ສາລະວັນເປັນເຈົ້າພາບຈັດງານພົບປະຊາວໜຸ່ມ ຄັ້ງທີ XII ແລະ ຕັ້ງຄ້າຍເຍົາວະຊົນ ທັນວາ ຄັ້ງທີ VI

ວັນທີ 13 ທັນວານີ້ ທີ່ສະໂມສອນແຂວງ ແຂວງສາລະວັນ ໄດ້ມີພິທີຈັດງານພົບປະຊາວໜຸ່ມ ຄັ້ງທີ XII ແລະ ຕັ້ງຄ້າຍເຍົາວະຊົນ ທັນວາ ຄັ້ງທີ VI, 4 ແຂວງພາກໃຕ້ ຊຶ່ງແຂວງສາລະວັນເປັນເຈົ້າພາບ ໂດຍການເປັນກຽດເຂົ້າຮ່ວມໂດຍ ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງຫົວໜ້າຄະນະໂຄສະນາອົບຮົມແຂວງ, ທ່ານ ນວນທອງ ສຸວັນມີໄຊ ຮອງເລຂາຄະນະບໍລິຫານງານຊາວໜຸ່ມ ສູນກາງປະຊາຊົນປະຕິວັດລາວ, ທ່ານ ສຸວຽງທອງ ສຸຂະວົງ ຮັກສາການເລຂາຄະນະບໍລິຫານງານຊາວໜຸ່ມແຂວງສາລະວັນ ພ້ອມດ້ວຍຄະນະບໍລິຫານງານຊາວໜຸ່ມແຂວງ, ເມືອງ, ເລຂາຮາກຖານຊາວໜຸ່ມ, ມີບັນດາສະມາຊິກຊາວໜຸ່ມ, ເຍົາວະຊົນ ມາຈາກ 4 ແຂວງພາກໃຕ້ ກໍຄື: ນະຄອນປາກເຊ ແຂວງຈຳປາສັກ, ແຂວງເຊກອງ ແລະ ແຂວງອັດຕະປືເຂົ້າຮ່ວມ.
ທ່ານ ຈັນສະໝອນ ພົມມະແສງ ໄດ້ກ່າວເປີດງານວ່າ: ເພື່ອປະຕິບັດຕາມເນື້ອໃນບົດບັນທຶກຊ່ວຍຈຳງານພົບປະຊາວໜຸ່ມ 4 ແຂວງພາກໃຕ້ ຄັ້ງທີ XI ແລະ ຕັ້ງຄ້າຍເຍົາວະຊົນທັນວາ 4 ແຂວງພາກໃຕ້ ຄັ້ງທີ V ທີ່ແຂວງຈຳປາສັກ ເປັນເຈົ້າພາບ ໄດ້ເຫັນດີເປັນເອກະພາບມອບໃຫ້ຄະນະບໍລິຫານງານຊາວໜຸ່ມແຂວງສາລະວັນ ເປັນເຈົ້າພາບໃນການຈັດງານຕາມຮອບວຽນ. ງານພົບປະຊາວໜຸ່ມ 4 ແຂວງພາກໃຕ້ໃນຄັ້ງນີ້ ໄດ້ດໍາເນີນທ່າມກາງບັນຍາກາດທີ່ທົ່ວພັກທົ່ວກອງທັບ ແລະປວງຊົນລາວທັງຊາດ ກໍຄືຊາວແຂວງສາລະວັນ ພວມອອກແຮງແຂ່ງຂັນສ້າງຜົນງານ ສ້າງຂະບວນການຂ່ຳນັບຮັບຕ້ອນວັນສະຖາປະນາສາທາລະນະລັດປະຊາທິປະໄຕ ປະຊາຊົນລາວ ຄົບຮອບ 48 ປີ, ວັນເກີດຂອງ ປະທານໄກສອນ ພົມວິຫານ ຜູ້ນຳທີ່ແສນເຄົາລົບຮັກ ຄົບຮອບ 103 ປີ, ວັນສ້າງຕັ້ງ ກອງເຍົາວະຊົນທັນວາ ຄົບຮອບ 68 ປີ ຕິດພັນກັບການຈັດຕັ້ງປະຕິບັດມະຕິ XI ຂອງສູນກາງພັກ ກໍຄືມະຕິ IX ຂອງອົງຄະນະພັກແຂວງສາລະວັນ ຢ່າງເປັນຂະບວນການຟົດຟື້ນ. ງານດັ່ງກ່າວຖືເປັນການຫວນຄືນເຖິງອົງການຈັດຕັ້ງຊາວໜຸ່ມ-ເຍົາວະຊົນທັນວາ ແມ່ນອົງການຈັດຕັ້ງມະຫາຊົນໜຶ່ງຂອງພັກ,ເປັນອົງການຈັດຕັ້ງສູງສຸດຂອງຊາວໜຸ່ມລາວບັນດາເຜົ່າ ແຫ່ງສປປ ລາວ ຊຶ່ງມີໜ້າທີ່ເຕົ້າໂຮມກ້ອນກຳລັງແຮງ, ຄວາມສາມັກຄີຂອງຊາວໜຸ່ມ-ໄວ ໜຸ່ມ-ຫຼານນ້ອຍເຍົາວະຊົນ - ອະນຸຊົນ ເຂົ້າສູ່ອົງການຈັດຕັ້ງເພື່ອຝຶກຝົນຫຼໍ່ຫຼອມໃຫ້ກາຍເປັນກຳລັງທີ່ປະເສີດຂອງປະເທດຊາດກາຍເປັນກຳລັງສືບທອດເສີມຂະຫຍາຍມູນເຊື້ອອັນດີງາມ,ປະກອບສ່ວນສະຕິປັນຍາເຫື່ອແຮງຂອງຕົນເຂົ້າໃນພາລະກິດປົກປັກຮັກສາ ແລະສ້າງສາປະເທດຊາດ, ພັດທະນາຕົນເອງ ໃຫ້ກາຍເປັນລູກຮັກຫຼານແພງຂອງພໍ່ແມ່ ເປັນນັກຮຽນທີ່ດີຂອງຄູ-ອາຈານ ເປັນຊາວໜຸ່ມທີ່ ດີໃນອະນາຄົດ ກາຍເປັນຜູ້ສືບທອດທີ່ດີຂອງພັກ - ຂອງລັດ ເປັນພົນລະເມືອງດີຂອງປະເທດຊາດ ນໍາພາ ປະເທດຊາດຂື້ນສູ່ສັງຄົມນິຍົມ ຕາມອຸດົມການຂອງພັກທີ່ກຳນົດໄວ້.
ຫຼັງຈາກກ່າວເປີດພິທີ ກໍໄດ້ລັ່ນຄ້ອງ 9 ບາດ ເພື່ອຄວາມເປັນສິຣິມຸງຄຸນ ແລະຜູ້ເຂົ້າກໍໄດ້ຮັບຊົມການແຂ່ງຂັນ ການສະແດງແບບແຜນຂອງກອງເຍົາວະຊົນທັນວາ, ສິລະປະ-ວັນນະຄະດີ ແລະກິລາ. ກິດຈະກຳດັ່ງກ່າວ ເປັນການແລກປ່ຽນບົດຮຽນທີ່ມີຄຸນຄ່າເພື່ອຊອກຫາວິທີໃນການແກ້ໄຂ ສະກັດກັ້ນຕ້ານກັບປະກົດການຫຍໍ້ທໍ້ ຕ່າງໆຕໍ່ຊາວໜຸ່ມ-ເຍົາວະຊົນ ແລະ ທັງເປັນການພັດທະນາຊັບພະຍາກອນມະນຸດແຕ່ເຍົາໄວ, ສົ່ງເສີມໃຫ້ເຍົາວະຊົນມີຄວາມຮູ້, ຄວາມສາມາດ, ກ້າເຮັດ, ກ້າທຳ, ກ້າສະແດງອອກ ແລະກ້າປະດິດສ້າງ. 
ຂ່າວ-ພາບ: ລັດຕະນາ ແສງສຸວັນ