕົ້ນ, ຕີລາຄາການຊີ້ນຳໆພາການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XI ຂອງພັກ ໄລຍະເຄິ່ງສະໄໝ, ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໄລຍະເຄິ່ງສະໄໝ ຕິດພັນກັບການປະຕິບັດສອງວາລະແຫ່ງຊາດ, ຮ່າງມະຕິວ່າດ້ວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແຜງໃໝ່ສູ່ລວງເລິກ, ສ້າງ ການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານໃນການນຳພາຂອງພັກ, ດຳເນີນຊີວິດການເມືອງພາຍໃນຄະນະບໍລິຫານງານສູນກາງພັກໄລຍະເຄິ່ງສະໄໝ. ກອງປະຊຸມໄດ້ເປັນເອກະພາບທາງດ້ານແນວທາງການເມືອງ ແລະ ແນວທາງການຈັດຕັ້ງທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກຢ່າງຖືກຕ້ອງ, ສອດຄ່ອງ, ປະຊາຊົນລາວບັນດາເຜົ່າລ້ວນແຕ່ໃຫ້ການສະໜັບສະໜູນ, ເພື່ອນມິດຍຸດທະສາດ-ເພື່ອນມິດສາກົນສືບຕໍ່ໃຫ້ຄວາມເຊື່ອໝັ້ນ ແລະ ສະໜັບສະໜູນຕໍ່ເນື່ອງ, ພາຍໃຕ້ການຊີ້ນຳ-ນຳພາຂອງພັກ-ລັດ ໄດ້ສ້າງພື້ນຖານສຳຄັນ ເຮັດໃຫ້ປະເທດຊາດ ສືບຕໍ່ມີສະຖຽນລະພາບທາງດ້ານການເມືອງໜັກ     ແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ພ້ອມນັ້ນ ກໍໄດ້ຕີລາຄາຢ່າງກົງໄປກົງມາຕໍ່ຈຸດອ່ອນ-ດ້ານຄົງຄ້າງ ເປັນຕົ້ນການແກ້ໄຂບັນຫາຄວາມຫຍຸ້ງຍາກເສດຖະກິດ-ການເງິນ, ການຈັດຕັ້ງປະຕິບັດວາລະແຫ່ງຊາດ, ການຫັນທ່າແຮງ ແລະ ຄວາມສາມາດບົ່ມຊ້ອນໃຫ້ເປັນຂະແໜງເສດຖະກິດປາຍແຫຼມ, ການພັດທະນາພື້ນຖານໂຄງລ່າງເສດຖະກິດ-ສັງຄົມ ໂດຍສະເພາະຢູ່ເຂດຊົນລະບົດ. ສ້າງການຫັນປ່ຽນທີ່ແຂງແຮງເລິກເຊິ່ງ ສ້າງເງື່ອນໄຂທີ່ອຳນວຍຄວາມສະດວກ ແລະ ມີທາງອອກເພື່ອແກ້ໄຂ ແລະ ຜ່ານຜ່າຄວາມຫຍຸ້ງຍາກ, ສ້າງທ່ວງທ່າໃໝ່ທີ່ໜັກແໜ້ນ, ເຂັ້ມແຂງ ໃນການຊຸກຍູ້ພັດທະນາໃຫ້ແຂງແຮງກວ່າເກົ່າໃນຊຸມປີຕໍ່ໄປ. 
ຈາກນັ້ນ, ຜູ້ເຂົ້າຮ່ວມກໍໄດ້ຮັບຟັງການເຜີຍແຜ່ເຊື່ອມຊຶມຄຳສັ່ງແນະນຳຂອງຄະນະເລຂາທິການສູນກາງພັກ ວ່າດ້ວຍການຈັດຕັ້ງຜັນຂະຫຍາຍກອງປະຊຸມຄົບຄະນະກາງສະໄໝຂອງຄະນະບໍລິຫານງານສູນກາງພັກ ສະໄໝທີ XI, ບົດຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ຂອງຄະນະບໍລິຫານງານສູນກາງພັກໄລຍະກາງສະໄໝ, ການສະຫຼຸບການຈັດຕັ້ງປະຕິບັດກາງສະໄໝແຜນພັດທະນາເສດຖະກິດ -ສັງຄົມ ແຫ່ງຊາດ 5 ປີ ຄັ້ງທີ XI (2021-2025) ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແລະ ທິດທາງທ້າຍສະໄໝ ຮອດປີ 2025, ບົດສຳຫຼວດການນຳພາລວມໄລຍະກາງສະໄໝຂອງຄະນະບໍລິຫານງານສູນກາງພັກ, ບົດຄຳເຫັນສະຫຼຸບເປີດກວ້າງຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ເຊື່ອມຊຶມມະຕິ 05/ຄບສພ ແລະ ແຜນດຳເນີນງານ ເລກທີ 432/ຄລສພ ວ່າດວຍສືບຕໍ່ຍູ້ແຮງການຜັນຂະຫຍາຍແນວທາງປ່ຽນແປງໃໝ່ສູ່ລວງເລິກ ແລະ ຮອບດ້ານໃນການນຳພາຂອງພັກ, ຄຳສັ່ງຂອງຄະນະເລຂາທິການສູນກາງພັກ ແລະ ຄຳສັ່ງແນະນຳຂອງຄະນະປະຈຳພັກແຂວງສາລະວັນ ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ ແລະ ເຜີຍແຜ່ເຊື່ອມຊຶມຄຳແນະນໍາຂອງຄະນະກວດກາສູນກາງພັກ ເລກທີ 285/ຄກສພ ວ່າດ້ວຍກການກະກຽມ ແລະ ດຳເນີນຊີວິດການເມືອງທ້າຍສະໄໝ ກອງປະຊຸມ 3 ຂັ້ນຂອງພັກ. 
(ຂ່າວ-ພາບ: ທິດລານີ ໂຄດໂຍທາ)