ວິທະຍຸກະຈາຍສຽງຫວຽດນາມລາຍງານວ່າ: ວັນທີ 10 ຕຸລາ ແມ່ນວັນສະເຫຼີມສະຫຼອງ 69 ປີແຫ່ງການປົດປ່ອຍນະຄອນຫຼວງຮ່າໂນ້ຍ (10/10/1954-10/10/2023). ກ່ອນໜ້ານີ້ 69 ປີ, ຊາວຮ່າໂນ້ຍນັບໝື່ນຄົນ ມີຄວາມປິຕິຊົມຊື່ນເມື່ອໄດ້ຕ້ອນຮັບກອງທະຫານກັບເມືອພ້ອມກັບໄຊຊະນະ, ປົດປ່ອຍນະຄອນຫຼວງ. ນີ້ແມ່ນເຫດການປະ ຫວັດສາດທີ່ມີຄວາມສຳຄັນຍິ່ງ, ສ້າງຂີດໝາຍແຫ່ງການສິ້ນສຸດການຕໍ່ສູ້ທີ່ເຕັມໄປດ້ວຍຄວາມຫຍຸ້ງຍາກລຳບາກ, ການເສຍສະຫຼະທີ່ມີຄວາມອົງອາດກ້າຫານຂອງ ປະຊາຊົນນະຄອນຫຼວງ ເວົ້າສະເພາະ ແລະ ປະເທດຊາດເວົ້າລວມ.
ຂ່າວລະບຸວ່າ: ໃນໂອກາດນີ້, ໜັງສືພິມ ຮ່າໂນ້ຍເມີຍ (ໃໝ່) ໄດ້ລົງບົດຂຽນ ດ້ວຍຫົວຂໍ້: “ສ້າງແຫຼ່ງກຳລັງໃໝ່ໃຫ້ແກ່ການພັດທະນານະຄອນຫຼວງ” ຊຶ່ງໄດ້ເນັ້ນໜັກວ່າ: ຮ່າໂນ້ຍ ພວມຢືນຢູ່ຕໍ່ໜ້າກາລະໂອກາດ ພັດທະນາໃໝ່. ຕາມບົດຂຽນແລ້ວ, ຮ່າໂນ້ຍ ໄດ້ເພີ່ມທະວີວຽກງານການວາງແຜນຜັງ ແລະ ສ້າງລະບອບລະບຽບການເພື່ອແນໃສ່ຫັນເປົ້າໝາຍກາຍເປັນນະຄອນ “ອະລິຍະທຳ - ສີວິໄລ - ທັນສະໄໝ” ໃຫ້ປະກົດຜົນເປັນຈິງ ຄືມະຕິເລກທີ 15 ຂອງກົມການເມືອງ (2022) ວາງອອກ.
ເນື່ອງໃນໂອກາດນີ້, ໃນວັນທີ 10 ຕຸລາ ຜ່ານມາ ຮ່າໂນ້ຍ ກໍໄດ້ຈັດຫຼາຍກິດຈະກຳສະເຫຼີມສະຫຼອງ ຢູ່ເມືອງແທັກເທິດ, ຄະນະຄຸ້ມຄອງໂຄງການລົງທຶນກໍ່ສ້າງກິດຈະກຳ ຮັບໃຊ້ປະຊາຊົນນະຄອນຮ່າໂນ້ຍ ກໍໄດ້ຈັດຕັ້ງພິທີເລີ່ມລົງມືກໍ່ສ້າງເສັ້ນທາງດ່ວນ ທັງລອງ, ເຊື່ອມຕໍ່ເສັ້ນທາງແຫ່ງຊາດເລກທີ 21 ກັບ ເສັ້ນທາງດ່ວນ ຮວາລາກ - ຮວາບິ່ງ. ໂຄງການແມ່ນເພື່ອແນໃສ່ປະຕິບັດບັນດາການວາງແຜງຜັງເຊື່ອມຕໍ່ຄົມມະນາຄົມທາງບົກຂອງປະເທດ ແລະ ນະຄອນຫຼວງ ຮ່າໂນ້ຍ.
ຄໍາເຫັນ