 |
ທ່ານ ພົຈວ ແອນ ອຸ່ນອານົງນຸດ ໄດ້ມີຄຳເຫັນວ່າ: ກອງປະຊຸມຄັ້ງນີ້, ມີຄວາມໝາຍ ຄວາມສຳຄັນຢ່າງຍິ່ງ, ບໍ່ພຽງແຕ່ເປັນການຕີລາຄາຢ່າງຮອບດ້ານ, ພາວະວິໄສ ໝາກຜົນຂອງວຽກງານສັນຕິບານປີ 2025, ແຕ່ຍັງເປັນເວທີເພື່ອໃຫ້ບັນດາສະຫາຍ ການນໍາຂັ້ນກົມໃຫຍ່ສັນຕິບານ, ກົມ-ຫ້ອງ, ບັນດາກອງບັນຊາການ ປກສ ແຂວງທົ່ວປະເທດ ໄດ້ແລກປ່ຽນປະສົບການຕົວຈິງ, ຊີ້ໃຫ້ເຫັນບັນດາເລ່ຫຼ່ຽມກົນອຸບາຍ, ຮູບການເຄື່ອນໄຫວໃໝ່ຂອງບັນດາອິດທິກຳລັງປໍລະປັກໃນສະພາບການໃໝ່. ຈາກນັ້ນ, ຈຶ່ງພ້ອມກັນເປັນເອກະພາບທາງດ້ານແນວຄິດ ແລະ ວາງທິດທາງ, ໜ້າທີ່, ວິທີທາງແກ້ໄຂຢ່າງມີຈຸດສຸມໃນປີ 2026 ແລະ ປີຕໍ່ໆໄປ.
ໂອກາດດັ່ງກ່າວ, ທ່ານ ພົຈວ ແອນ ອຸ່ນອານົງນຸດ ຍັງໄດ້ຊີ້ນຳໃຫ້ພະນັກງານຫຼັກແຫຼ່ງ-ນຳພາບັນຊາ ວຽກງານສັນຕິບານທີ່ເຂົ້າຮ່ວມກອງປະຊຸມ ຈົ່ງຍົກສູງນໍ້າໃຈຄວາມຮັບຜິດຊອບ, ການປະຕິບັດຕາມວາລະກອງປະຊຸມຢ່າງເຂັ້ມງວດ, ພ້ອມກັນສຸມທຸກສະຕິປັນຍາ ຄົ້ນຄວ້າແລກປ່ຽນສະພາບການ ແລະ ປະສົບການ ໃນການປະຕິບັດຕົວຈິງຕໍ່ກອງປະຊຸມຢ່າງກົງໄປກົງມາ, ຍົກໃຫ້ເຫັນຈຸດດີ ຜົນງານໄຊຊະນະທີ່ຍາດມາໄດ້ ເພື່ອຮັກສາ ແລະ ສົ່ງເສີມໃຫ້ດີຂຶ້ນ; ພ້ອມນັ້ນ, ໄດ້ກຳນົດທິດທາງວຽກງານໃນຕໍ່ໜ້າ ໃຫ້ຖືກຕ້ອງສອດຄ່ອງທັນກັບສະພາບການໃນໄລຍະໃໝ່ ແນໃສ່ຍາດໄດ້ໄຊຊະນະໃໝ່ທີ່ຍິ່ງໃຫຍ່ກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ໃນວາລະກອງປະຊຸມໄດ້ຮັບຟັງຮ່າງບົດສະຫຼຸບວຽກງານສັນຕິບານປະຈຳປີ 2025 ແລະ ທິດທາງແຜນ ການປີ 2026. ຈາກນັ້ນ, ຍັງໄດ້ຮັບຟັງການປະກອບຄໍາຄິດຄຳເຫັນ ແລະ ການລາຍງານສະພາບການຕ່າງໆ ທີ່ພົ້ນເດັ່ນໃນສັງຄົມ ກໍຄືຜົນການຈັດຕັ້ງປະຕິບັດວຽກງານວິຊາສະເພາະສັນຕິບານ ຈາກບັນດາກົມ-ຫ້ອງວິຊາສະເພາະໃນໄລຍະຜ່ານມາ ເພື່ອພ້ອມກັນຄົ້ນຄວ້າ, ແລກປ່ຽນຄຳຄິດເຫັນ, ຊອກຫາວິທີການສະກັດກັ້ນ-ແກ້ໄຂຢ່າງຖືກຕ້ອງ ຕາມແນວທາງນະໂຍບາຍຂອງພັກ-ລັດ ຮັບປະກັນຫຼັກການວິຊາສະເພາະປ້ອງກັນຄວາມສະຫງົບ ຢ່າງມີປະສິດທິຜົນ, ກອງປະຊຸມໄດ້ດຳເນີນໄປເປັນເວລາ 1 ວັນຈຶ່ງສຳເລັດ.
ຂ່າວ: ບຸນພະຈັນ
ຄໍາເຫັນ