ໃນກອງປະຊຸມ, ແມ່ນໄດ້ຮັບຟັງ ການຜ່ານຮ່າງບົດລາຍງານການເມືອງ ແລະ ຮ່າງບົດສະຫຼຸບການຈັດຕັ້ງປະຕິບັດແຜນພັດທະນາຊາວໜຸ່ມ-ເຍົາວະຊົນ 5 ປີ (2020-2024) ແລະ ແຜນພັດທະນາຊາວໜຸ່ມ-ເຍົາວະຊົນ 2025-2030 ຊຶ່ງໄດ້ຕີລາຄາໃຫ້ເຫັນຜົນງານການເຄື່ອນໄຫວໃນຫຼາຍດ້ານ ທີ່ພົ້ນເດັ່ນແມ່ນການຈັດຕັ້ງປະຕິບັດ 8 ແຜນງານ, 28 ຕົວຊີ້ວັດ ແລະ 33 ໂຄງການ. ຊຶ່ງຄະນະຊາວໜຸ່ມແຕ່ລະຂັ້ນ ໄດ້ເຮັດໜ້າທີ່ໃນການສຶກສາອົບຮົມການເມືອງ-ແນວຄິດ, ຄຸນສົມບັດສິນທຳປະຕິວັດ, ໄດ້ເຜີຍແຜ່ຄວາມຮູ້ດ້ານຕ່າງໆ ໃຫ້ແກ່ຊາວໜຸ່ມ-ເຍົາວະຊົນ ດ້ວຍຮູບການເຄື່ອນໄຫວກິດຈະກຳຕ່າງໆ ທີ່ເປັນການຊຸກຍູ້ສົ່ງເສີມຄວາມຮູ້ ຄວາມສາມາດ ແລະ ພອນສະຫວັນ ຂອງຊາວໜຸ່ມ-ເຍົາວະຊົນ, ການກໍ່ສ້າງພື້ນຖານໂຄງລ່າງ ແລະ ເຕັກນິກ ວິຊາການໃຫ້ແກ່ຊາວໜຸ່ມ-ເຍົາວະຊົນ ໄດ້ເຄື່ອນໄຫວວຽກງານຕາມພາລະບົດບາດ, ຊາວໜຸ່ມ ໄດ້ຮັບການຝຶກອົບຮົມ ແລະ ສົ່ງເສີມ ດ້ານວິຊາຊີບ-ການສ້າງວຽກເຮັດງານທໍາ ແລະ ຮັກສາໄດ້ຄວາມສາມັກຄີທີ່ເປັນກຳລັງສໍາຄັນໃນຂະບວນການຊ່ວຍເຫຼືອສັງຄົມ ກໍຄືຂະບວນການຕ່າງໆ ຂອງກົມກອງທ້ອງຖິ່ນ, ຄຽງຄູ່ກັນນັ້ນ ຍັງໄດ້ຍົກໃຫ້ເຫັນບັນຫາຄວາມຫຍຸ້ງຍາກໃນບາງດ້ານ ທີ່ເປັນຜົນສະທ້ອນເຮັດໃຫ້ການປະຕິບັດໂຄງການຈໍານວນໜຶ່ງບໍ່ບັນລຸຕາມຄາດໝາຍ.
ກອງປະຊຸມ ໄດ້ຮັບຟັງການປະກອບຄໍາຄິດຄໍາເຫັນ ຈາກຕາງໜ້າອົງການຈັດຕັ້ງມະຫາຊົນ ແລະ ພາກສ່ວນຕ່າງໆ ຕະຫຼອດຮອດຊາວໜຸ່ມຕົວແບບໃນການພັດທະນາເສດຖະກິດຄອບຄົວ ພ້ອມທັງຮັບຟັງການຜ່ານເນື້ອໃນຮ່າງບົດສຳຫຼວດການນໍາພາລວມຂອງ ຄະນະບໍລິຫານງານຊາວໜຸ່ມແຂວງ ຊຸດທີ VIII ແລະ ກ່າວລາໜ້າທີ່ ຂອງຄະນະບໍລິຫານງານຊາວໜຸ່ມຊຸດເກົ່າ. ຈາກນັ້ນ, ກໍໄດ້ຜ່ານເງື່ອນໄຂມາດຖານ ຜູ້ທີ່ຈະສະໝັກເພື່ອຄັດເລືອກເຂົ້າໃນໂຄງປະກອບຂອງຄະນະບໍລິຫານງານຊາວໜຸ່ມແຂວງຊຸດໃໝ່ ຊຶ່ງມີຜູ້ສະໝັກທັງໝົດ 36 ສະຫາຍ ຍິງ 9 ສະຫາຍ, ຜ່ານການປ່ອນບັດຄັດເລືອກ ແລະ ຜົນການດໍາເນີນກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາຄະນະບໍລິຫານງານຊາວໜຸ່ມແຂວງຄັ້ງທີ IX ຈຳນວນ 31 ສະຫາຍ ຍິງ 9 ສະຫາຍ. ເລືອກເອົາຄະນະປະຈໍາ, ຄະນະບໍລິຫານງານຊາວໜຸ່ມ ຈໍານວນ 9 ສະຫາຍ ຍິງ 3 ສະຫາຍ ແລະ ໄດ້ເຫັນດີເລືອກເອົາ ສະຫາຍ ເຫຼັງຄໍາ ໄຊຄໍາຜັນ ເປັນເລຂາຄະນະບໍລິຫານງານຊາວໜຸ່ມແຂວງ, ສະຫາຍ ນາງ ເພັດສະໝອນ ບຸດດາ, ສະຫາຍ ນາງ ຈໍາປາທອງ ອິນທະວົງສາ ແລະ ສະຫາຍ ພູແກ້ວ ສຸດທິວົງ ເປັນຮອງເລຂາ, ເລືອກເອົາ ສະຫາຍ ນາງ ເພັດສະໝອນ ບຸດດາ ເປັນປະທານກວດກາ, ສະຫາຍ ພັທ ອ້ອຍຄຳສຸກ ອິນທະວົງ ເປັນຮອງປະທານກວດກາ ແລະ ສະຫາຍ ກຽງສັກ ພົມມີໄຊ ເປັນກຳມະການກວດກາ.
(ແຫຼ່ງຂ່າວ: ແຂວງຄໍາມ່ວນ)
ຄໍາເຫັນ