ທີ່ຈັດຂຶ້ນເມື່ອວັນທີ 22 ມີນາຜ່ານມາ ທີ່ຫໍປະຊຸມແຫ່ງຊາດ; ສະຫາຍ ພົນໂທ ແສງນວນ ໄຊຍະລາດ ອະດີດຄະນະເລຂາທິການສູນກາງພັກອະດີດລັດຖະມົນຕີກະຊວງປ້ອງກັນປະເທດປະທານສະຫະພັນນັກຮົບເກົ່າແຫ່ງຊາດລາວ ໄດ້ຕາງໜ້າກຳລັງປະກອບອາວຸດ ຂຶ້ນກ່າວສະແດງຄວາມຮູ້ສຶກ ໂດຍໄດ້ກ່າວ “ສັນລະເສີນບົດບາດການນໍາພາຂອງພັກ ຕໍ່ກໍາລັງປະກອບອາວຸດ”.
ສະຫາຍ ພົນໂທ ແສງນວນ ໄຊຍະລາດ ກ່າວວ່າ: ຂ້າພະເຈົ້າມີຄວາມຮູ້ສຶກເປັນກຽດຢ່າງສູງແລະພາກພູມໃຈເປັນຢ່າງຍິ່ງທີ່ໄດ້ຮັບໂອກາດມາຮ່ວມແລະໄດ້ຮັບອະນຸຍາດໃຫ້ຕາງໜ້າກໍາລັງປະກອບອາວຸດ, ມີຄໍາເຫັນໃນພິທີສະເຫຼີມສະຫຼອງວັນສ້າງຕັ້ງພັກປະຊາຊົນປະຕິວັດລາວຄົບຮອບ70 ປີອັນຊົງກຽດແລະມີຄວາມໝາຍສໍາຄັນຍິ່ງໃຫຍ່. ຕະຫຼອດໄລຍະ70ປີຜ່ານມາ, ພັກໄດ້ວາງແນວທາງປ້ອງກັນຊາດ-ປ້ອງກັນຄວາມສະຫງົບແລະໄດ້ຊີ້ນໍາກໍາລັງປະກອບອາວຸດປະຊາຊົນປັບປຸງກໍ່ສ້າງຕົນເອງໃຫ້ນັບມື້ເຕີບໃຫຍ່ເຂັ້ມແຂງຂຶ້ນຢ່າງບໍ່ຢຸດຢັ້ງ. ໃນພິທີອັນມີຄວາມໝາຍສໍາຄັນນີ້, ຕາງໜ້າກໍາລັງປະກອບອາວຸດປະຊາຊົນ, ຂໍສະແດງຄວາມສັນລະເສີນແລະຮູ້ບຸນຄຸນຕໍ່ພັກປະຊາຊົນປະຕິວັດລາວ, ປະທານໄກສອນພົມວິຫານ, ປະທານສຸພານຸວົງແລະການນໍາຮຸ່ນກໍ່ຕັ້ງຜູ້ອື່ນໆທີ່ໄດ້ນໍາພາການປະຕິວັດປົດປ່ອຍຊາດສໍາເລັດຢ່າງສົມບູນ, ນໍາພາສ້າງສາພັດທະນາປະເທດຊາດໃຫ້ມີຄວາມຈະເລີນກ້າວໜ້າເປັນກ້າວໆມາ; ພ້ອມນັ້ນ, ເພື່ອເຮັດໃຫ້ກໍາລັງປະກອບອາວຸດເຮັດສໍາເລັດໜ້າທີ່ດັ່ງກ່າວພັກໄດ້ເພີ່ມທະວີບົດບາດການນໍາພາເດັດຂາດ, ໂດຍກົງ, ຮອບດ້ານຕໍ່ກໍາລັງປ້ອງກັນຊາດ - ປ້ອງກັນຄວາມສະຫງົບ, ປະຕິບັດຍຸດທະສາດຮັກສາຄວາມໝັ້ນຄົງທາງດ້ານການເມືອງ, ຕັ້ງໜ້າປັບປຸງກໍ່ສ້າງກໍາລັງປະກອບອາວຸດໃຫ້ນັບມື້ເຕີບໃຫຍ່ເຂັ້ມແຂງ.
ເພື່ອເສີມຂະຫຍາຍມູນເຊື້ອອັນສະຫງ່າລາສີແລະຜົນງານອັນໃຫຍ່ຫຼວງຂອງພັກ, ສະຫາຍພົນໂທແສງນວນໄຊຍະລາດກ່າວວ່າ: ກໍາລັງປ້ອງກັນຊາດ - ປ້ອງກັນຄວາມສະຫງົບຈະສືບຕໍ່ບຸກບືນສູ້ຊົນຕັ້ງໜ້າປັບປຸງກໍ່ສ້າງກໍາລັງຂອງຕົນເປັນກໍາລັງທີ່ຈົງຮັກພັກດີຕໍ່ພັກ, ຕໍ່ປະເທດຊາດ; ເປັນກໍາລັງຫຼັກແຫຼ່ງທີ່ແຫຼມຄົມຂອງພັກສາມາດຄໍ້າປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ສັງຄົມສະຫງົບປອດໄພຢ່າງໜັກແໜ້ນ, ສ້າງພະນັກງານນໍາພາ-ບັນຊາແລະວິຊາການເຕັກນິກ-ວິຊາສະເພາະ-ເຫຼົ່າຮົບຕ່າງໆໃຫ້ມີລະດັບຄວາມຮູ້, ຄວາມສາມາດອັນແນ່ນອນ, ສ້າງຖັນແຖວພະນັກງານ-ສະມາຊິກພັກໃຫ້ມີຫຼັກໝັ້ນຊົນຊັ້ນ, ມີຄຸນທາດການເມືອງໜັກແໜ້ນ, ມີສະຕິຈໍາແນກມິດ-ສັດຕູຈະແຈ້ງ, ເຊື່ອໝັ້ນແລະຈົ່ງຮັກພັກດີຕໍ່ພັກ, ຕໍ່ປະເທດຊາດ, ເຄົາລົບກົດໝາຍ, ປະຕິບັດຂໍ້ກໍານົດກົດລະບຽບວິໃນຢ່າງເຂັ້ມງວດ.
ສະຫາຍພົນໂທແສງນວນໄຊຍະລາດ ກ່າວຍໍ້າວ່າ: ຕະຫຼອດໄລຍະແຫ່ງການກໍາເນີດແລະເຕີບໃຫຍ່ເຂັ້ມແຂງຂອງກໍາລັງປະກອບອາວຸດປະຊາຊົນລາວຍາມໃດກໍໄດ້ຮັບການຊີ້ນໍາ-ນໍາພາ, ສຶກສາອົບຮົມຢ່າງໃກ້ສິດຈາກພັກ, ເຮັດໃຫ້ກໍາລັງປະກອບອາວຸດຍາມໃດກໍຢຶດໝັ້ນແນວທາງການເມືອງຂອງພັກ, ຈົງຮັກພັກດີຢ່າງບໍ່ມີຂອບເຂດຕໍ່ພັກ - ລັດແລະປະຊາຊົນລາວບັນດາເຜົ່າ. ພ້ອມນີ້, ກໍໄດ້ກ່າວສະແດງຄວາມຮູ້ບຸນຄຸນອັນລົ້ນເຫຼືອຕໍ່ພັກປະຊາຊົນປະຕິວັດລາວທີ່ຍາມໃດກໍໃຫ້ຄວາມເປັນຫ່ວງເປັນໄຍ, ເອົາໃຈໃສ່ນໍາພາ - ຊີ້ນໍາການຈັດຕັ້ງປະຕິບັດພາລະບົດບາດແລະໜ້າທີ່ການເມືອງຂອງກໍາລັງປະກອບອາວຸດປະຊາຊົນໄດ້ດີຕະຫຼອດມາ, ສົມກັບຄໍາສັນລະເສີນຊຶ່ງກາຍເປັນຄະຕິປະຈໍາໃຈຂອງກໍາລັງປະກອບອາວຸດທີ່ວ່າ “ບໍລິສຸດຕໍ່ຊາດຮັບໃຊ້ປະຊາຊົນຢ່າງສຸດໃຈເສີມຂະຫຍາຍທາດແທ້ມູນເຊື້ອປະຕິວັດສໍາເລັດທຸກໜ້າທີ່”.
ຊົມເຊີຍວັນສ້າງພັກປະຊາຊົນປະຕິວັດລາວຄົບຮອບ70ປີຢ່າງສຸດໃຈ ! ພັກປະຊາຊົນປະຕິວັດລາວມີກຽດສະຫງ່າໝັ້ນຍືນ !.
2025-03-25 at 13.52.21
ຄໍາເຫັນ