ສໍາເລັດກອງປະຊຸມຄົບຄະນະພັກແຂວງໄຊຍະບູລີ ຄັ້ງທີ 10 ສະໄໝທີ VII

ພາຍຫຼັງທີ່ໄດ້ດໍາເນີນກອງປະຊຸມ ຄົບຄະນະບໍລິຫານງານພັກແຂວງ ໄຊຍະບູລີ ຄັ້ງທີ 10 ສະໄໝທີ VII ມາເປັນເວລາວັນເຄິ່ງຈຶ່ງໄດ້ສໍາເລັດລົງໃນວັນທີ 26 ທັນວານີ້ ທີ່ສະໂມສອນ ຫ້ອງວ່າການແຂວງ, ໂດຍການເປັນປະທານ ຂອງ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໄຊຍະບູລີ, ເຂົ້າຮ່ວມມີຮອງເລຂາພັກແຂວງ, ປະທານສະພາປະຊາຊົນແຂວງ, ກໍາມະການປະຈໍາພັກແຂວງ, ກໍາມະການພັກແຂວງ, ມີເລຂາຄະນະພັກຮາກຖານ, ເລຂາໜ່ວຍພັກພະແນກການ, ກົມກອງ, ລັດວິສາຫະກິດອ້ອມຂ້າງແຂວງ, ມີຄະນະພັກ 3 ກອງບັນຊາການ ແລະ ເລຂາພັກເມືອງ, ເຈົ້າເມືອງ 11 ເມືອງເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້ໄດ້ພ້ອມກັນຄົ້ນຄວ້າ ແລະ ສະຫຼຸບຕີລາຄາການນໍາພາ-ຊີ້ນຳວຽກງານຮອບດ້ານ ໃນໄລຍະ 1 ປີ ຜ່ານມາ, ຕີລາຄາການນຳພາ-ຊີ້ນຳ  ກ່ຽວກັບການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມ, ແຜນງົບປະມານ ປີ 2023 ແລະ ທິດທາງແຜນການປີ 2024, ຕະຫຼອດໄລຍະ 1 ປີ ຜ່ານມາ ໂດຍລວມແລ້ວສະພາບການເມືອງ-ແນວຄິດ ຂອງສະມາຊິກພັກ-ພະນັກງານ ເຫັນວ່າມີຄວາມອຸ່ນອ່ຽນທຸ່ນທ່ຽງ, ເຊື່ອໝັ້ນຕໍ່ແນວທາງນະໂຍບາຍ ກໍຄືການນໍາພາຂອງຄະນະພັກ ຕັ້ງໜ້າປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິ ຄັ້ງທີ VII ຂອງອົງຄະນະພັກແຂວງ ວາງອອກ ເຮັດໃຫ້ແຂວງສືບຕໍ່ຮັກສາໄດ້ສະຖຽນລະພາບທາງດ້ານການເມືອງໜັກແໜ້ນ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມະຫາພາກໄດ້ເຕີບໂຕໄປຕາມທິດທີ່ວາງໄວ້ໃນລະດັບ 5% ແລະ ລວມຍອດຜະລິດຕະພັນພາຍໃນ ປະຕິບັດໄດ້ 14.935 ຕື້ກີບ, ສະເລ່ຍຕໍ່ຫົວຄົນ 35,6 ລ້ານກີບ ຫຼື ເທົ່າກັບ 1.784 ໂດລາ (ອັດຕາແລກປ່ຽນ 1 ໂລດາ 20.000 ກີບ)  ໃນນີ້: ກະສິກຳຂະຫຍາຍຕົວ 3,1%, ອຸດສາຫະກຳຂະຫຍາຍຕົວ 8,7%, ການບໍລິການຂະຫຍາຍຕົວ 4,5%; ເກັບລາຍຮັບເຂົ້າງົບປະມານໄດ້ ລື່ນແຜນ 8,7%, ໃນນີ້: ພູດສູນກາງ ລື່ນແຜນ 4,2%, ພູດທ້ອງຖິ່ນ ລື່ນແຜນ 17,89%; ດ້ານລາຍຈ່າຍລື່ນແຜນ 18,4%, ສົ່ງອອກສິນຄ້າໄດ້ທັງໝົດ 89,04 ລ້ານໂດລາ, ເທົ່າກັບ 73,59%, ນໍາເຂົ້າສິນຄ້າ ມູນຄ່າທັງໝົດ 53,09 ລ້ານໂດລາ; ການລົງທຶນຂອງລັດ ໂດຍລວມແມ່ນຈັດຕັ້ງປະຕິບັດຕາມຂັ້ນຕອນຂອງລະບຽບກົດໝາຍ ແຕ່ສິ່ງສໍາຄັນທີ່ກະຕຸ້ນໃຫ້ເສດຖະກິດຂອງແຂວງເຕີບໂຕແມ່ນການລົງທຶນຂອງເອກະຊົນພາຍໃນ ແລະ ຕ່າງປະເທດ.
(ຂ່າວ-ພາບ: ອຸ່ນເຮືອນ ໂພທິລັກ)