ປະຊາຊົນລາວບັນດາເຜົ່າ; ບັນດາສະຫາຍໃນອົງການຈັດຕັ້ງພັກ, ລັດຖະບານ; ບັນດາທ່ານໃນອົງການ ຈັດຕັ້ງເອກະຊົນ, ອົງການຈັດຕັ້ງສາກົນ, ຊາວຕ່າງດ້າວທີ່ເຂົ້າມາດຳເນີນທຸລະກິດ, ດຳລົງຊີວິດຢູ່ສປປລາວທີ່ນັບຖືແລະ ຮັກແພງ !.
ຂ້າພະເຈົ້າ ຕາງໜ້າໃຫ້ລັດຖະບານ ກໍຄືຄະນະຮັບຜິດຊອບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແລະ ໃນນາມສ່ວນຕົວ ຂໍນໍາເອົາຄວາມຢ້ຽມຢາມຖາມຂ່າວອັນອົບອຸ່ນ ຄວາມສາ ມັກຄີຮັກແພງອັນສະໜິດສະໜົມມາຍັງພໍ່ແມ່ປະຊາຊົນ ເພື່ອນມິດສະຫາຍ ນາຍ ແລະ ພົນທະຫານ ນາຍ ແລະ ພົນຕຳຫຼວດ ແລະ ພະນັກງານ-ລັດຖະກອນໃນຂອບເຂດທົ່ວປະເທດ ເນື່ອງໃນໂອກາດວັນແຫ່ງຊາດຕ້ານຢາເສບຕິດ ຄົບຮອບ 22 ປີ (12 ຕຸລາ 2001-12 ຕຸລາ 2023) ທີ່ໄດ້ໝູນວຽນມາບັນຈົບຄົບຮອບອີກວາລະໜຶ່ງໃນມື້ນີ້ ຊຶ່ງຈະເປັນໂອກາດທີ່ດີໃຫ້ພວກເຮົາໄດ້ສະຫຼຸບຜົນງານ, ຖອດຖອນບົດຮຽນໃນການຈັດຕັ້ງປະຕິບັດວຽກງານກວດກາ, ຄວບຄຸມ, ສະກັດກັ້ນ ແລະ ແກ້ໄຂບັນຫາຢາເສບຕິດ ໂດຍສະເພາະການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະໜຶ່ງປີທີ່ຜ່ານມາ.
ເປັນທີ່ຊາບກັນແລ້ວວ່າ: ສະພາບບັນຫາຢາເສບຕິດໄດ້ຂະຫຍາຍເປັນວົງກວ້າງໄປທົ່ວໂລກ ມັນໄດ້ເພີ່ມຄວາມເປັນອັນຕະລາຍຮ້າຍແຮງຂຶ້ນກວ່າເກົ່າ ຊຶ່ງໄດ້ຕິດພັນເຊື່ອມໂຍງກັບການກໍ່ການຮ້າຍ, ອາຊະຍາກໍາຂ້າມຊາດ, ການຟອກເງິນ ແລະ ອາຊະຍາກໍາທີ່ໃຊ້ກຳລັງຮຸນແຮງຕ່າງໆ ທີ່ມີທ່າອ່ຽງເພີ່ມຂຶ້ນໃນແຕ່ລະປີ ກາຍເປັນໄພຂົ່ມຂູ່ຕໍ່ສະພາບການພັດທະນາເສດຖະກິດ-ວັດທະນະທຳ-ສັງຄົມ ກໍຄືສະຖຽນລະພາບທາງດ້ານການເມືອງ ແລະ ຄວາມໝັ້ນຄົງໃນພາກພື້ນກໍຄືບັນດາປະຊາຊາດໃນທົ່ວໂລກ.
ສປປ ລາວ ມີທີ່ຕັ້ງພູມສາດໃນອານຸພາກພື້ນລຸ່ມແມ່ນໍ້າຂອງ, ມີຊາຍແດນຕິດກັບຫຼາຍປະເທດ; ສປປ ລາວ ໄດ້ເປີດກວ້າງການພົວພັນຮ່ວມມືກັບພາກພື້ນ ແລະ ສາກົນ ຕາມທິດເຊື່ອມໂຍງ, ເຊື່ອມຈອດກັບບັນດາປະເທດ ຊຶ່ງເປັນເງື່ອນໄຂໃຫ້ລາວກາຍເປັນທາງຜ່ານໃນການລັກລອບ, ຄ້າຂາຍ, ຂົນສົ່ງຢາເສບຕິດ ແລະ ສານເຄມີຕົ້ນທີ່ເປັນສ່ວນປະສົມໃນການຜະລິດຢາເສບຕິດ.
ສະພາບບັນຫາຢາເສບຕິດຢູ່ ສປປ ລາວ ໄດ້ແຜ່ລະບາດເປັນວົງກວ້າງ, ແຕ່ຕົວເມືອງໄປສູ່ຊົນນະບົດໃນຫຼາຍລະດັບທີ່ແຕກຕ່າງກັນ; ໄດ້ກາຍເປັນສາເຫດພາໃຫ້ເກີດບັນຫາປະກົດການຫຍໍ້ທໍ້ ແລະ ອາຊະຍາກໍາປະເພດຕ່າງໆ; ຈໍານວນຄະດີຢາເສບຕິດ, ຜູ້ຖືກຫາ, ນັກໂທດ, ຜູ້ຕິດຢາເສບຕິດ ແລະ ຈໍານວນຢາເສບຕິດແຕ່ລະປະເພດທີ່ຍຶດ ແລະ ຈັບໄດ້ເພີ່ມຂຶ້ນຢ່າງໜ້າເປັນຫ່ວງໃນແຕ່ລະປີ; ເລ່ຫຼ່ຽມການເຄື່ອນໄຫວຂົນສົ່ງ, ຄ້າຂາຍ, ຜະລິດຢາເສບຕິດມີລັກສະນະເລິກແລບແນບນຽນດ້ວຍຫຼາຍວິທີການ, ຮູບການທີ່ສະລັບສັບຊ້ອນ; ມີການຈັດຕັ້ງເຄື່ອນໄຫວເປັນກຸ່ມເຄືອຂ່າຍແໜ້ນໜາ, ເຊື່ອມໂຍງທັງພາຍໃນ ແລະ ຕ່າງປະເທດ; ນໍາໃຊ້ພາຫະນະ ແລະ ອຸປະກອນທີ່ທັນສະໄໝ, ມີອາວຸດກຽມພ້ອມຕອບໂຕ້ກັບເຈົ້າໜ້າທີ່ຂອງພວກເຮົາ.
ຍ້ອນເຫັນໄດ້ເຖິງໄພອັນຕະລາຍ ແລະ ຄວາມຈໍາເປັນຕົວຈິງ ໃນການແກ້ໄຂບັນຫາດັ່ງກ່າວໃຫ້ເດັດຂາດ, ໂປ່ງໃສ, ເປັນມືອາຊີບ; ໃນປີຜ່ານມາ, ກະຊວງປ້ອງກັນຄວາມສະຫງົບ ໃນນາມອົງການເສນາທິການໃຫ້ສູນກາງພັກ, ລັດຖະບານໄດ້ນຳພາ, ຊີ້ນໍາການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ແຕ່ 2021-2023 ຢ່າງຈົດຈໍ່ຕະຫຼອດມາ; ມາຮອດນະເວລານີ້ ແມ່ນເປັນໄລຍະທ້າຍຂອງການຈັດຕັ້ງປະຕິບັດວາລະດັ່ງກ່າວ ຊຶ່ງໄດ້ສຸມໃສ່ 6 ວຽກຈຸດສຸມຂອງວາລະ; ທຸກຂະແໜງການທີ່ກ່ຽວຂ້ອງແມ່ນໄດ້ຈັດຕັ້ງຜັນຂະ ຫຍາຍຢ່າງເປັນຂະບວນຟົດຟື້ນ ແລະ ເຂົ້າສູ່ຊີວິດຕົວຈິງ; ໂດຍສະເພາະວຽກງານສ້າງຄວາມຮັບຮູ້ທົ່ວສັງຄົມດ້ວຍການປູກຈິດສຳນຶກ, ສຶກສາອົບຮົມ, ໂຄສະນາເຜີຍແຜ່ລະບຽບກົດໝາຍ ຜົນຮ້າຍຂອງຢາເສບຕິດ, ບັນດາກິດຈະກຳປິ່ນອ້ອມທີ່ສະແດງເຖິງຜົນຮ້າຍຂອງຢາເສບຕິດຢ່າງກວ້າງຂວາງ, ຕໍ່ເນື່ອງ ພິເສດແມ່ນໃນກຸ່ມນັກຮຽນ, ນັກສຶກສາ, ຊາວໜຸ່ມ, ໄວໜຸ່ມ ແລະ ປະຊາຊົນລາວບັນດາເຜົ່າ ຈຶ່ງເຫັນໄດ້ວ່າພົນລະເມືອງລາວສ່ວນຫຼາຍແມ່ນມີຄວາມຮັບຮູ້ເຂົ້າໃຈຢ່າງຖືກຕ້ອງຕໍ່ກັບພິດໄພ, ຜົນຮ້າຍ ແລະ ຄວາມເປັນອັນຕະລາຍຂອງຢາເສບຕິດ; ພ້ອມນີ້ໄດ້ສ້າງຄວາມເຂັ້ມແຂງໃຫ້ທົ່ວສັງຄົມ ໂດຍການເຮັດໃຫ້ທົ່ວສັງຄົມຕື່ນຕົວເຂົ້າຮ່ວມສະກັດກັ້ນ ແລະ ແກ້ໄຂບັນຫາຢາເສບຕິດ ເປັນຕົ້ນ: ສະຖາບັນຄອບຄົວ, ບ້ານ, ຊຸມຊົນ, ພາກລັດ, ພາກເອກະຊົນໄດ້ມີສ່ວນຮ່ວມຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ທຸກພາກສ່ວນ, ທຸກໜ່ວຍງານທີ່ກ່ຽວຂ້ອງ ກໍໄດ້ເອົາໃຈໃສ່ໃກ້ຊິດ, ແທດເຖິງຮາກຖານປະຊາຊົນ; ດ້ວຍການນໍາພາ-ຊີ້ນໍາເຮັດຕົວຈິງໃນຫຼາຍວິທີ ທີ່ເປັນລະບົບ; ນອກນັ້ນ, ພວກເຮົາ ຍັງໄດ້ເອົາໃຈໃສ່ສ້າງເງື່ອນໄຂອໍານວຍຄວາມສະດວກ ໃຫ້ບັນດາຄອບຄົວຂອງປະຊາຊົນບັນດາເຜົ່າຢູ່ເຂດຫ່າງໄກ,ຫັນໄປປະກອບອາຊີບທີ່ໝັ້ນຄົງ, ຖືກກົດໝາຍດ້ວຍການປູກພືດທົດແທນ ພືດທີ່ມີສານເສບຕິດ; ສົ່ງເສີມການລ້ຽງ ສັດ, ປູກພືດຜັກເປັນສິນຄ້າເພື່ອຈຳໜ່າຍພາຍໃນ ແລະ ສົ່ງອອກຂາຍຕ່າງປະເທດ. ສໍາລັບຜູ້ຖືກເຄາະຮ້າຍຈາກຢາເສບຕິດ ແມ່ນໄດ້ຮັບການບຳບັດປິ່ນປົວ, ຟື້ນຟູຢູ່ໃນສູນປິ່ນປົວ ແລະ ໂຮງໝໍຊຸມຊົນຂອງລັດໄດ້ຢ່າງມີປະສິດທິ ພາບດີພໍສົມຄວນ ແລະ ລັດຖະບານກໍໄດ້ມີທິດປັບປຸງ, ຂະຫຍາຍໂຮງໝໍຊຸມຊົນເພື່ອເປັນບ່ອນໃຫ້ຄໍາປຶກສາ, ປິ່ນ ປົວເຮັດໃຫ້ຜູ້ເຄາະຮ້າຍເຫຼົ່ານັ້ນໄດ້ກັບຄືນ ເປັນຄົນທີ່ມີຄຸນຄ່າໃນສັງຄົມ; ຄຽງຄູ່ກັນນັ້ນ, ລັດຖະບານຍັງໄດ້ສຸມໃສ່ ໃຫ້ທຸກພາກສ່ວນຮ່ວມກັນປະຕິບັດວຽກງານ 3 ສ້າງຕິດພັນກັບການສ້າງບ້ານໃຫ້ເປັນຫົວໜ່ວຍພັດທະນາ ໂດຍໄດ້ສ້າງບ້ານ, ໂຮງຮຽນ, ກົມກອງ, ຫົວໜ່ວຍການຜະລິດ, ບໍລິການທັງພາກລັດ ແລະ ເອກະຊົນ ຢູ່ທ້ອງຖິ່ນຕ່າງໆ ໃຫ້ປອດຈາກຢາເສບຕິດ; ໄດ້ເອົາໃຈໃສ່ໃຫ້ຄວາມສໍາຄັນຕໍ່ການປະຕິບັດມາດຕະການດ້ານກົດໝາຍຕໍ່ຜູ້ກະທຳຜິດ;ສະເພາະໃນປີນີ້, ເຈົ້າໜ້າທີ່ປ້ອງກັນຄວາມສະຫງົບ ສາມາດສະກັດກັ້ນ ແລະ ຕ້ານຢາເສບຕິດໄດ້ຫຼາຍກໍລະນີ. ໄດ້ເພີ່ມທະວີຄວາມເປັນເຈົ້າການໃນການຕິດຕາມ, ກວດກາ ແລະ ແກ້ໄຂບັນຫາດັ່ງກ່າວຢ່າງຕັ້ງໜ້າ ໂດຍໄດ້ມ້າງຄະດີ, ຢຶດຢາເສບຕິດ, ຢຶດອາວຸດເສິກ, ຢຶດຊັບສິນ, ວັດຖຸຂອງກາງ, ສານເຄມີຕ່າງໆທີ່ພວກກຸ່ມຄົນບໍ່ດີນໍາມາຜະ ລິດເປັນຢາເສບຕິດ. ທີ່ສຳຄັນສາມາດຈັບກຸມຜູ້ກະທໍາຜິດມາດຳເນີນຄະດີຕາມລະບຽບກົດໝາຍ.
ພັກ-ລັດຖະບານ ຍັງໄດ້ເອົາໃຈໃສ່ເພີ່ມທະວີການຮ່ວມມືກັບພາກພື້ນ ແລະ ສາກົນ. ໃນເດືອນສິງຫາ 2023 ຜ່ານມາ, ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມລັດຖະມົນຕີອາຊຽນ ວ່າດ້ວຍບັນຫາຢາເສບຕິດຄັ້ງທີ 8 ທີ່ນະຄອນຫຼວງວຽງຈັນ ຊຶ່ງສະແດງໃຫ້ເຫັນວ່າບັນດາປະເທດໃນທົ່ວໂລກ ໄດ້ຖືເອົາວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນວຽກງານທີ່ສໍາຄັນ ທີ່ຈະພ້ອມກັນແກ້ໄຂໃຫ້ມີຜົນສໍາເລັດຢ່າງເປັນຮູບປະທຳ. ບັນດາປະເທດໄດ້ຕົກລົງເຫັນດີເປັນເອກະພາບຮ່ວມກັນ, ໂດຍສະເພາະແມ່ນໄດ້ຢືນຢັນຄືນຄຳໝັ້ນສັນຍາຢ່າງແຂງແຮງໃນການແກ້ໄຂບັນຫາຢາເສບຕິດຂອງບັນດາລັດຖະມົນຕີອາຊຽນຮັບຜິດຊອບວຽກງານດັ່ງກ່າວ ເພື່ອເຮັດໃຫ້ອາຊຽນປອດຢາເສບຕິດ ໂດຍສອດຄ່ອງກັບລະບຽບກົດໝາຍຂອງແຕ່ລະປະເທດສະມາຊິກອາຊຽນ.
ປະຊາຊົນລາວບັນດາເຜົ່າທີ່ຮັກແພງ !.
ປັດຈຸບັນ, ການຄ້າຂາຍ, ຂົນສົ່ງ, ມີຢາເສບຕິດໄວ້ໃນຄອບຄອງ ໄດ້ກາຍເປັນຂະບວນການຂ້າມຊາດ; ເຖິງວ່າຫຼາຍປະເທດໄດ້ເພີ່ມທະວີມາດຕະການທາງກົດໝາຍທີ່ເດັດຂາດ, ໂປ່ງໃສ, ເປັນມືອາຊີບ, ມີຄວາມພະຍາຍາມ ໃນການສະກັດກັ້ນ ແລະ ແກ້ໄຂບັນຫານີ້ຢ່າງຕໍ່ເນື່ອງປານໃດກໍຕາມ, ແຕ່ບັນຫາດັ່ງກ່າວຢູ່ພາກພື້ນ ກໍຄືຢູ່ໃນໂລກຍັງມີທ່າອ່ຽງ ແລະ ຄວາມຮຸນແຮງຂຶ້ນຢ່າງໜ້າເປັນຫ່ວງ; ສໍາລັບຢູ່ ສປປ ລາວ, ການເສບ, ການຄ້າຂາຍ, ຂົນສົ່ງຢາເສບຕິດໄດ້ລະບາດ, ແຜ່ລາມຈາກຕົວເມືອງໄປສູ່ເຂດຊົນນະບົດ, ຈາກທົ່ງພຽງຂຶ້ນສູ່ພູດອຍຫ່າງໄກສອກຫຼີກ;ປັດຈຸບັນຢູ່ຫຼາຍທ້ອງຖິ່ນໄດ້ມີຊາວໜຸ່ມ, ເຍົາວະຊົນ, ນັກຮຽນ, ນັກສຶກສາ, ກຳມະກອນຢູ່ຕາມໂຮງຈັກໂຮງງານ ແລະ ຊາວໄຮ່ນາຈຳນວນບໍ່ໜ້ອຍໄດ້ຕົກເປັນທາດຂອງຢາເສບຕິດ; ຈໍານວນຜູ້ໄດ້ຮັບເຄາະຮ້າຍສ່ວນໜຶ່ງໄດ້ພາກັນສ້າງຄວາມສັບສົນວຸ້ນວາຍ, ກໍ່ໃຫ້ເກີດມີສິ່ງຫຍໍ້ທໍ້ຕ່າງໆພາຍໃນຄອບຄົວ ກໍຄືຢູ່ຊຸມຊົນ, ເກີດມີການຂີ້ລັກງັດແງະ, ປຸ້ນຈີ່, ຊີງຊັບ, ຄາດຕະກຳ, ລັກພາຕົວ, ຄ້າໂສເພນີ, ລະເມີດກົດຈາລະຈອນພາໃຫ້ເກີດອຸບັດເຫດຕາມທ້ອງຖະ ໜົນຫຼວງ, ກໍ່ອາລະວາດຜິດຖຽງຕີກັນ ແລະ ອື່ນໆ. ດັ່ງນັ້ນ, ເພື່ອສະກັດກັ້ນບໍ່ໃຫ້ບັນຫາຢາເສບຕິດ ທີ່ເປັນຕົ້ນເຫດ ກໍ່ໃຫ້ເກີດປະກົດການຫຍໍ້ທໍ້ໃນສັງຄົມ ແລະ ເພີ່ມຄວາມຮຸນແຮງຂຶ້ນນັ້ນ. ໃນຕໍ່ໜ້າ, ຂ້າພະເຈົ້າຂໍສະເໜີມາຍັງກະຊວງ, ອົງການ ແລະ ທ້ອງຖິ່ນຂັ້ນຕ່າງໆ ຈົ່ງໄດ້ໃຫ້ຄວາມຮ່ວມມື ແລະ ເອົາໃຈໃສ່ບາງບັນຫາດັ່ງນີ້:
ໜຶ່ງ: ໃຫ້ຖືເອົາວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນພັນທະ, ເປັນໜ້າທີ່ຂອງທຸກພາກສ່ວນນັບແຕ່ຂັ້ນສູນກາງລົງຮອດທ້ອງຖິ່ນ. ພ້ອມທັງກໍານົດເອົາວຽກງານດັ່ງກ່າວເຂົ້າເປັນວຽກຈຸດສຸມໜຶ່ງ ທີ່ຕິດພັນກັບວຽກງານກໍ່ສ້າງຮາກຖານການເມືອງ ແລະ ແກ້ໄຂຄວາມທຸກຍາກຂອງປະຊາຊົນດ້ວຍການສືບຕໍ່ເອົາໃຈໃສ່ຢ່າງຕັ້ງໜ້າ ໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໄລຍະທ້າຍ ທັງຈັດຕັ້ງສະຫຼຸບ, ຕີລາຄາປະເມີນຜົນຂອງການຈັດຕັ້ງປະຕິບັດໃຫ້ບັນລຸຕາມຄາດໝາຍທີ່ວາງໄວ້.
ສອງ: ເພີ່ມທະວີຄວາມເອົາໃຈໃສ່ຕໍ່ວຽກງານໂຄສະນາ, ສຶກສາອົບຮົມ, ສ້າງຄວາມຮັບຮູ້ໃນທົ່ວສັງຄົມໃຫ້ກວ້າງຂວາງດ້ວຍຫຼາຍຮູບການ ເພື່ອປູກຈິດສຳນຶກໃຫ້ປະຊາຊົນລາວທຸກຊັ້ນຄົນໂດຍສະເພາະແມ່ຍິງ, ຊາວໜຸ່ມ, ເຍົາວະຊົນເຫັນໄດ້ເຖິງຜິດໄພ, ຜົນຮ້າຍຂອງຢາເສບຕິດ; ຮັບຮູ້, ເຂົ້າໃຈລະບຽບກົດໝາຍທີ່ພົວພັນກັບຢາເສບຕິດ; ປຸກລະດົມຂົນຂວາຍໃຫ້ເຂົາເຈົ້າເຂົ້າໃຈ, ຕື່ນຕົວ, ສະໝັກໃຈ ແລະ ມີສ່ວນຮ່ວມໃນວຽກງານສະກັດກັ້ນ ແລະ ແກ້ໄຂບັນຫາຢາເສບຕິດ.
ສາມ: ເອົາໃຈໃສ່ປັບປຸງພື້ນຖານໂຄງລ່າງ ເພື່ອຟື້ນຟູຕໍ່ຜູ້ຖືກເຄາະຮ້າຍ, ວຽກງານບຳບັດປິ່ນປົວ, ຟື້ນຟູສຸຂະພາບ ແລະ ຝຶກວິຊາຊີບເພື່ອໃຫ້ເຂົາເຈົ້າມີສຸຂະພາບແຂງແຮງດີຂຶ້ນເປັນປົກກະຕິ, ກັບຄືນສູ່ຄວາມອົບອຸ່ນຂອງຄອບຄົວ ແລະ ສັງຄົມ.
ສີ່: ສຸມໃສ່ການປະຕິບັດມາດຕະການທາງກົດໝາຍທີ່ມີຄວາມເດັດຂາດ, ໂປ່ງໃສ, ເປັນມືອາຊີບ; ສືບຕໍ່ສ້າງປັບປຸງກົດໝາຍ ແລະ ນິຕິກໍາໃຕ້ກົດໝາຍ ລວມທັງການສ້າງຄວາມເຂັ້ມແຂງໃນວຽກງານຄວບຄຸມ, ສະກັດກັ້ນແລະ ຕ້ານຢາເສບຕິດໃຫ້ບຸກຄະລາກອນ, ຂະແໜງການທີ່ກ່ຽວຂ້ອງ, ກົງຈັກຂັ້ນສູນກາງ ແລະ ທ້ອງຖິ່ນ ຮັບປະ ກັນໃຫ້ການແກ້ໄຂບັນຫາຢາເສບຕິດໄດ້ຮັບການຈັດຕັ້ງປະຕິບັດ, ມີປະສິດທິພາບ ແລະ ບັນລຸຄາດໝາຍທີ່ວາງໄວ້.
ຫ້າ: ສຸມໃສ່ປັບປຸງກົງຈັກກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ເປັນລະບົບ, ມີຄວາມເປັນເອກະພາບໃນທົ່ວປະເທດ, ສາມາດສະໜອງງົບປະມານຮັບໃຊ້ວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດໄດ້ໃນລະດັບໃດໜຶ່ງທີ່ແນ່ນອນ.
ຫົກ: ເອົາໃຈໃສ່ຕິດຕາມ, ກວດກາ ແລະ ສຶກສາອົບຮົມປະຊາຊົນບໍ່ໃຫ້ລັກລອບປູກພືດທີ່ມີສານເສບຕິດ; ຊຸກຍູ້, ສົ່ງເສີມ ແລະ ຊ່ວຍເຫຼືອໃຫ້ເຂົາເຈົ້າໄດ້ມີເງື່ອນໄຂຫັນໄປປະກອບອາຊີບອື່ນທີ່ໝັ້ນຄົງ ແທນການປູກພືດທີ່ມີສານເສບຕິດທີ່ຜິດກົດໝາຍ ພ້ອມທັງໃຫ້ດຳເນີນມາດຕະການດ້ານກົດໝາຍຢ່າງເດັດຂາດ, ໂປ່ງໃສ, ເປັນມືອາຊີບຕໍ່ຜູ້ກະທຳຜິດ.
ເຈັດ: ເພີ່ມທະວີການພົວພັນຮ່ວມມືກັບພາກພື້ນ ແລະ ສາກົນ ເພື່ອຍາດແຍ່ງເອົາການສະໜັບສະໜູນ,
ການແບ່ງປັນ, ການປະກອບສ່ວນເຂົ້າໃນການປູກພືດທົດແທນ ແລະ ການສະໜອງຂໍ້ມູນທີ່ຈໍາເປັນ ລວມທັງປະສານງານໃນການຕ້ານການລັກລອບຄ້າຂາຍ, ລຳລຽງຂົນສົ່ງເຂົ້າ-ອອກຢາເສບຕິດ ແລະ ສານເຄມີຕົ້ນຕາມບໍລິເວນຊາຍແດນ.
ນະໂອກາດວັນແຫ່ງຊາດຕ້ານຢາເສບຕິດປີນີ້, ຕາງໜ້າໃຫ້ສູນກາງພັກ, ລັດຖະບານ ກໍຄືຄະນະຮັບຜິດຊອບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ. ຂ້າພະເຈົ້າຂໍສະແດງຄວາມຍ້ອງຍໍຊົມເຊີຍຢ່າງສຸດໃຈຕໍ່ເຈົ້າໜ້າທີ່ປ້ອງກັນຊາດ, ປ້ອງກັນຄວາມສະຫງົບ ແລະ ທຸກພາກສ່ວນທີ່ກ່ຽວຂ້ອງທັງຢູ່ສູນກາງ ແລະ ທ້ອງຖິ່ນ ພ້ອມດ້ວຍປະຊາຊົນບັນດາເຜົ່າໃນທົ່ວປະເທດ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢ່າງຂຸ້ນຂ້ຽວ ແລະ ຕັ້ງໜ້າ. ພ້ອມກັນນີ້, ຂໍສະ ແດງຄວາມຂອບໃຈຢ່າງຈິງໃຈ ແລະ ຮູ້ບຸນຄຸນເປັນຢ່າງສູງມາຍັງປະເທດເພື່ອນມິດ, ອົງການຈັດຕັ້ງສາກົນ ແລະ ຜູ້ປະກອບການທັງພາກລັດ ແລະ ເອກະຊົນ, ທັງພາຍໃນ ແລະ ຕ່າງປະເທດ ທີ່ໄດ້ໃຫ້ການສະໜັບສະໜູນ, ອູ້ມຊູຊ່ວຍເຫຼືອທາງດ້ານທຶນຮອນ, ວັດຖຸອຸປະກອນຮັບໃຊ້ໃຫ້ແກ່ວຽກງານກວດກາ ແລະ ຄວບຄຸມຢາເສບຕິດຢູ່ ສປປ ລາວ ດ້ວຍດີຕະຫຼອດມາ ແລະ ຫວັງວ່າ ສປປ ລາວ ຈະໄດ້ຮັບການສະໜັບສະໜູນຊ່ວຍເຫຼືອດັ່ງກ່າວຕໍ່ໄປອີກໃນອະນາຄົດ.
(ຂໍຂອບໃຈ)
ຄໍາເຫັນ