ສຳເລັດກອງປະຊຸມໃຫຍ່ ຄັ້ງທີ lV ຄະນະພັກຮາກຖານກອງບັນຊາການ ປກສ ເມືອງໂຂງ

ໃນວັນທີ 23 ຕຸລາ ຜ່ານມາ ທີ່ສະໂມສອນກອງບັນຊາການປ້ອງກັນຄວາມສະຫງົບ (ປກສ) ເມືອງໂຂງ ແຂວງຈຳປາສັກ ໄດ້ເປີດກອງປະຊຸມໃຫຍ່ຄັ້ງທີ lV ຂອງຄະນະພັກຮາກຖານກອງບັນຊາການ ປກສ ເມືອງ ໂດຍເປັນກຽດເຂົ້າຮ່ວມຂອງ ສະຫາຍນາງ ຄຳພູ ລິດທິສັກ ກຳມະການພັກແຂວງ ເລຂາພັກເມືອງ ເຈົ້າເມືອງໆໂຂງ, ມີສະຫາຍ ພັອ ສີວິໄລ ແກ້ວປະເສີດ ຮອງເລຂາພັກ ຮອງຫົວໜ້າກອງບັນຊາການ ປກສ ແຂວງ, ສະຫາຍ ພັທ ສົມສະໜຸກ ພະໄຊສົມບັດ ຄະນະປະຈຳພັກເມືອງ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງ ພ້ອມດ້ວຍແຂກຖືກເຊີນກ່ຽວຂ້ອງເຂົ້າຮ່ວມ.
      ສະຫາຍ ພັທ ສົມສະໜຸກ ພະໄຊສົມບັດ ຊີ້ໃຫ້ເຫັນຜົນງານພົ້ນເດັ່ນຫຼາຍດ້ານໃນໄລຍະຜ່ານມາເປັນຕົ້ນ ໄດ້ເອົາໃຈໃສ່ສຶກສາອົບຮົມວຽກງານການເມືອງ-ແນວຄິດ ເປັນວຽກງານສຳຄັນໃນແຖວໜ້າ, ນຳເອົາບັນດາແນວທາງນະໂຍບາຍຂອງພັກ, ກົດໝາຍຂອງລັດ, ມະຕິຄຳສັ່ງຂອງຂັ້ນເທິງມາຈັດຕັ້ງເຜີຍແຜ່ເຊື່ອມຊຶມໃຫ້ພະນັກງານ, ສະມາຊິກພັກ, ນັກຮົບຢ່າງເປັນປົກກະຕິຕໍ່ເນື່ອງ, ເອົາໃຈໃສ່ວຽກງານກໍ່ສ້າງພັກ-ພະນັກງານ, ເວລາໃດກໍໄດ້ຢຶດໝັ້ນ ແລະ ປະຕິບັດ 5 ຫຼັກການ 3 ທິດນຳຂອງພັກໃນການກໍ່ສ້າງ ແລະ ຂະຫຍາຍພັກ, ສ້າງພັກໃຫ້ມີຄວາມປອດໃສ, ເຂັ້ມແຂງ, ໜັກແໜ້ນ ເຮັດໃຫ້ສະມາຊິກພັກມີຄວາມໜັກແໜ້ນທາງດ້ານການ ເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນຢ່າງເຂັ້ມງວດ; ພາຍໃນຄະນະພັກປະກອບມີ 7 ໜ່ວຍພັກຂຶ້ນກັບ, ມີສະມາຊິກພັກທັງໝົດ 133 ສະຫາຍ ຍິງ 17 ສະຫາຍ, ເປັນສະມາຊິກພັກສົມບູນ 128 ສະຫາຍ ຍິງ 15 ສະຫາຍ, ສຳຮອງ 5 ສະຫາຍ ຍິງ 2 ສະຫາຍ. ໃນສະໄໝຜ່ານມາສາມາດສ້າງໄດ້ໜ່ວຍພັກປອດໃສ, ເຂັ້ມແຂງ, ໜັກແໜ້ນ 6 ໜ່ວຍພັກ, ຮັບມະຫາຊົນກ້າວໜ້າເຂົ້າພັກໄດ້ 40 ສະຫາຍ ຍິງ 9 ສະຫາຍ, ວຽກງານນະໂຍບາຍແມ່ນໄດ້ປະຕິບັດຕາມລະບຽບຫຼັກການດ້ວຍການສະເໜີເລື່ອນຊັ້ນໃຫ້ນາຍ ແລະ ພົນຕຳຫຼວດທັງໝົດ 151 ສະຫາຍ ຍິງ 17 ສະຫາຍ, ຄະນະພັກແຕ່ລະຂັ້ນໄດ້ເອົາໃຈໃສ່ຊີ້ນຳ-ນຳພາວຽກງານພະລາທິການ, ຂຶ້ນແຜນງົບປະມານໃນການຄຸ້ມຄອງລາຍຮັບ-ລາຍຈ່າຍ, ຄຸ້ມຄອງງົບປະມານທີ່ຂັ້ນເທິງເບີກຈ່າຍໃຫ້, ຊີ້ນຳສະມາຊິກພັກເອົາໃຈໃສ່ສ້າງເສດຖະກິດຄອບຄົວ ດ້ວຍການປູກຝັງ-ລ້ຽງສັດ ແລະ ອື່ນໆ, ເອົາໃຈໃສ່ປະສານສົມທົບກັບທຸກພາກສ່ວນທີ່ກ່ຽວຂ້ອງສະກັດກັ້ນ, ຕ້ານອາຊະຍາກຳທຸກປະເພດເຫັນວ່າມີຄວາມສະຫງົບໂດຍພື້ນຖານ. ນອກນັ້ນໄດ້ຫັນເອົາພະນັກງານລົງກໍ່ສ້າງຮາກຖານການເມືອງຢ່າງແຂງ ແຮງ ແລະ ຕໍ່ເນື່ອງຕາມ 4 ເນື້ອໃນ 4 ຄາດໝາຍທີ່ພັກວາງອອກ. 
ພ້ອມດຽວກັນນີ້, ຜູ້ແທນກອງປະຊຸມໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາເລຂາ, ຮອງເລຂາ ແລະ ປະທານກວດກາຄະນະພັກຮາກຖານຊຸດໃໝ່ບົນພື້ນຖານ ແລະ ມາດຖານເງື່ອນໄຂກຳນົດໄວ້. ຜົນການປ່ອນບັດກອງປະຊຸມໄດ້ເຫັນດີເປັນເອກະສັນເລືອກເອົາ ສະຫາຍ ພັທ ສົມສະໜຸກ ພະໄຊສົມບັດ ເປັນເລຂາ, ສະຫາຍ ພັທ ບຸນເພັງ ພົມມະຫານ ເປັນຮອງເລຂາ, ສະຫາຍ ພັທ ທອງຄູນ ໃສສະຫວັດ ເປັນປະທານກວດກາ, ສະຫາຍ ພັທ ຄຳພູວີ ບຸນມີໄຊ, ສະຫາຍ ພັທ ບົວລະພັນ ສິມມາລາ, ສະຫາຍ ພັທ ພັກດີ ໝື່ນແສນ ແລະ ສະຫາຍ ພັຕ ສີສະ ຫວັນ ສີອຳຄາ ເປັນຄະນະ. 
 ຂ່າວ-ພາບ: ພຸດທະສິນ ວົງວິໄລທອງ