ໂດຍການເປັນປະທານຂອງ ສະຫາຍ ເພັດສະໝອນ ໄຊສະຫຍາ ຄະນະພັກຮາກຖານ ເລຂາໜ່ວຍພັກຄັງເງິນ ປະຈຳແຂວງວຽງຈັນ, ມີສະຫາຍ ສົມດີ ແກ້ວດາລາວິນ ຄະນະປະຈຳພັກແຂວງ ປະທານກວດກາພັກ ປະທານອົງການກວດກາລັດແຂວງ ຫົວໜ້າອົງການຕ້ານ ແລະ ສະກັດກັ່ນການສໍ້ລາດບັງຫຼວງ ແຂວງ, ມີແຂກຖືກເຊີນ ແລະ ຜູ້ແທນສົມບູນເຂົ້າຮ່ວມ.
ສະຫາຍ ໄຊພອນ ໄຊທອງປານ ຮອງເລຂາໜ່ວຍພັກຄັງເງິນ ປະຈຳແຂວງວຽງຈັນ ໄດ້ຜ່ານຮ່າງບົດລາຍງານການເມືອງທັງສອງພາກ, ຊຶ່ງໄດ້ສ່ອງແສງໃຫ້ເຫັນຜົນສຳເລັດໃນການຊີ້ນຳ-ນຳພາຕະຫຼອດໄລຍະ 5 ປີ (2020-2024) ຜ່ານມາ ທີ່ຄະນະພັກໄດ້ເອົາໃຈໃສ່ນໍາພາສະມາຊິກພັກ ຈັດຕັ້ງຜັນຂະຫຍາຍມະຕິຂອງກອງປະຊຸມ ຄັ້ງທີ III ເປັນຕົ້ນແມ່ນໄດ້ຕັ້ງໜ້າສຶກສາອົບຮົມການເມືອງ-ແນວຄິດ, ປັບປຸງການຈັດຕັ້ງພັກໃຫ້ມີຄວາມເຂັ້ມແຂງໜັກແໜ້ນ ຊີ້ນຳວຽກງານອົງການຈັດຕັ້ງມະຫາຊົນ ແລະ ວຽກງານວິຊາສະເພາະ ເຮັດໃຫ້ສະມາຊິກພັກມີແນວຄິດອຸ່ນອ່ຽນທຸນທ່ຽງ ເອົາໃຈໃສ່ປະຕິບັດໜ້າທີ່ການເມືອງທີ່ພັກມອບໝາຍໃຫ້ ຢ່າງມີຜົນສຳເລັດ ເປັນຕົ້ນແມ່ນໄດ້ເອົາໃຈໃສ່ແກ້ໄຂບັນຫາໜີ້ສິນໃຫ້ຫຼຸດລົງໃນແຕ່ລະປີ ໂດຍສະເພາະໜີ້ລ່ວງໜ້າບັນດາໂຄງການ, ບຸກຄົນ ສາມາດເກັບຄືນໄດ້ 5 ຕື້ 356 ລ້ານກວ່າກີບ ແລະ ໜີ້ລ່ວງໜ້າທີ່ຄຸມເຄືອແກ່ຍາວມາຫຼາຍປີຂອງບັນດາເມືອງ 1 ຕື້ 337 ລ້ານກວ່າກີບ, ຄຸ້ມຄອງບັນຊີ 471 ແລະ 48 ຂອງບັນດາພະແນກການ, ກົມກອງ ທີ່ເປີດໄວ້ໃນຄັງເງິນ ມີທັງໝົດ 169 ບັນຊີ ມີຍອດເຫຼືອທັງໝົດເກືອບ 63 ຕື້ກີບ. ການຈັດຕັ້ງປະຕິບັດລາຍຮັບ-ລາຍຈ່າຍງົບປະມານ ຜ່ານລະບົບຄັງເງິນ 5 ປີຜ່ານມາ ລາຍຮັບພູດສູນກາງ ປະຕິບັດໄດ້ 134 ຕື້ກວ່າກີບ, ລາຍຮັບທ້ອງຖິ່ນ ປະຕິບັດໄດ້ 1,430 ຕື້ກວ່າກີບ, ລາຍຮັບການດຸ່ນດ່ຽງຈາກສູນກາງ ປະຕິບັດໄດ້ 1,950 ຕື້ກວ່າກີບ. ສຳລັບລາຍຈ່າຍງົບປະມານ ປະຕິບັດໄດ້ 3,003 ຕື້ກວ່າກີບ. ຈາກນັ້ນ, ໃນກອງປະຊຸມ ຜູ້ແທນສົມບູນໄດ້ໃຊ້ສິດປະຊາທິປະໄຕຂອງຕົນປ່ອນບັດເລືອກເອົາຄະນະໜ່ວຍພັກຊຸດໃໝ່ ຊຶ່ງມີຜູ້ສະໝັກ 5 ສະຫາຍ, ເລືອກເອົາ 3 ສະຫາຍ, ກອງປະຊຸມຄັ້ງປະຖົມມະລຶກໄດ້ເປັນເອກະພາບເລືອກເອົາ ສະຫາຍ ເພັດສະໝອນ ໄຊສະຫຍາ ເປັນເລຂາ, ສະຫາຍ ໄຊພອນ ໄຊທອງປານ ເປັນຮອງເລຂາ ທັງເປັນຜູ້ກວດກາ, ສະຫາຍ ນາງ ກອງມີ ສໍພາບມີໄຊ ເປັນຄະນະ.
(ແຫຼ່ງຂ່າວ: ແຂວງວຽງຈັນ)
ຄໍາເຫັນ