 |
ໃນວາລະ, ທ່ານ ນາງ ມະໄລຄໍາ ສຸນາພັນ ໄດ້ລາຍງານການຈັດຕັ້ງປະຕິບັດວຽກງານ ທາງດ້ານວິຊາສະເພາະ ໃນໄລຍະ 6 ເດືອນ ຕົ້ນປີ 2026 ຂອງສານປະຊາຊົນ ນວ ຕໍ່ຄະນະກຳມະການປ້ອງກັນ ຊາດ-ປ້ອງກັນຄວາມສະຫງົບ, ກົດໝາຍ ແລະ ຍຸຕິທໍາ ສະພາປະຊາຊົນ ນວ ຊຶ່ງມີເນື້ອໃນບາງຕອນ ວ່າ: ສານປະຊາຊົນ ນວ ປະກອບມີ 9 ຂະແໜງການຂຶ້ນກັບ, ມີພາລະບົດບາດດໍາເນີນຄະດີເປັນຂັ້ນຕົ້ນ ແລະ ດໍາເນີນຂັ້ນອຸທອນຄະດີທີ່ຄູ່ຄວາມຂໍອຸທອນ ຫຼື ຖືກຄັດຄ້ານໂດຍຫົວໜ້າອົງການໄອຍະການປະຊາຊົນ, ໄດ້ເອົາໃຈໃສ່ຕິດຕາມຊຸກຍູ້ໃນການປະເມີນຜູ້ພິພາກສາດີ-ເກັ່ງໂດຍປະຕິບັດຕາມມາດຖານເງື່ອນໄຂ ແລະ ຕາມ ຄໍາແນະນໍາຂອງປະທານສານປະຊາຊົນສູງສຸດ, ດ້ານວິຊາສະເພາະໄດ້ມີການປັບປຸງແບບແຜນການດໍາເນີນຄະດີຢ່າງຕໍ່ເນື່ອງລຽນຕິດດ້ວຍການແນະນໍາຊຸກຍູ້ ແລະ ແລກປ່ຽນຄວາມຄິດຄຳເຫັນໃນກອງປະຊຸມວິຊາການ ເຮັດໃຫ້ການພິຈາລະນາຄະດີມີຄວາມວ່ອງໄວ, ທັງຮັບປະກັນຄວາມຄົບຖ້ວນ, ຮອບດ້ານ ແລະ ພາວະວິໄສ.
ນອກນີ້, ຍັງໄດ້ລົງຕັດສິນເຄື່ອນທີ່ຢູ່ຄ້າຍຄຸມຂັງດັດສ້າງ ປກສ ນວ (ນາໂນ) ໄດ້ 5 ຄັ້ງ, ຄ້າຍຄຸມຂັງດັດສ້າງ ພາກກາງຕານປ່ຽວ ໄດ້ 3 ຄັ້ງ ແລະ ຄ້າຍຄຸມຂັງ ພາກກາງໂພນຕ້ອງ ໄດ້ 1 ຄັ້ງ ແລະ ໄດ້ເອົາໃຈໃສ່ຊີ້ນໍາ ແລະ ຕິດຕາມການຕັດສິນເຄື່ອນໄຫວຢ່າງເປັນປົກກະຕິ. ຕາມສະຖິຕິ 6 ເດືອນຕົ້ນປີ 2026 ສາມາດສະຫຼຸບໄດ້ ຄື: ຄະດີທີ່ຄ້າງມາທັງໝົດຂອງສານປະຊາຊົນ ນວ ແລະ ສານປະຊາຊົນທັງ 4 ເຂດ ມີທັງໝົດ 1,856 ເລື່ອງ, ເຂົ້າໃໝ່ 1,593 ເລື່ອງ, ລວມ 3,449 ເລື່ອງ, ແກ້ໄຂໄດ້ 1,455 ເລື່ອງ ເທົ່າກັບ 42.19% ຂອງການແກ້ໄຂຄະດີທັງໝົດປັດຈຸບັນ ຍັງຄ້າງ 1,994 ເລື່ອງ ໃນນັ້ນ ໂຈະ 11 ເລື່ອງ, ຂໍອຸທອນ 123 ເລື່ອງ, ເທົ່າກັບ 8.45% ແລະ ຂໍລົບລ້າງ 1 ເລື່ອງ ເທົ່າກັບ 0.06%, ໃນນັ້ນສານປະຊາຊົນເຂດ 3 ຍັງໄດ້ມີການຕັດສິນຜູ້ພິພາກສາ ຜູ້ດຽວຄື: ຄະດີອາຍາ 2 ເລື່ອງ.
ຄະດີທີ່ພົ້ນເດັ່ນໃນ ນວ ແມ່ນຄະດີແພ່ງ: ຂໍ້ຂັດແຍ່ງກໍາມະສິດທີ່ດິນ, ຄະດີອາຍາ: ຄ້າ-ຂາຍຢາເສບຕິດ, ລັກຊັບ ແລະ ສໍ້ໂກງຊັບພົນລະເມືອງ, ຄະດີການຄ້າ: ສັນຍາກູ້ຢືມ, ຄະດີຄອບຄົວ: ສາຍຜົວ-ເມຍ, ຄະດີເດັກ: ຄອບຄອງເພື່ອເສບ ແລະ ຫຼັກຊັບ.
ໃນໄລຍະ 6 ເດືອນຕົ້ນປີ ທີ່ຜ່ານມາ ຄະນະນໍາຂອງສານປະຊາຊົນ ນວ ກໍໄດ້ລົງໄປພົບປະຢ້ຽມຢາມ ແລະ ຊຸກຍູ້ສານປະຊາຊົນທັງ 4 ເຂດ ໄດ້ສໍາເລັດຕາມຄາດໝາຍ ພ້ອມນັ້ນ ຍັງເອົາໃຈໃສ່ ການປະຕິບັດຫຼັກການໂຕ້ແຍ່ງ-ໂຕ້ຖຽງ, ການປະຕິບັດວາລະແຫ່ງຊາດ ກ່ຽວກັບການສະກັດກັ້ນ ແລະ ຕ້ານຢາເສບຕິດ ແລະ ການປະສານງານກັບ 4 ພາກສ່ວນໃນການດໍາເນີນຄະດີ, ໄດ້ເອົາໃຈໃສ່ໃນດ້ານການປະສານງານຮ່ວມກັນລະຫວ່າງ 4 ພາກສ່ວນຄື: ສານປະຊາຊົນ, ອົງການໄອຍະການປະຊາຊົນ, ພະແນກຍຸຕິທໍາ (ກອງປະຕິບັດຄໍາຕັດສິນຂອງສານ) ແລະ ເຈົ້າໜ້າທີ່ຕໍາຫຼວດ (ປກສ) ໃນການດໍາເນີນຄະດີເປັນສິ່ງສໍາຄັນ ເພື່ອສ້າງເງື່ອນໄຂເອື້ອອໍານວຍຄວາມສະດວກ ໃຫ້ແກ່ການຮັບໃຊ້ປະຊາຊົນ.
ທິດທາງແຜນການໃນ 6 ເດືອນທ້າຍປີ 2026 ຈະສືບຕໍ່ສຶກສາອົບຮົມການເມືອງແນວຄິດ, ຍົກສູງຄວາມຮັບຜິດຊອບໜ້າທີ່ການເມືອງໃຫ້ແກ່ພະນັກງານ-ລັດຖະກອນພາຍໃນຄວາມຮັບຜິດຊອບຂອງຕົນເປັນປົກກະຕິ, ສືບຕໍ່ຜັນຂະຫຍາຍມະຕິ, ຄໍາສັ່ງ, ຄໍາແນະນໍາ ແລະ ຜັນຂະຫຍາຍເຂົ້າໃນວຽກງານຕົວຈິງ ແລະ ເຂົ້າສູ່ລວງເລິກ, ສືບຕໍ່ຄົ້ນຄວ້າພິຈາລະນາແກ້ໄຂຄະດີຄ້າງມາ ແລະ ເຂົ້າໃໝ່ໃຫ້ບັນລຸຕາມຄາດ ໝາຍຄະດີແພ່ງ, ການຄ້າ ແລະ ແຮງງານ 75%, ຄະດີອາຍາ 90%, ຄະດີຄອບຄົວ, ແຮງງານ, ປົກຄອງ ແລະ ເດັກ 85% ຂຶ້ນໄປ ແລະ ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ