 |
ໂອກາດດັ່ງກ່າວ, ທ່ານ ບູລະພາ ສັນຕິຄົງຄາ ປະທານສະພາການຄ້າຊາວຈີນຕ່າງດ້າວ ປະຈໍາ ສປປ ລາວ, ທັງເປັນປະທານສະມາຄົມຈີນ ນະຄອນຫຼວງວຽງຈັນ ໄດ້ກ່າວວ່າ: ການຈັດງານສະເຫຼີມສະຫຼອງບຸນໄຫວ້ພະຈັນ ປະຈຳປີ 2026 ນີ້, ຈັດຂຶ້ນເນື່ອງໃນໂອກາດ ຄົບຮອບ 65 ປີ ແຫ່ງການສ້າງຕັ້ງສາຍພົວພັນທາງການທູດ ລາວ-ຈີນ ແລະ ປີມິດຕະພາບ ລາວ-ຈີນ. ຕະຫຼອດໄລຍະເວລາ 65 ປີ ທີ່ ສປປ ລາວ ແລະ ສປ ຈີນ ໄດ້ເຊື່ອມໂຍງກັນດ້ວຍພູຜາ ແລະ ແມ່ນໍ້າ, ມີວັດທະນະທໍາທີ່ຄ້າຍຄືກັນ ແລະ ມີສາຍພົວພັນທີ່ໃກ້ຊິດ ລະຫວ່າງປະຊາຊົນ. ມິດຕະພາບອັນຍາວນານຂອງສອງປະເທດໄດ້ຜ່ານການທົດສອບເວລາ ແລະ ການຮ່ວມມືຕົວຈິງຢ່າງເລິກເຊິ່ງຍິ່ງຂຶ້ນ. ເທສະການໄຫວ້ພະຈັນ ແມ່ນເທສະການແຫ່ງການເຕົ້າໂຮມຍາດຕິພີ່ນ້ອງຂອງປະຊາຊາດຈີນ, ດວງຈັນທີ່ສະຫວ່າງສະໄຫວ ເຮັດໃຫ້ຄິດຮອດບ້ານເກີດເມືອງນອນ ແລະ ໝູ່ເພື່ອນ, ງານລ້ຽງທີ່ເຊື່ອມໂຍງສາຍພົວພັນໃນຄອບຄົວ ແລະ ມິດຕະພາບ. ສໍາລັບຊາວຈີນຕ່າງດ້າວທີ່ອາໄສ, ດຳເນີນທຸລະກິດຢູ່ລາວມາເປັນເວລາດົນນານ, ຄືນທີ່ດວງຈັນເຕັມດວງເຮັດໃຫ້ພວກເຮົາຮູ້ສຶກເຖິງຄວາມໝາຍຂອງ "ບ້ານ". ເຖິງວ່າພວກເຮົາມາຈາກບ່ອນທີ່ແຕກຕ່າງກັນ ແລະ ເຮັດວຽກໃນອຸດສາຫະກຳທີ່ແຕກຕ່າງກັນ, ແຕ່ໃນດິນແດນລາວແຫ່ງນີ້, ພວກເຮົາມີຊີວິດຮ່ວມກັນ, ອຸດົມການຮ່ວມກັນ ແລະ ພວກເຮົາໄດ້ເຫັນທຸກໆໄລຍະເວລາທີ່ສໍາຄັນໃນການພັດທະນາຂອງການຮ່ວມມືມິດຕະພາບລະຫວ່າງ ລາວ-ຈີນ ຢ່າງຕໍ່ເນື່ອງ.
 |
ທ່ານ ກິແກ້ວ ໄຂຄໍາພິທູນ ກໍໄດ້ມີຄໍາເຫັນວ່າ: ງານສະເຫຼີມສະຫຼອງບຸນໄຫວ້ພະຈັນ ໃນຄັ້ງນີ້, ສະແດງໃຫ້ເຫັນເຖິງການແລກປ່ຽນມິດຕະພາບລະຫວ່າງ ປະຊາຊົນສອງປະເທດພວກເຮົາ ຊຶ່ງເປັນບຸນປະເພນີພື້ນເມືອງຂອງຈີນ ທີ່ເນັ້ນເຖິງການເຕົ້າໂຮມຍາດພີ່ນ້ອງ, ສ້າງຄວາມສາມັກຄີເໝືອນດັ່ງຄອບຄົວດຽວກັນ, ພ້ອມທັງສະແດງຄວາມຂອບໃຈ ແລະ ຊົມເຊີຍ ມາຍັງຊາວຈີນຕ່າງດ້າວ ແລະ ວິສາຫະກິດຈີນປະຈໍາລາວ ທີ່ໄດ້ສ້າງຮາກຖານ, ດໍາເນີນທຸລະກິດ, ດຶງດູດການລົງທຶນ, ທັງເປັນຂົວຕໍ່ໃຫ້ກັບປະຊາຊົນສອງປະເທດທຸກລະດັບ ໄດ້ມີການພົວພັນຮ່ວມມືກັນ ນັບມື້ນັບຫຼາຍຂຶ້ນ ຊຶ່ງເປັນການສົ່ງເສີມເສດຖະກິດ-ສັງຄົມ ໃນ ສປປ ລາວ ແລະ ເສີມຂະຫຍາຍໃຫ້ສາຍພົວພັນສອງປະເທດໃຫ້ນັບມື້ນັບແໜ້ນແຟ້ນຍິ່ງໆຂຶ້ນ. ຢ່າງໃດກໍຕາມ, ແນວລາວສ້າງຊາດ ຈະສືບຕໍ່ເພີ່ມທະວີແລກປ່ຽນກັບ ສປ ຈີນ ໂດຍສະເພາະແມ່ນຊາວຈີນຕ່າງດ້າວ ແລະ ວິສາຫະກິດຈີນ ຢູ່ລາວ ເພື່ຶອສົ່ງເສີມແລກປ່ຽນການທູດປະຊາຊົນ ແລະ ການພົວພັນຮ່ວມມື ດ້ານວັດທະນະທໍາ-ສັງຄົມ ເພື່ອປະກອບສ່ວນເພີ່ມທະວີມິດຕະພາບ ແລະ ຄວາມເຂົ້າອົກເຂົ້າໃຈລະຫວ່າງພັກ-ລັດ ແລະ ປະຊາຊົນ ລາວ-ຈີນ, ຈີນ-ລາວ ໃຫ້ເລິກເຊິ່ງ ແລະ ແໜ້ນແຟ້ນຂຶ້ນກວ່າເກົ່າ.
ຂ່າວ: ທະນູທອງ, ພາບ:ເກດສະໜາ
ຄໍາເຫັນ