ສໍາເລັດຊຸດຝຶກອົບຮົມໃຫ້ເຈົ້າໜ້າທີ່ຈະລາຈອນ ເພື່ອກຽມຄວາມພ້ອມໃນການປັບປ່ຽນທິດທາງການສັນຈອນໃນ 9 ເສັ້ນທາງຢູ່ນະຄອນຫຼວງວຽງຈັນ

ພະແນກໂຍທາທິການ ແລະ ຂົນສົ່ງນະຄອນຫຼວງວຽງຈັນ (ຍທຂ ນວ) ຮ່ວມກັບໂຄງການຂົນສົ່ງແບບຍືນຍົງໃນຕົວເມືອງ ນວ ແລະ ພະແນກຈະລາຈອນ ນວ ໄດ້ສຳເລັດຊຸດຝຶກອົບຮົມໃຫ້ເຈົ້າໜ້າທີ່ຈະລາຈອນ ຜູ້ທີ່ປະຕິບັດວຽກງານຕົວຈິງເພື່ອກະກຽມຄວາມພ້ອມໃນການປັບປ່ຽນທິດທາງການສັນຈອນໃນຕົວເມືອງ ນວ ຂຶ້ນໃນວັນທີ 5 ເມສານີ້ ທີ່ໂຮງແຮມດອນຈັນພາເລດ ນວ ໂດຍການເປັນປະທານຂອງທ່ານບຸນຍະວັດ ນີຣະໄຊຍ໌ ຫົວໜ້າພະແນກ ຍທຂ ນວ;ມີທ່ານ ພັນເອກ ແກ້ວມາລາ ແສງທອງ ຮອງຫົວໜ້າກົມຕຳຫຼວດຈະລາຈອນ,ມີຄະນະຮັບຜິດຊອບໂຄງການຂົນສົ່ງແບບຍືນຍົງໃນຕົວເມືອງ ນວພ້ອມດ້ວຍຫົວໜ້າກອງຮ້ອຍຈະລາຈອນເມືອງສີໂຄດຕະບອງ, ຈັນທະບູລີ ແລະ ເມືອງສີສັດຕະນາກເຂົ້າຮ່ວມ.
ທ່ານບຸນຍະວັດ ນີຣະໄຊຍ໌ ກ່າວວ່າ: ການຝຶກອົບຮົມຄັ້ງນີ້ຈັດຂຶ້ນແນໃສ່ໃຫ້ເຈົ້າໜ້າທີ່ທຸກຄົນເຂົ້າໃຈເນື້ອໃນ ມີຄວາມເປັນເອກະພາບກ່ຽວກັບຮູບແບບ, ວິທີການ ແລະ ຂັ້ນຕອນການຈັດຕັ້ງປະຕິບັດການປ່ຽນທິດທາງການສັນຈອນ ຕາມແຈ້ງການຂອງທ່ານເຈົ້າຄອງ ນວ ໃຫ້ມີປະສິດທິຜົນ, ຜູ້ເຂົ້າຮ່ວມໄດ້ຮັບຟັງການລາຍງານ, ການນໍາສະເໜີແຜນຄຸ້ມຄອງການສັນຈອນ ແລະ ຄາດໝາຍຈັດຕັ້ງປະຕິບັດໃນຕໍ່ໜ້າ. ການຝຶກອົບຮົມໃນຄັ້ງນີ້ ຈະເປັນຂີດໝາຍອັນສຳຄັນທີ່ສຸດເພື່ອກະກຽມປັບປ່ຽນລະບົບການຈະລາຈອນຄືນໃໝ່ ແລະ ກຽມພ້ອມສຳລັບການປ່ຽນໂສມໜ້າໃໝ່ຂອງ ນວ.ພາຍຫຼັງການຝຶກອົບຮົມໃນຄັ້ງນີ້ແລ້ວທຸກສະຫາຍທີ່ເຂົ້າຮ່ວມຕ້ອງເຂົ້າໃຈດ້ວຍຄວາມເປັນເອກະພາບ ສາມາດອະທິບາຍໃຫ້ຄອບຄົວ ແລະ ສັງຄົມຮັບຮູ້ໄດ້ຢ່າງຖືກຕ້ອງ ບໍ່ໃຫ້ມີຫາງສຽງຈົ່ມວ່າຂອງປະຊາຊົນ. ພ້ອມດຽວກັນນີ້, ພະແນກ ຍທຂນວ ຈະນຳເອົາມະຕິຜົນກອງປະຊຸມຝຶກອົບຮົມດັ່ງກ່າວສືບຕໍ່ລາຍງານ ແລະ ຂໍທິດຊີ້ນຳຈາກຂັ້ນເທິງຖັດໄປ ເພື່ອຜັນຂະຫຍາຍເປັນແຈ້ງການ ແລະ ມະຕິຄຳສັ່ງແຕ່ລະໄລຍະ.
    ທ່ານ ພັນເອກ ແກ້ວມາລາ ແສງທອງ ກ່າວວ່າ: ປັດຈຸບັນການສັນຈອນໃນຕົວເມືອງແມ່ນມີຄວາມແອອັດ ຊຶ່ງການປັບປ່ຽນການສັນຈອນໃນເບື້ອງຕົ້ນກໍຈະມີຄວາມຫຍຸ້ງຍາກ ໂດຍສະເພາະການລະດົມແນວຄິດໃນການຂັບຂີ່ຕາມເສັ້ນທາງທີ່ປັບປ່ຽນທີ່ບໍ່ແມ່ນເລື່ອງງ່າຍ ແຕ່ແນວໃດກໍຕາມມັນຄືໜ້າທີ່ຄວາມຮັບຜິດຊອບຂອງເຈົ້າໜ້າທີ່ຈະລາຈອນທີ່ຈະຕ້ອງໄດ້ສຸມໃສ່ເພື່ອເຮັດໃຫ້ຜູ້ຂັບຂີ່ເຂົ້າໃຈ ທັງເຮັດໃຫ້ການສັນຈອນຮັບປະກັນໄດ້ຄວາມໂລ່ງລຽນ ປອດໄພ ເປັນລະບຽບຮຽບຮ້ອຍ ຫຼຸດຜ່ອນຄວາມແອອັດ ແລະ ຫຼຸດຜ່ອນການເກີດອຸບັດເຫດຕາມທ້ອງຖະໜົນ.ພາຍຫຼັງສຳເລັດການຝຶກອົບຮົມ ກໍໄດ້ມີການລົງຕົວຈິງໃນ9ເສັ້ນທາງ ທີ່ຈະໄດ້ມີການປັບປ່ຽນທິດທາງການສັນຈອນໃນນັ້ນມີເສັ້ນທາງແຄມຂອງຈາກສີ່ແຍກປາກປ່າສັກຮອດທາດຂາວຖະໜົນເຈົ້າຟ້າງຸ່ມ; ຈາກສີ່ແຍກປາກປ່າສັກຮອດທາດຂາວຖະໜົນສີຖານ; ຈາກຖະໜົນເສດຖາທິຣາດຮອດສີ່ແຍກປາກປ່າສັກ ຖະໜົນຂຸນບູລົມ; ຈາກວົງວຽນແຄມຂອງຮອດຖະໜົນສາມແສນໄທ ຖະໜົນເຈົ້າອານຸ;ຈາກຖະໜົນຂຸນບູລົມຮອດເຈົ້າຟ້າງຸ່ມຖະໜົນຟຣານຊິສອິນ; ຈາກເຈົ້າຟ້າງຸ່ມຮອດຖະໜົນເສດຖາທິຣາດ ຖະໜົນໜໍ່ແກ້ວຂຸນແມນ; ຈາກເຈົ້າຟ້າງຸ່ມຮອດຖະໜົນເສດຖາທິຣາດ ຖະໜົນແມນທາທຸຣາດ; ຈາກເຈົ້າຟ້າງຸ່ມຮອດຖະໜົນເສດຖາທິຣາດ ແລະ ຖະໜົນຕໍ່ໜ້າສະຖານທູດຝຣັ່ງ; ຈາກຖະໜົນເສດຖາທິຣາດຫາຖະໜົນຄູວຽງ.
    ໂຄງການຂົນສົ່ງແບບຍືນຍົງໃນຕົວເມືອງ ນວ ປະກອບດ້ວຍ 5 ໜ້າວຽກໃຫຍ່ຄື: 1) ສ້າງຕັ້ງໜ່ວຍງານຄຸ້ມຄອງການຂົນສົ່ງໃນຕົວເມືອງ; 2) ປັບປຸງຂອດບໍລິການຂົນສົ່ງສາທາລະນະ ແລະ ລະບົບລົດເມ BRT; 3) ລະບົບຄຸ້ມຄອງການສັນຈອນ; 4) ການຈັດສັນບ່ອນຈອດລົດ ແລະ 5) ການຂົນສົ່ງບໍ່ມີເຄື່ອງຈັກ (non-motorized transit).ແຜນຄຸ້ມຄອງການສັນຈອນສ້າງຂຶ້ນເພື່ອຮອງຮັບການພັດທະນາລະບົບຂົນສົ່ງລົດເມ BRT ແລະ ການສ້າງສະຖານີໃຫຍ່ (Transit Mall) ຢູ່ຖະໜົນເສດຖາທິຣາດເລີ່ມແຕ່ສາມແຍກໄຟແດງຂຸນບູລົມ (ວັດອິນແປງ) ເຖິງຮ້ານອາຫານຂອບໃຈເດີໄລຍະທາງ 600 ແມັດ. ດ້ວຍເຫດນັ້ນ, ການສັນຈອນໃນເຂດເມືອງສີໂຄດຕະບອງ, ຈັນທະບູລີ ແລະ ສີສັດຕະນາກທັງໝົດ 9 ເສັ້ນທາງຕົ້ນຕໍຈຶ່ງຕ້ອງໄດ້ມີການປັບປ່ຽນທິດທາງການສັນຈອນຮັບປະກັນຄວາມໂລ່ງລຽນ ແລະປອດໄພຊຶ່ງໂຄງການຂົນສົ່ງແບບຍືນຍົງໃນຕົວເມືອງນວ ມຸ່ງໝັ້ນທີ່ຈະຍົກລະດັບການຂົນສົ່ງສາທາລະນະ ແລະ ການເຄື່ອນໄຫວດ້ວຍຄວາມສະດວກສະບາຍ ແລະ ສ້າງຕົວເມືອງໃຫ້ຍືນຍົງເປັນມິດກັບຄົນຍ່າງໃນ ນວ ແນໃສ່ສ້າງລະບົບການຂົນສົ່ງມວນຊົນທີ່ມີປະສິດທິຜົນໃຫ້ແກ່ປະຊາຊົນ ໂດຍໃຊ້ລະບົບລົດເມໂດຍສານ BRT.
ຂ່າວ-ພາບ: ຍຸພິນທອງ