 |
ກອງປະຊຸມຄັ້ງນີ້, ໄດ້ດໍາເນີນໄປດ້ວຍບັນຍາກາດຟົດຟື້ນ ຄົ້ນຄ້ວາຢ່າງເລິກເຊິ່ງກົງໄປກົງມາ ແລະ ດ້ວຍຄວາມຮັບຜິດຊອບສູງຂອງບັນດາຜູ້ແທນກອງປະຊຸມ, ພ້ອມນີ້ ຍັງໄດ້ເປັນເອກະສັນຮັບຮອງເອົາເນື້ອໃນສໍາຄັນຕົ້ນຕໍ່ດັ່ງນີ້: ຮັບຮອງເອົາບົດລາຍງານການເມືອງຂອງຄະນະບໍລິຫານງານສະຫະພັນແມ່ຍິງແຂວງ ຊຶ່ງໄດ້ສະຫຼຸບຕີລາຄາຢ່າງພາວະວິໄສຕໍ່ຜົນງານການນໍາພາຂອງຄະນະບໍລິຫານງານສະຫະພັນແມ່ຍິງແຂວງ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງແຂວງ ຄັ້ງທີ VII; ເປັນເອກະພາບຮັບຮອງເອົາທິດທາງແຜນການສະຫະພັນແມ່ຍິງແຂວງ 5 ປີ (2025-2029)
 |
ເພື່ອເປັນບ່ອນອີງໃນການນໍາພາຈັດຕັ້ງປະຕິບັດວຽກງານແມ່ຍິງໃຫ້ມີຜົນສໍາເລັດ ຊຶ່ງລວມມີທິດທາງລວມ ແລະ 6 ຄາດໝາຍສູ້ຊົນ, ພ້ອມທັງມາດຕະການຈັດຕັ້ງປະຕິບັດຄື: ເພື່ອສຶບຕໍ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຜູ້ແທນແມ່ຍິງແຂວງ ຄັ້ງທີ VIII, ແຜນພັດທະນາແມ່ຍິງ 5 ປີ ໃຫ້ຖືກຕ້ອງສອດຄ່ອງກັບສະພາບຄວາມເປັນຈິງຂອງເອື້ອຍນ້ອງແມ່ຍິງບັນດາເຜົ່າ, ສະຫະພັນແມ່ຍິງແຕ່ລະຂັ້ນ ຈະໄດ້ເພີ່ມທະວີການສຶກສາອົບຮົມການເມືອງແນວຄິດໃຫ້ແກ່ສະມາຊິກແມ່ຍິງ, ແມ່ຍິງບັນດາເຜົ່າໃຫ້ຍືດໝັ້ນ ແລະ ປະຕິບັດແນວທາງປ່ຽນແປງໃໝ່ຂອງພັກແຕ່ລະໄລຍະ, ເສີມຂະຫຍາຍມູນເຊື້ອປະຫວັດສາດ, ຄວາມສາມັກຄີອັນເປັນປຶກແຜ່ນແໜ້ນໜາຂອງແມ່ຍິງ, ສ້າງການຈັດຕັ້ງສະຫະພັນແມ່ຍິງ ໃຫ້ມີຄວາມເຂັ້ມແຂງ ຮັບປະກັນທາງດ້ານປະລິມານ ແລະ ມີຄຸນນະພາບ.
 |
ຈາກນັ້ນ, ຜູ້ແທນກອງປະຊຸມ ກໍໄດ້ໃຊ້ສິດປະຊາທິປະໄຕ ຂອງຕົນປ່ອນບັດຄັດເລືອກເອົາຄະນະບໍລິຫານງານ ສະຫະພັນແມ່ຍິງແຂວງ ສະໄໝທີ VIII, ຊຶ່ງມີຜູ້ອອກສະໝັກ 31 ສະຫາຍ ເລືອກໄດ້ 27 ສະຫາຍ ແລະ ໄດ້ເປັນເອກະສັນກັນເລືອກເອົາທ່ານ ນາງ ຄຳປີວ ສີສົມບັດ ເປັນປະທານ, ທ່ານ ນາງ ຄຳໃບ ບໍລິວັນ ເປັນຮອງປະທານ, ທ່ານ ນາງ ວິລະພອນ ພົມມະວົງສາ ເປັນຮອງປະທານ, ທັງເປັນປະທານກວດກາ, ທ່ານ ນາງ ປະກາຍທິບ ໄຊຍະວົງ ເປັນຮອງປະທານກວດກາ ແລະ ທ່ານ ນາງ ຫັດສະດີ ອິນທິລາດ ເປັນຜູ້ຊ່ວຍວຽກກວດກາ.
(ຂ່າວ: ວຽງສະຫວັນ)
ຄໍາເຫັນ