ສະມາຄົມພະນັກງານເບ້ຍບໍານານ ແລະ ຜູ້ເສຍອົງຄະເມືອງແກ່ນທ້າວແຂວງໄຊຍະບູລີ ໄດ້ຈັດກອງປະຊຸມສະຫຼຸບວຽກງານປະຈໍາປີ 2023 ຂຶ້ນ ຫວ່າງບໍ່ດົນມານີ້ ທີ່ສະໂມສອນຫ້ອງວ່າການເມືອງໂດຍເປັນກຽດເຂົ້າຮ່ວມຂອງທ່ານ ຄໍາປຸ່ນ ນວນສະບັບ ຮອງເຈົ້າເມືອງແກ່ນທ້າວ, ມີທ່ານ ທອງຄູນ ຈັນທະວົງ ປະທານສະມາຄົມພະນັກງານເບ້ຍບໍານານ ແລະ ຜູ້ເສຍອົງຄະເມືອງ, ທ່ານ ສົມຫວັງ ພຸດທະສັກ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ທອງຄູນ ຈັນທະວົງ ປະທານສະມາຄົມພະນັກງານເບ້ຍບໍານານ ແລະ ຜູ້ເສຍອົງຄະເມືອງ ໄດ້ຜ່ານບົດສະຫຼຸບການເຄື່ອນໄຫວວຽກງານຮອບດ້ານປະຈໍາປີ 2023 ແລະ ທິດທາງແຜນການປະຈໍາປີ 2024 ວ່າ: ສະມາຄົມພະນັກງານເບ້ຍບໍານານ ແລະ ຜູ້ເສຍອົງຄະເມືອງ ເປັນສະມາຄົມໜຶ່ງສ້າງຕັ້ງຂຶ້ນພາຍໃຕ້ການຊີ້ນໍາ-ນໍາພາຂອງອົງການປົກຄອງເມືອງ ແລະ ຫ້ອງການແຮງງານ ແລະ ສະຫວັດດີການສັງຄົມເມືອງ ມີພາລະບົດບາດໃນການເຕົ້າໂຮມຄວາມສາມັກຄີ, ປົກປ້ອງສິດຜົນປະໂຫຍດຊ່ວຍເຫຼືອເບິ່ງແຍງ ແລະ ປະຕິບັດນະໂຍບາຍຕໍ່ຄອບຄົວພະນັກງານເບ້ຍບໍານານ, ມີສະມາຊິກທັງໝົດ 180 ກວ່າຄົນ ຍິງ 30 ກວ່າຄົນ, ແບ່ງອອກເປັນ 11 ໜ່ວຍ, ມີຄະນະ 9 ທ່ານ ຍິງ 1 ທ່ານ. ໃນ 1 ປີຜ່ານມາໄດ້ຮັບພະນັກງານເບ້ຍບໍານານໃໝ່ 10 ຄົນ ຍິງ 2 ຄົນ, ພະນັກງານບໍານານເສຍຊີວິດ 6 ທ່ານ. ພະນັກງານບໍານານ ແລະ ຜູ້ເສຍອົງຄະທຸກທ່ານມີແນວຄິດອຸ່ນອ່ຽນທຸ່ນທ່ຽງຕໍ່ສະພາບການ, ເຊື່ອໝັ້ນຕໍ່ການນໍາພາຂອງພັກ-ລັດ ມີຄວາມເປັນເອກະພາບສູງຕໍ່ແນວທາງຂອງພັກ-ລັດມີສະຕິຕໍ່ການຈັດຕັ້ງ, ເອົາໃຈໃສ່ປະຕິບັດແຜນພັດທະນາເສດຖະກິດ-ສັງຄົມຂອງເມືອງວາງອອກເປັນຢ່າງດີ. ມີຄວາມສາມັກຄີເປັນເອກະພາບໃນກຸ່ມມະຫາຊົນ ແລະ ຊັ້ນຄົນຕ່າງໆ. ສະມາຄົມຍັງໄດ້ປະຕິບັດນະໂຍບາຍຕໍ່ຄອບຄົວພະນັກງານເບ້ຍບໍານານ ແລະ ຜູ້ເສຍອົງຄະ 6 ທ່ານຈໍານວນ 23 ລ້ານກີບ, ສະເໜີເງິນອຸດໜູນໝ້າຍໃຫ້ຄອບຄົວພະນັກງານເບ້ຍບໍານານທີ່ເສຍຊີວິດ 4 ທ່ານ, ເກັບເງິນກອງທຶນໄດ້ທັງໝົດ 24 ລ້ານກວ່າກີບ. ຕອນທ້າຍກອງປະຊຸມໄດ້ຮັບຟັງການມີຄໍາເຫັນໂອ້ລົມຂອງຄະນະປະທານຕື່ມອີກ.
ຂ່າວ-ພາບ: ແກ່ນທ້າວ
ຄໍາເຫັນ