 |
ກອງປະຊຸມ, ໄດ້ຕີລາຄາຄືນ ການນໍາພາ-ຊີ້ນໍາຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XIII ຂອງອົງຄະນະພັກເມືອງ ໃນໄລຍະ 5 ປີຜ່ານມາ ຊຶ່ງສະແດງໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດຖອນໄດ້ ພ້ອມທັງຮັບຮອງເອົາຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ບົດສໍາຫຼວດການນໍາພາລວມຂອງຄະນະບໍລິຫານງານພັກເມືອງ ຊຸດທີ XIII ແລະ ຄາດໝາຍສູ້ຊົນໃນ 5 ປີຕໍ່ໜ້າ 2025-2029 ໂດຍຈະສຸມໃສ່ຍົກສູງລະດັບຄຸນນະພາບຊີວິດຂອງປະຊາຊົນໃຫ້ສູງຂຶ້ນ, ຮັບປະກັນສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບສຸກ, ມີຄວາມສາມັກຄີເປັນປຶກແຜ່ນ, ປະຊາຊົນຫຼຸດພົ້ນອອກຈາກຄວາມທຸກຍາກ, ເສດຖະກິດມີຄວາມເຂັ້ມແຂງ, ເປັນເຈົ້າຕົນເອງນັບມື້ພົ້ນເດັ່ນ ດ້ວຍການນຳໃຊ້ທຸກທ່າແຮງບົ່ມຊ້ອນ ເພື່ອເຮັດໃຫ້ເສດຖະກິດ ມີສະຖຽນລະພາບ ແລະ ຂະຫຍາຍຕົວຢ່າງຕໍ່ເນື່ອງ, ມີຄວາມເຂັ້ມແຂງ, ໝັ້ນທ່ຽງ ແລະ ຍືນຍົງ, ສູ້ຊົນເຮັດໃຫ້ເສດຖະກິດຂະຫຍາຍຕົວສະເລ່ຍໃນລະດັບ 5.70% ຂຶ້ນໄປ, ລວມຍອດຜົນຜະລິດ ໃນ (GO) ໃຫ້ບັນລຸ 2,026 ຕື້ກີບ, ລາຍຮັບສະເລ່ຍຕໍ່ຫົວຄົນ ໃຫ້ໄດ້ 48 ລ້ານກີບ.ສຸມໃສ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ທົ່ວເຖິງ ແລະ ສ້າງຊົນນະບົດໃໝ່ດ້ວຍການເຂົ້າເຖິງແຫຼ່ງທຶນ, ສົ່ງເສີມການຜະລິດສິນຄ້າ, ສົ່ງເສີມວິຊາຊີບ ແລະ ເຕັກນິກວິຊາການທີ່ກ້າວໜ້າ ເພື່ອຍົກສູງສະມັດຕະພາບການຜະລິດ ຄຽງຄູ່ກັບການພັດທະນາຈຸດສຸມ, ການຈັດສັນພູມລໍາເນົາ, ອາຊີບຄົງທີ່, ພັດທະນາພື້ນຖານໂຄງລ່າງ ຮັບໃຊ້ການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນ ໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ.
 |
ຜູ້ແທນກອງປະຊຸມ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກເອົາຄະນະບໍລິຫານງານພັກເມືອງຊຸດໃໝ່ ຈໍານວນ 25 ສະຫາຍ, ເລືອກເອົາຄະນະປະຈໍາພັກເມືອງ ຈໍານວນ 7 ສະຫາຍ ແລະ ໄດ້ເປັນເອກະພາບເລືອກເອົາ ສະຫາຍ ຄໍາໝັ້ນ ສໍປະເສີດ ເປັນເລຂາຄະນະບໍລິຫານງານພັກເມືອງ, ສະຫາຍ ຄູນສີ ແສງດາລາ ແລະ ສະຫາຍ ນາງ ບຸນຕາ ບຸດສີດາ ເປັນຮອງເລຂາ, ເລືອກເອົາສະຫາຍ ຈັນທະບູນ ວົງສຸດທິ ເປັນປະທານກວດກາພັກເມືອງ, ສະຫາຍ ທອງສະຫວັນ ແທນທອງດີ ແລະ ສະຫາຍ ສອນເພັດ ທະວີສຸກ ເປັນຮອງປະທານກວດກາພັກເມືອງ.
(ຂ່າວ-ພາບ: ກອງຄໍາ)
ຄໍາເຫັນ