ທ່ານ ນາງ ແກ້ວຫຼ້າ ຄຳວົງສາ ຮອງຫົວໜ້າກົມຈັດຕັ້ງ-ພະນັກງານ ໄດ້ຜ່ານບົດສະຫຼຸບແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ ປະຈຳປີ 2024 ແລະ ທິດທາງແຜນການປະຈຳປີ 2025 ວ່າ: ສານປະຊາຊົນສູງສຸດ ໄດ້ສູ້ຊົນຜ່ານຜາອຸປະສັກຕ່າງໆ, ຕັ້ງໜ້າຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຕາມທີ່ກຳນົດໄວ້ໃນລັດຖະທຳມະນູນ ແລະ ກົດໝາຍດ້ວຍຄວາມຮັບຜິດຊອບສູງ ເຮັດໃຫ້ແຜນວຽກຈຸດສຸມ ໄດ້ຮັບການຈັດຕັ້ງປະຕິບັດຢ່າງສຳເລັດ ແລະ ມີການຫັ່ນປ່ຽນດີຂຶ້ນ ເປັນຕົ້ນໄດ້ປັບປຸງຄຸນນະພາບໃນການດຳເນີນຄະດີຂອງສານຂັ້ນຕົ້ນ ເຮັດໃຫ້ອັດຕາສ່ວນການອຸທອນຫຼຸດລົງ, ໄດ້ສຸມໃສ່ສຶກສາອົບຮົມການເມືອງແນວຄິດ, ຍົກລະດັບຄວາມຮູ້ ຄວາມສາມາດທາງດ້ານທິດສະດີການເມືອງ ແລະ ວິຊາສະເພາະ, ປັບປຸງ ແລະ ຍົກສູງຈັນຍາບັນ, ຈັນຍາທຳຂອງຜູ້ພິພາກສາ, ຈ່າສານ ແລະ ພະນັກງານ-ລັດຖະກອນ ຂອງສານປະຊາຊົນຢ່າງເປັນລະບົບ, ໄດ້ເອົາໃຈໃສ່ປັບປຸງກົງຈັກການຈັດຕັ້ງ ແລະ ບັນຈຸ, ສັບຊ້ອນ, ເລື່ອນຊັ້ນ, ເລື່ອນຂັ້ນ ໃຫ້ພະນັກງານສານປະຊາຊົນໂດຍພື້ນຖານ, ໄດ້ເອົາໃຈໃສ່ປັບປຸງແບບແຜນ, ກົນໄກການດຳເນີນຄະດີຂອງສານ ໃຫ້ມີຄວາມໂລ່ງລ່ຽນກວ່າເກົ່າ, ຕິດຜັນກັບການຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ໂດຍແຕ່ງຕັ້ງຜູ້ພິພາກສາຮັບຜິດຊອບສະເພາະ ເພື່ອຮັບປະກັນການພິຈາລະນາຕັດສິນ, ພິພາກສາຄະດີຢາເສບຕິດ ຖືກຕ້ອງຕາມກົດໝາຍ ແລະ ເຫດການຕົວຈິງ, ເຂັ້ມງວດ ແລະ ວ່ອງໄວຕາມກຳນົດເວລາທີ່ກົດໝາຍໄດ້ກຳນົດເວລາໄວ້.
ໄດ້ເອົາໃຈໃສ່ເຄື່ອນໄຫວວຽກງານກາງສະໄໝ ຂອງແຜນການ 5 ປີ (2021-2025) ໃນການຈັດຕັ້ງປະຕິບັດ ມະຕິກອງປະຊຸມຄັ້ງປະຖົມມະລືກ, ມະຕິກອງປະຊຸມສະໄໝວິສາມັນ, ມະຕິກອງປະຊຸມສະໄໝສາມັນ ເທື່ອທີ 2 ແລະ 4 ຂອງສະພາແຫ່ງຊາດ ຊຸດທີ IX ດ້ວຍຄວາມຮັບຜິດຊອບສູງ ເຮັດໃຫ້ກົງຈັກການຈັດຕັ້ງ ແລະ ບຸກຄະລາກອນ ຂອງສານປະຊາຊົນແຕ່ລະຂັ້ນ ໄດ້ຮັບການປັບປຸງທາງດ້ານປະລິມານ ແລະ ຄຸນນະພາບ, ການພິຈາລະນາຕັດສິນ ແລະ ພິພາກສາຄະດີ ຂອງສານປະຊາຊົນແຕ່ລະຂັ້ນ ມີຄວາມວ່ອງໄວ, ຮັບປະກັນຄວາມຖືກຕ້ອງ ແລະ ຍຸຕິທຳຫຼາຍຂຶ້ນ, ຕິດພັນກັບການຈັດຕັ້ງປະຕິບັດວາລະແຫ່ງຊາດ ໃຫ້ມີຄວາມຖືກຕ້ອງ, ສອດຄ່ອງກັບສະພາບການພັດທະນາເສດຖະກິດ-ສັງຄົມໃນແຕ່ລະໄລຍະ ເຮັດໃຫ້ການເຄື່ອນໄຫວວຽກງານ ຂອງສານປະຊາຊົນແຕ່ລະຂັ້ນ ມີຄວາມໜັກແໜ້ນ ແລະ ເຂັ້ມແຂງດີຂຶ້ນກວ່າເກົ່າ.
ຈຳນວນກົມກອງໄດ້ມີການລົງທະບຽນການແຂ່ງຂັນ ຈຳນວນ 14 ກົມກອງ ແລະ ລົງທະບຽນແຂ່ງຂັນບຸກຄົນ ຈຳນວນ 224 ທ່ານ ຍິງ 101 ທ່ານ ມີດັ່ງລຸ່ມນີ້: ຫ້ອງ ການ, ກົມຈັດຕັ້ງ-ພະນັກງານ, ກົມແຜນການ - ການເງິນ, ກົມກວດກາ, ກົມຄຸ້ມຄອງວິຊາການ ແລະ ສະຖິຕິສານ, ກົມຮ່ວມມືສາກົນ, ສະຖາບັນຄົ້ນຄວ້າ ແລະ ຝຶກອົບຮົມ, ຄະນະສານແພ່ງ, ຄະນະສານອາຍາ, ຄະນະສານການຄ້າ, ຄະນະສານຄອບຄົວ, ຄະນະສານເດັກ, ຄະນະສານແຮງງານ ແລະ ຄະນະສານປົກຄອງ.
ຜ່ານການຈັດຕັ້ງປະຕິບັດວຽກງານຕົວຈິງ ສາມາດຍ້ອງຍໍກົມກອງ ແລະ ບຸກຄົນ ໃນການປະຕິບັດໜ້າທີ່ວຽກງານ ໃນໄລຍະ 1 ປີຜ່ານມາ ປະຈໍາປີ 2024 ຊຶ່ງໄດ້ຮັບການຍ້ອງຍໍຈາກ ທ່ານປະທານສານປະຊາຊົນສູງສຸດ ມີພະນັກງານ-ລັດຖະກອນສານປະຊາຊົນສູງສຸດ ຈຳນວນ 199 ທ່ານ ຍິງ 80 ທ່ານ ລາຍລະອຽດດັ່ງລຸ່ມນີ້: ກົມກອງ ໄດ້ຮັບໃບຍ້ອງຍໍ ຈຳນວນ 14 ກົມກອງ; ບຸກຄົນ ໄດ້ຮັບໃບຍ້ອງຍໍ ຈໍານວນ 168 ທ່ານ ຍິງ 68 ທ່ານ; ໃບຊົມເຊີຍ ຈໍານວນ 31 ທ່ານ ຍິງ 12 ທ່ານ.
ໃນໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ໂອ້ລົມ ຕໍ່ກອງປະຊຸມວ່າ: ການແຂ່ງຂັນ “ຮັກຊາດ ແລະ ພັດທະນາ” ໃນເນື້ອແທ້ແມ່ນການສ້າງ ແລະ ຍົກລະດັບແນວ ຄິດ-ວັດທະນະທຳຂອງຄົນລາວ ແລະ ຂອງສັງຄົມລາວ ແນໃສ່ສ້າງຄົນໃໝ່ກ້າວໄປຕາມເສັ້ນທາງ ສັງຄົມນິຍົມທີ່ມີນໍ້າໃຈຮັກຊາດ, ຮັກລະບອບປະຊາທິປະໄຕ ປະຊາຊົນ, ມີລະບຽບວິໄນ, ປະດິດສ້າງ, ສ້າງໄດ້ຜະລິດຕະພັນໃໝ່, ສ້າງໄດ້ຂະບວນການໃໝ່ ທີ່ກ້າວໜ້າ, ບຸກທະລຸໄປສູ່ແບບແຜນທີ່ຕິດພັນ ກັບຄໍາຂວັນ: “ຕົນເພື່ອສັງຄົມ ແລະ ສັງຄົມເພື່ອຕົນ ເພື່ອການພັດທະນາເສດຖະກິດ-ສັງຄົມ ຢູ່ ປະເທດເຮົາໃຫ້ສືບຕໍ່ຂະຫຍາຍຕົວຢ່າງບໍ່ຢຸດຢັ້ງ”,. ສະນັ້ນ, ຈຶ່ງມີ ບາງຄຳເຫັນ ເໜັ້ນໜັກເພີ່ມເຕີມ ເພື່ອໃຫ້ບັນດາທ່ານທັງໝົດ ໄດ້ນຳໄປຈັດຕັ້ງຜັນຂະຫຍາຍ ເຂົ້າໃນການເຄື່ອນໄຫວວຽກງານຂອງຕົນ ດັ່ງນີ້: ໜຶ່ງ: ສືບຕໍ່ຊີ້ນໍາ-ນໍາພາ ໜ້າທີ່ຄວາມຮັບຜິດຊອບການເມືອງຂອງຕົນ ໂດຍຕິດພັນກັບວຽກງານແຂ່ງຂັນ-ຍ້ອງຍໍຮັກຊາດ ແລະ ພັດທະນາຢູ່ສານປະຊາຊົນ ໃຫ້ເປັນລະບົບຕໍ່ເນື່ອງໃນຊຸມປີຕໍ່ໜ້າ; ສອງ: ສືບຕໍ່ປຸກລະດົມ ບັນດາສະມາຊິກພັກ-ພະນັກງານ ສານປະຊາຊົນ ພ້ອມກັນຕັ້ງໜ້າ ເຂົ້າຮ່ວມໃນຂະບວນການແຂ່ງຂັນ "ຮັກຊາດ ແລະ ພັດທະນາ” ຕາມຄາດ ໝາຍ: ໃຫ້ໄວ, ໃຫ້ດີ ໃຫ້ຫຼາຍ ແລະ ໃຫ້ຖືກຕ້ອງຕາມກົດໝາຍ ແລະ ຫັນເປັນທັນສະ ໄໝເຂົ້າສູ່ການປະຕິບັດໜ້າທີ່ວຽກງານຂອງສານປະຊາຊົນ, ເປັນອົງການພິທັກຄວາມຍຸຕິທໍາໃຫ້ສັງຄົມຢ່າງແທ້ຈິງ ແລະ ສາມ: ສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈສ້າງການຫັນປ່ຽນທີ່ ແຂງແຮງ, ເລິກເຊິ່ງ ແລະ ຮອບດ້ານ, ຄອຍສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນນະພາບໃນການນໍາພາຂອງພັກຕໍ່ສານປະຊາຊົນ ໃນໄລຍະໃໝ່; ການແຂ່ງຂັນ ຮັກຊາດ ແລະ ພັດທະນາ ໃຫ້ເປັນການທົດສອບຄວາມສາມາດໃນການນໍາພາຂອງສະຫາຍສະມາຊິກພັກ, ພະນັກງານ-ລັດຖະກອນ.
ພ້ອມນັ້ນຕ້ອງນໍາເອົາເນື້ອໃນການແຂ່ງຂັນຍ້ອງຍໍ-ຮັກຊາດ ແລະ ພັດທະນາ ປະຈຳປີ 2025 ຂອງສານປະຊາຊົນ ນໍາໄປຄົ້ນຄວ້າ, ເຊື່ອມຊຶມ ໃຫ້ເລິກເຊິ່ງ, ຮັບຮູ້ເຂົ້າໃຈຢ່າງກວ້າງຂວາງ, ພ້ອມທັງ ເພີ່ມທະວີ, ສູ້ຊົນ ການຄົ້ນຄວ້າພິຈາລະນາຕັດສິນຄະດີ ໃຫ້ບັນລຸໄດ້ຕາມຕົວຊີ້ວັດ ທີ່ສະພາແຫ່ງຊາດກຳນົດ. ປະຕິບັດດ້ວຍຄວາມວ່ອງໄວ ແລະ ມີຄຸນນະພາບສູງ (ສາມາດຈັດຕັ້ງປະຕິບັດໄດ້, ຄູ່ຄວາມພ້ອມຮັບ) ຕາມເນື້ອໃນຄໍາຂວັນທີ່ວ່າ: ຍົກສູງປະສິດທິພາບການດໍາເນີນຄະດີ ຢູ່ສານປະຊາຊົນ ໃນເງື່ອນໄຂໃໝ່ໃຫ້ມີຄວາມໂປ່ງໃສ, ສິ້ນສຸດຕາມກົດໝາຍ, ຮັບປະກັນຄວາມຍຸຕິທຳ ຕາມຄຳຂວັນ 3 ປ: ໂປ່ງໃສ, ເປັນເອກະລາດ ແລະ ເປັນທຳ.
(ຂ່າວ:ຕຸໄລເພັດ)
ຄໍາເຫັນ