 |
ເປັນກຽດໃນງານ ໂດຍ ທ່ານນາງ ບຸນຄຳ ວໍລະຈິດ ຜູ້ວ່າການທະນາຄານແຫ່ງ ສປປ ລາວ, ທ່ານນາງ ເມແກັນຈອນສ ເອກອັກຄະລັດຖະທູດອົສຕຣາລີປະຈຳ ສປປ ລາວ ໄດ້ເປັນກຽດຂຶ້ນກ່າວໃນງານ, ທ່ານນາງ ຟອງສະໝຸດ ອັ່ນລາວັນ ຮອງລັດຖະມົນຕີກະຊວງການຕ່າງປະເທດ, ບັນດາພະນັກງານຂັ້ນສູງ, ນັກການທູດ, ນັກທຸລະກິດ ແລະ ຜູ້ຕາງໜ້າຈາກອົງການຈັດຕັ້ງສາກົນເຂົ້າຮ່ວມ.
ທ່ານນາງ ເມແກັນຈອນສ ຊຶ່ງກ່າວເຖິງຄວາມສຳຄັນຂອງວັນຊາດອົສຕຣາລີ (26 ມັງກອນ), ໂດຍສະເພາະປະຫວັດຄວາມເປັນມາ, ວັດທະນະທຳ ແລະ ຜົນສຳເລັດຕ່າງໆທີ່ເຮັດໃຫ້ອົສຕຣາລີເປັນທັນສະໄໝ ແລະ ມີວັດທະນະທຳຊົນເຜົ່າທີ່ຫຼາກຫຼາຍ. “ພວກເຮົາພູມໃຈກັບປະເທດຊາດຂອງພວກເຮົາທີ່ຄວາມຫຼາກຫຼາຍທາງດ້ານວັດທະນະທຳ - ມີຄົນມາຈາກເຊື້ອຊາດທີ່ແຕກຕ່າງກັນຫຼາຍກວ່າ 300 ກຸ່ມ, ໃນຈຳນວນນີ້ມີຄົນອົສຕຣາລີຫຼາຍກວ່າໜຶ່ງລ້ານຄົນທີ່ມີເຊື້ອສາຍຄອບຄົວຈາກພາກພື້ນອາຊີຕາເວັນອອກສ່ຽງໃຕ້. ພວກເຮົາຮັບຮູ້ວ່າປະເທດຊາດທີ່ທັນສະ ໄໝຂອງພວກເຮົາມາຈາກວັດທະນະທຳຊົນເຜົ່າທີ່ຕໍ່ເນື່ອງຍາວນານມາຫຼາຍກວ່າ 65,000 ປີ ຊຶ່ງເປັນວັດທະນະທຳທີ່ເກົ່າແກ່ທີ່ສຸດໃນໂລກ. ພວກເຮົາຖືເອົາໂອກາດນີ້ເບິ່ງໄປທາງໜ້າສູ່ອະນາຄົດຮ່ວມກັນ ແລະ ເປັນໂອກາດທີ່ຈະໄດ້ພິຈາລະນາບົດບາດຂອງພວກເຮົາໃນພາກພື້ນນີ້ ແລະ ໃນໂລກ. ແນ່ນອນ, ລວມທັງສາຍພົວພັນຂອງພວກເຮົາໃນພາກພື້ນອາຊີຕາເວັນອອກສ່ຽງໃຕ້ລວມເຖິງມິດຕະພາບທີ່ແໜ້ນແຟ້ນ, ຍາວນານຂອງອົສຕຣາລີ ແລະ ສປປ ລາວ.”
 |
ປີນີ້ລາວ ແລະ ອົສຕຣາລີຮ່ວມກັນສະເຫຼີມສະຫຼອງສາຍພົວພັນການທູດຄົບຮອບ 74 ປີ ຊຶ່ງແມ່ນສາຍພົວພັນສອງຝ່າຍທີ່ຕໍ່ເນື່ອງຍາວນານທີ່ສຸດທີ່ ສປປ ລາວ ມີຮ່ວມກັບຕ່າງປະເທດ. ການຮ່ວມມືລະຫວ່າງສອງປະເທດຂອງພວກເຮົາມີຄວາມຍືນຍົງ ຜ່ານການຜັນແປ ແລະ ສິ່ງທ້າທາຍຕ່າງໆຂອງໂລກລວມເຖິງການປ່ຽນແປງດ້ານບຸລິມະສິດຕ່າງໆ - ແຕ່ສາຍພົວພັນຂອງພວກເຮົາສືບຕໍ່ແໜ້ນແຟ້ນເຂັ້ມແຂງຍ້ອນຖືກສ້າງຂຶ້ນບົນຈິດໃຈເຊື່ອໝັ້ນຊຶ່ງກັນ ແລະ ກັນ, ເຄົາລົບຊຶ່ງກັນ ແລະ ກັນ ແລະ ເປັນມິດຕະພາບທີ່ແທ້ຈິງ.
ອົສຕຣາລີໃຫ້ຄຳໝັ້ນສັນຍາ ທີ່ຈະເສີມຂະຫຍາຍການຮ່ວມມືກັບ ສປປ ລາວ ພາຍໃຕ້ສັນຍາຄູ່ຮ່ວມມືຮອບດ້ານ ທີ່ລົງນາມກັນໂດຍນາຍົກລັດຖະມົນຕີຂອງທັງສອງປະເທດໃນປີ 2024. ການຮ່ວມມືດັ່ງກ່າວກວມເອົາຫຼາຍຂົງເຂດທີ່ສຳຄັນເຊັ່ນ: ການສຶກສາ, ສາທາລະນະສຸກ, ການຄ້າ ແລະ ການລົງທຶນ, ພະລັງງານ, ຄວາມໝັ້ນຄົງທາງໄຊເບີ, ອາຊະຍາກຳຂ້າມຊາດ, ວຽກງານປ້ອງກັນປະເທດ ແລະ ການບັງຄັບໃຊ້ກົດໝາຍ.
ຕະຫຼອດໄລຍະເວລາຫຼາຍກວ່າ 70 ປີຜ່ານມາ, ນັກສຶກສາລາວທີ່ໄດ້ໄປຮຽນຕໍ່ຢູ່ອົສຕຣາລີ ແລະ ກັບຄືນມາບ້ານພ້ອມດ້ວຍທັກສະ ແລະ ຄວາມຮູ້ຄວາມສາມາດໃໝ່ຫຼາຍດ້ານລວມເຖິງມິດຕະພາບທີ່ຕິດໂຕຕະຫຼອດຊີວິດ. ປັດຈຸບັນ ມີອະດີດນັກສຶກສາຈົບຈາກອົສຕຣາລີຫຼາຍກວ່າ 2,600 ຄົນ ຢູ່ໃນ ສປປ ລາວ ທີ່ພວມປະກອບສ່ວນເຂົ້າໃນພາລະກິດສ້າງສາປະເທດຊາດໃນພາກລັດ, ພາກເອກະຊົນ, ໜ່ວຍງານວິທະຍາສາດ, ຂະແໜງສາທາລະນະສຸກ ແລະ ຂະແໜງສິລະປະວັດທະນະທຳອື່ນໆ.
ໃນປີ 2025, ອົສຕຣາລີສະໜັບສະໜູນ ສປປ ລາວ ໃນການຕໍ່ສູ້ກັບພະຍາດໄຂ້ເລືອດອອກ ຊຶ່ງໄດ້ມີການປ່ອຍຍຸງທີ່ມີເຊື້ອ Wolbachia ຈໍານວນ 48 ລ້ານໂຕ ທົ່ວນະຄອນຫຼວງວຽງຈັນ. ນອກຈາກນັ້ນ, ພວກເຮົາຍັງສະໜັບສະໜູນຫຼາຍກິດຈະກຳເພື່ອສະເຫຼີມສະຫຼອງວັນສື່ມວນຊົນຄົບຮອບ75 ປີ ແລະ ສະໜັບສະໜູນການສຳຫຼວດພົນລະເມືອງລາວທົ່ວປະເທດຄັ້ງທີ 5.
ອົສຕຣາລີຍັງໃຫ້ຄຳໝັ້ນສັນຍາທີ່ຈະຮັດແໜ້ນການຮ່ວມມືເສດຖະກິດກັບ ສປປ ລາວ ພາຍໃຕ້ແຜນງານທີ່ເອີ້ນວ່າ: ຍຸດທະສາດເສດຖະກິດອາຊີຕາເວັນອອກສ່ຽງໃຕ້ຂອງອົສຕຣາລີເຖິງປີ 2040.
ໃນປີກາຍນີ້, ບໍລິສັດ Costa ຂອງອົສຕຣາລີໄດ້ລົງທຶນປູກໝາກບູເບີຣີຢູ່ເມືອງປາກຊ່ອງ ແຂວງຈຳປາສັກແລະ ມາຮອດປັດຈຸບັນບໍລິສັດໄດ້ປູກໝາກບູເບີຣີໄດ້ 73 ເຮັກຕາ ແລະ ສ້າງວຽກເຮັດງານທຳໄດ້ຫຼາຍກວ່າ 200ຄົນ, ສ່ວນໃຫຍ່ແມ່ນຄົນລາວ. ປີນີ້ພວກເຮົາເສີມຂະຫຍາຍການຮ່ວມມືກັບ ສປປ ລາວ ເພື່ອຮັບມືກັບການປ່ຽນແປງຂອງສະພາບດິນຟ້າອາກາດໂດຍຜ່ານໂຄງການໃໝ່ ຄື: ໂຄງການເສີມສ້າງຄວາມເຂັ້ມແຂງດ້ານກະສິກຳລາວ-ອົສຕຣາລີ. ປີໜ້າຈະຄົບຮອບ 75 ປີແຫ່ງສາຍພົວພັນສອງຝ່າຍລາວ-ອົສຕຣາລີ. ເປັນປີທີ່ສອງປະເທດຂອງພວກເຮົາຈະຮ່ວມກັນທົບທວນຕື່ມວ່າພວກເຮົາຮ່ວມເດີນທາງຄຽງຄູ່ກັນມາຕາມເສັ້ນທາງອັນຍາວໄກນີ້ຮອດໃສແລ້ວ ແລະເບິ່ງທາງໜ້ານຳກັນດ້ວຍຄວາມຫວັງໃນສິ່ງທີ່ພວກເຮົາສາມາດຍາດໄດ້ເປົ້າໝາຍທີ່ວາງໄວ້ຮ່ວມກັນ.
(ຂ່າວ: ແສງຈັນ)
ຄໍາເຫັນ