ຄະນະປະຈໍາສະພາແຫ່ງຊາດສະແດງຄວາມຊົມເຊີຍຕໍ່ອົງການໄອຍະການປະຊາຊົນສູງສຸດທີ່ໄດ້ເອົາໃຈໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີXI ຂອງພັກ, ມະຕິຂອງກົມການເມືອງສູນກາງພັກວ່າດ້ວຍການຍົກສູງຄຸນນະພາບການດໍາເນີນຄະດີຕາມຂະບວນຍຸຕິທໍາ, ມະຕິວ່າດ້ວຍການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍ, ແຜນພັດທະນາເສດຖະກິດ-ສັງຄົມແຫ່ງລັດ 5 ປີຄັ້ງທີIX, ມະຕິກອງປະຊຸມສະພາແຫ່ງຊາດໃຫ້ເປັນອັນລະອຽດແລະໄດ້ນໍາພາປະຕິບັດມີຜົນສໍາເລັດຢ່າງຕັ້ງໜ້າເປັນຕົ້ນການສຶກສາອົບຮົມການເມືອງ-ແນວຄິດ,ການປັບປຸງກົງຈັກການຈັດຕັ້ງແລະກໍ່ສ້າງພັກ-ພະນັກງານ, ວຽກງານກວດກາແລະຕ້ານການສໍ້ລາດບັງຫຼວງ, ການພັດທະນາກໍ່ສ້າງພື້ນຖານໂຄງລ່າງແລະການພົວພັນຮ່ວມມືກັບຕ່າງປະເທດ. ພົ້ນເດັ່ນແມ່ນລະບົບການຈັດຕັ້ງຂອງອົງການໄອຍະການປະຊາຊົນໄດ້ຮັບການປັບປຸງໃຫ້ໜັກແໜ້ນເຂັ້ມແຂງເທື່ອລະກ້າວ, ໄດ້ຂະຫຍາຍຫ້ອງໃຫ້ຄໍາປຶກສາທາງດ້ານກົດໝາຍແກ່ປະຊາຊົນ, ການສັ່ງຟ້ອງຜູ້ຖືກຫາຂຶ້ນສານໄດ້ຮັບການປັບປຸງແລະມີຄຸນນະພາບດີຂຶ້ນ; ການຕິດຕາມກວດກາການເຄົາລົບແລະປະຕິບັດກົດໝາຍ, ການອອກແລະການນໍາໃຊ້ນິຕິກໍາຕ່າງໆຂອງກະຊວງ-ອົງການແລະອົງການປົກຄອງທ້ອງຖິ່ນ, ການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນ, ການດໍາເນີນຄະດີຢູ່ສານ, ຢູ່ຄ້າຍຄຸມຂັງ-ດັດສ້າງແລະການຕິດຕາມກວດກາການປະຕິບັດຄໍາຕັດສິນຂອງສານໄດ້ຮັບການພັດທະນາດີຂຶ້ນ,ພ້ອມທັງໄດ້ສໍາເລັດການສ້າງກົດໝາຍວ່າດ້ວຍພະນັກງານໄອຍະການປະຊາຊົນແລະປັບປຸງກົດໝາຍວ່າດ້ວຍອົງການໄອຍະການປະຊາຊົນລວມທັງນິຕິກໍາໃຕ້ກົດໝາຍທີ່ເປັນບ່ອນອີງໃຫ້ແກ່ການເຄື່ອນໄຫວວຽກງານຂອງອົງການໄອຍະການປະຊາຊົນມີປະສິດທິພາບແລະປະສິດທິຜົນປະກອບສ່ວນເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍແລະຍຸຕິທໍາ.
ການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2025, ຄະນະປະຈໍາສະພາແຫ່ງຊາດເຫັນວ່າອອປສ ໄດ້ຜັນຂະຫຍາຍມະຕິກອງປະຊຸມສະພາແຫ່ງຊາດສະບັບເລກທີ 142/ສພຊ, ລົງວັນທີ 11 ທັນວາ 2024 ດ້ວຍຄວາມຮັບຜິດຊອບສູງແລະມີຜົນສໍາເລັດຕາມແຜນການທີ່ວາງໄວ້ເປັນຕົ້ນການປັບປຸງກົງຈັກການຈັດຕັ້ງຊຶ່ງໄດ້ສ້າງຕັ້ງອົງການໄອຍະການປະຊາຊົນເຂດປະຈໍາເມືອງໄດ້ 5 ເມືອງ, ພະນັກງານອົງການໄອຍະການປະຊາຊົນແຕ່ລະຂັ້ນໄດ້ຮັບການຍົກລະດັບເຮັດໃຫ້ການປະຕິບັດພາລະບົດບາດການສັ່ງຟ້ອງຜູ້ຖືກຫາຂຶ້ນສານແລະການຕິດຕາມກວດກາການເຄົາລົບແລະປະຕິບັດກົດໝາຍໃນການດໍາເນີນຄະດີຕາມຂະບວນຍຸຕິທໍາມີຄຸນນະພາບດີຂຶ້ນ.
ຄຽງຄູ່ກັບດ້ານດີແລະຜົນສໍາເລັດດັ່ງກ່າວ, ຄະນະປະຈໍາສະພາແຫ່ງຊາດສັງເກດເຫັນວ່າການຈັດຕັ້ງປະຕິບັດແຜນການ 5 ປີຜ່ານມາແລະວຽກງານປະຈໍາປີ 2025 ຂອງ ອອປສກໍຍັງມີບາງດ້ານບໍ່ທັນບັນລຸຕາມແຜນການທີ່ກໍານົດໄວ້ແລະຄວນສືບຕໍ່ເອົາໃຈໃສ່. ໃນທິດທາງແຜນການ 5 ປີ (2026-2030) ແລະວຽກງານຈຸດສຸມປີ 2026 ຄະນະປະຈໍາສະພາແຫ່ງຊາດເຫັນດີເປັນເອກະພາບໂດຍພື້ນຖານຕໍ່ທິດທາງທິດທາງແຜນການ 5 ປີ (2026-2030) ຂອງອອປສທີ່ໄດ້ກໍານົດ 6 ແຜນງານ 27 ໂຄງການແລະ 104 ກິດຈະກໍາຊຶ່ງຈະນໍາສະເໜີຕໍ່ກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີX ແຕ່ສັງເກດເຫັນວ່າການກໍານົດແຜນດັ່ງກ່າວໄດ້ມີແຜນງານ, ໂຄງການແລະກິດຈະກໍາຫຼາຍຂຶ້ນກວ່າເກົ່າຈິ່ງສະເໜີໃຫ້ມີການທົບທວນແລະສົມທຽບກັບຜົນໄດ້ຮັບຂອງການຈັດຕັ້ງປະຕິບັດແຜນການໃນ 5 ປີຜ່ານມາໃຫ້ລະອຽດຕື່ມອີກເພື່ອເປັນພື້ນຖານໃຫ້ແກ່ການວາງແຜນໃນ 5 ປີຕໍ່ໜ້າໃຫ້ເປັນແຜນທີ່ມີລັກສະນະວິທະຍາສາດ, ເຊື່ອມສານເຂົ້າກັບແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີX ທັງຮັບປະກັນໃຫ້ມີຄວາມສອດຄ່ອງລະຫວ່າງແຜນວຽກ, ແຜນຄົນ, ແຜນເງິນແລະສາມາດຈັດຕັ້ງປະຕິບັດໄດ້.
ສໍາລັບທິດທາງແຜນການວຽກງານຈຸດສຸມປີ 2026 ຂອງ ອອປສ,ໂດຍພື້ນຖານຄະນະປະຈໍາສະພາແຫ່ງຊາດແມ່ນເຫັນດີເປັນເອກະພາບແຕ່ເພື່ອເຮັດໃຫ້ທິດທາງແຜນການດັ່ງກ່າວໄດ້ຮັບການຈັດຕັ້ງປະຕິບັດມີຜົນສໍາເລັດຄະນະປະຈໍາສະພາແຫ່ງຊາດສະເໜີ 7 ທັດສະນະດັ່ງນີ້:
1).ໃຫ້ເປັນເຈົ້າການນໍາພາ-ຊີ້ນໍາການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີXII ຂອງພັກ, ມະຕິກອງປະຊຸມໃຫຍ່ອົງຄະນະພັກອົງການໄອຍະການປະຊາຊົນສູງສຸດສະໄຫມທີVI, ມະຕິກອງປະຊຸມສະພາແຫ່ງຊາດຊຸດທີX ແລະແຜນພັດທະນາເສດຖະກິດ-ສັງຄົມແຫ່ງຊາດຄັ້ງທີX ໃຫ້ເປັນທິດທາງແຜນການລະອຽດເພື່ອນໍາພາ-ຊີ້ນໍາອົງການໄອຍະການປະຊາຊົນແຕ່ລະຂັ້ນຈັດຕັ້ງປະຕິບັດໃຫ້ມີປະສິດທິພາບແລະປະສິດທິຜົນ;
2). ສືບຕໍ່ຄົ້ນຄວ້າປັບປຸງກົງຈັກການຈັດຕັ້ງຂອງອົງການໄອຍະການປະຊາຊົນແຕ່ລະຂັ້ນທີ່ຍັງບໍ່ທັນສໍາເລັດຕາມແຜນການໃຫ້ສອດຄ່ອງກັບການປັບປຸງກົງຈັກຂອງອົງການປົກຄອງຖິ່ນຕາມລັດຖະທໍາມະນູນປີ 2025; ເອົາໃຈໃສ່ບໍາລຸງສ້າງພະນັກງານໄອຍະການປະຊາຊົນທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ຈັນຍາບັນ, ຈັນຍາທາ, ຄວາມຮູ້ຄວາມສາມາດໃຫ້ມີຄຸນນະພາບສູງຂຶ້ນເພື່ອເຮັດໃຫ້ການປະຕິບັດໜ້າທີ່ວຽກງານມີຄວາມເຂັ້ມງວດເດັດຂາດ,ພ້ອມທັງປະເມີນການປະຕິບັດໜ້າທີ່ຂອງພະນັກງານໄອຍະການປະຊາຊົນແຕ່ລະຂັ້ນຕາມຄໍາຂວັນ 3 ມີ 4 ຮັບປະກັນໃຫ້ມີຄຸນນະພາບແລະໃຫ້ທົບທວນຄືນການກໍານົດຕົວຊີ້ບອກຂອງຄໍາຂວັນດັ່ງກ່າວໃຫ້ສອດຄ່ອງກັບພາລະບົດບາດ, ໜ້າທີ່ແລະຂອບເຂດສິດຂອງອົງການໄອຍະການປະຊາຊົນໃນໄລຍະໃໝ່;
3).ເພີ່ມທະວີການສ້າງຄວາມເຂັ້ມແຂງໃຫ້ແກ່ພະນັກງານໄອຍະການໃຫ້ເປັນລະບົບຕໍ່ເນື່ອງເພື່ອຮັບປະກັນການປະຕິບັດພາລະບົດບາດການສັ່ງຟ້ອງຜູ້ຖືກຫາຂຶ້ນສານແລະຕິດຕາມກວດກາການເຄົາລົບແລະປະຕິບັດກົດໝາຍຂອງອົງການດໍາເນີນຄະດີຕາມຂະບວນຍຸຕິທໍາໃຫ້ມີຄວາມຖືກຕ້ອງຕາມກົດໝາຍ, ສອດຄ່ອງກັບຄວາມເປັນຈິງແລະຮັບປະກັນໃຫ້ມີຄວາມຍຸຕິທໍາ;
4). ເອົາໃຈໃສ່ຕິດຕາມກວດກາການປະຕິບັດກົດໝາຍໃນສະຖານທີ່ກັກຕົວ, ສະຖານທີ່ກັກຂັງ, ສູນດັດສ້າງ, ຄ້າຍດັດສ້າງແລະຮັບປະກັນໃນການຈັບຕົວ, ກັກຕົວ, ການກັກຂັງ, ການປ່ອຍຕົວໃຫ້ຖືກຕ້ອງຕາມກົດໝາຍ;ພ້ອມນັ້ນ, ກໍສຸມໃສ່ແກ້ໄຂບັນຫາການກັກຂັງຜູ້ຖືກຫາແລະນັກໂທດເກີນກໍານົດເວລາຕາມຄໍາຕັດສີນ, ຄໍາພິພາກສາຂອງສານແລະຕາມກົດໝາຍກໍານົດ;
5). ເພີ່ມທະວີການຕິດຕາມກວດກາແລະຊຸກຍູ້ອົງການປະຕິບັດຄໍາຕັດສິນຂອງສານໃນການນໍາເອົາຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດມາປະຕິບັດໃຫ້ຮັບປະກັນຄວາມຖືກຕ້ອງ, ຄົບຖ້ວນແລະທັນກໍານົດເວລາຕາມກົດໝາຍແລະລະບຽບການລວມທັງການປະສານສົມທົບກັບກະຊວງຍຸຕິທໍາແລະພາກສ່ວນກ່ຽວຂ້ອງເພື່ອຄົ້ນຄວ້າຊອກຫາສາເຫດແລະມາດຕະການແກ້ໄຂສະພາບຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດແຕ່ບໍ່ສາມາດປະຕິບັດໄດ້ທີ່ຍັງຄ້າງເປັນຈໍານວນຫຼວງຫຼາຍເພື່ອແກ້ໄຂບັນຫາດັ່ງກ່າວໃຫ້ເປັນຮູບປະທໍາດີຂຶ້ນ;
6). ສືບຕໍ່ຄົ້ນຄວ້າປັບປຸງກົນໄກການປະສານສົມທົບກັບພາກສ່ວນທີ່ກ່ຽວຂ້ອງໂດຍສະເພາະແມ່ນ 4 ພາກສ່ວນດໍາເນີນຄະດີຕາມຂະບວນຍຸຕິທໍາໃຫ້ແໜ້ນແຟ້ນແລະກົມກຽວ, ຍົກສູງຄວາມຮັບຜິດຊອບການເມືອງຂອງແຕ່ລະພາກສ່ວນເຮັດໃຫ້ການດໍາເນີນຄະດີສອດຄ່ອງຕາມພາລະບົດບາດ, ສິດແລະໜ້າທີ່ຂອງແຕ່ລະພາກສ່ວນເພື່ອຮັບປະກັນໃຫ້ມີຄວາມເປັນເອກະພາບ, ຖືກຕ້ອງຕາມທີ່ໄດ້ກໍານົດໄວ້ໃນລັດຖະທໍາມະນູນແລະກົດໝາຍໃຫ້ດີຂຶ້ນ;
7).ຄົ້ນຄວ້າສ້າງ, ປັບປຸງກົດໝາຍແລະບັນດານິຕິກໍາໃຕ້ກົດໝາຍທີ່ຢູ່ໃນຄວາມຮັບຜິດຊອບຂອງຕົນເປັນຕົ້ນການຕິດຕາມກວດກາການດໍາເນີນຄະດີແພ່ງທີ່ພົວພັນກັບຜົນປະໂຫຍດຂອງລັດ, ລວມໝູ່, ເດັກແລະບຸກຄົນທີ່ບໍ່ມີຄວາມສາມາດທາງດ້ານການປະພຶດໃຫ້ມີຄວາມສອດຄ່ອງກັບກົດໝາຍວ່າດ້ວຍການດໍາເນີນຄະດີແພ່ງສະບັບປັບປຸງປີ 2024, ພ້ອມທັງຈັດຕັ້ງການໂຄສະນາເຜີຍແຜ່ແນະນໍາໃຫ້ແກ່ພະນັກງານໄອຍະການປະຊາຊົນແຕ່ລະຂັ້ນລວມທັງຄູ່ຄວາມແລະຜູ້ເຂົ້າຮ່ວມໃນການດໍາເນີນຄະດີໄດ້ຮັບຮູ້ແລະເຂົ້າໃຈສິດ, ພັນທະ, ຂັ້ນຕອນຂອງການເນີນຄະດີໃຫ້ເລິກເຊິ່ງແລະທົ່ວເຖິງ.
(ຂ່າວ: ສຸກສະຫວັນ, ພາບ: ບຸນຕອມ)
ຄໍາເຫັນ