ກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການຜ່ານຂໍ້ຕົກລົງ ຂອງທ່ານເຈົ້າເມືອງ ວ່າດ້ວຍການແຕ່ງຕັ້ງ ຄະນະກຳມະການຄຸ້ມຄອງໄພພິບັດຂັ້ນເມືອງ; ຮັບຟັງບົດສະຫຼຸບຕີລາຄາການແກ້ໄຂບັນຫາໄພພິບັດນໍ້າຖ້ວມຢູ່ກຸ່ມເມືອງໝ້ວຍ ແລະ ກຸ່ມສົບເຮືອງ ທີ່ເກີດຂຶ້ນໃນລະຫວ່າງວັນທີ 24-25 ກໍລະກົດ 2024 ຜ່ານມາ ແລະ ທິດທາງແຜນການໃນຕໍ່ໜ້າ.
ໄພພິບັດທີເກີດຂຶ້ນໃນຄັ້ງນີ້ ໄດ້ສ້າງຜົນເສຍຫາຍຕໍ່ປະຊາຊົນ 13 ບ້ານ, ມີ 531 ຄອບຄົວ, ມີ 3 ພັນກວ່າຄົນ ຍິງ 1,400 ກວ່າຄົນ, ທີ່ຢູ່ອາໄສເສຍຫາຍ 249 ຄອບຄົວ, ເນື້ອທີ່ຜະລິດ 300 ກວ່າເຮັກຕ່າ, ສັດລ້ຽງ 4,000 ກວ່າໂຕ ແລະ ອື່ນໆ. ລວມມູນຄ່າເສຍຫາຍທັງໝົດ 72 ຕື້ກວ່າກີບ; ພ້ອມນັ້ນ ໄດ້ຮັບຟັງການລາຍງານ ກ່ຽວກັບການຊ່ວຍເຫຼືອ ເຄື່ອງອຸປະໂພກ-ບໍລິໂພກ ແລະ ເງິນສົດ ຂອງຫຼາຍພາກສ່ວນໃນສັງຄົມ ເປັນຕົ້ນ ການຊ່ວຍເຫຼືອຈາກອົງການຈັດຕັ້ງພາກລັດ, ອົງການຊ່ວຍເຫຼືອສາກົນ, ບໍລິສັດເອກະຊົນ, ບຸກຄົນ, ນິຕິບຸກຄົນ, ອົງການພຸດທະສາສະໜາ ແລະ ພາກສ່ວນອື່ນໆ ລວມທັງພາຍໃນ ແລະ ຕ່າງປະເທດ ເຂົ້າມາຊ່ວຍເຫຼືອ ມີ 129 ພາກສ່ວນ ລວມເງິນສົດ 464 ລ້ານກວ່າກີບ, ເຂົ້າສານ 53 ໂຕນກວ່າ ມູນຄ່າ 989 ລ້ານກວ່າກີບ, ສັງກະສີ 2,240 ແຜ່ນ ມູນຄ່າ 83 ລ້ານກວ່າກີບ ແລະ ເຄື່ອງອຸປະໂພກ-ບໍລິໂພກ ລວມເປັນມູນຄ່າ ມູນຄ່າ 6 ຕື້ 420 ລ້ານກວ່າກີບ. ສ່ວນທິດທາງແຜນການໃນຕໍ່ໜ້າ ຈະສືບຕໍ່ຄົ້ນຄວ້ານະໂຍບາຍທີ່ສອດຄ່ອງກັບນິຕິກຳຂອງລັດຖະບານ ໃຫ້ຄອບຄົວທີ່ຖືກຜົນການທົບ ແລະ ທຸກຍາກ, ສືບຕໍ່ຄົ້ນຄວ້ານໍາສະເໜີພາກສ່ວນທີ່ກ່ຽວຂ້ອງ ສ້ອມແປງພື້ນຖານໂຄງລ່າງທີ່ຖືກຜົນກະທົບ ເປັນຕົ້ນ ເສັ້ນທາງຫຼວງແຫ່ງຊາດເລກທີ 1C ແຕ່ບ້ານດອນແກ້ວຫາບ້ານເມືອງໝ້ວຍ, ສ້ອມແປງລະບົບນໍ້າລິນ 12 ບ້ານ, ວິດຖ່າຍ 6 ບ້ານ, ຊົນລະປະທານ 4 ແຫ່ງ, ຄອງເໝືອງ 1,200 ກວ່າແມັດ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ປະກອບຄໍາເຫັນ ເພື່ອເປັນແນວທາງໃນການຈັດຕັ້ງປະຕິບັດວຽກງານດັ່ງກ່າວໃຫ້ໄດ້ຮັບຜົນດີ.
(ຂ່າວ: ບຸນທັນ ໄຊຍະວົງ)
ຄໍາເຫັນ