ທ່ານລີເບີລີບົວປາວກ່າວວ່າ: ຄະນະປະຈຳສະພາແຫ່ງຊາດ ເຫັນດີໂດຍພື້ນຖານ ຕໍ່ບົດລາຍງານຂອງອົງການກວດກາແຫ່ງລັດ ກ່ຽວກັບທິດທາງແຜນການເຄື່ອນໄຫວວຽກງານ 5 ປີ (2026-2030), ແຕ່ເຖິງຢ່າງໃດກໍຕາມຄະນະປະຈຳສະພາແຫ່ງຊາດ ສະເໜີອົງການກວດກາແຫ່ງລັດ ແລະ ອົງການກວດສອບແຫ່ງລັດ ສືບຕໍ່ຄົ້ນຄວ້າ ແລະ ກຳນົດທິດທາງລວມ, ຄາດໝາຍສູ້ຊົນ, ແຜນວຽກຈຸດສຸມ, ມາດຕະການຈັດຕັ້ງປະຕິບັດໃຫ້ຊັດເຈນ ສອດຄ່ອງກັບຄວາມຮຽກຮ້ອງຕ້ອງການຂອງວຽກງານກວດກາໃນໄລຍະໃໝ່, ສາມາດຈັດຕັ້ງປະຕິບັດໄດ້.
ເພື່ອຮັບປະກັນໃຫ້ແກ່ການຈັດຕັ້ງປະຕິບັດແຜນການດັ່ງກ່າວ, ຄະນະປະຈາສະພາແຫ່ງຊາດ ສະເໜີບາງທັດສະນະເພື່ອໃຫ້ອົງການກວດກາແຫ່ງລັດ ແລະ ອົງການກວດສອບແຫ່ງລັດເອົາໃຈໃສ່ດັ່ງນີ້:ສືບຕໍ່ຜັນຂະຫຍາຍບາງມາດຕາຂອງກົດໝາຍ ເປັນນິຕິກຳໃຕ້ກົດໝາຍໃຫ້ສໍາເລັດຕາມແຜນ, ເອົາໃຈໃສ່ເຜີຍແຜ່ກົດໝາຍ, ນິຕິກຳໃຕ້ກົດໝາຍ ແລະ ມະຕິກອງປະຊຸມສະພາແຫ່ງຊາດ ໃຫ້ແກ່ເປົ້າໝາຍທີ່ຖືກກວດກາ, ໃຫ້ພາກສ່ວນທີ່ກ່ຽວຂ້ອງຮັບຮູ້ ແລະ ໃຫ້ການຮ່ວມມືໃນການຈັດຕັ້ງປະຕິບັດແຜນການເຄື່ອນໄຫວວຽກງານກວດກາ ໃຫ້ມີປະສິດທິພາບ ແລະ ປະສິດທິຜົນ; ສືບຕໍ່ປັບປຸງແກ້ໄຂວຽກງານກວດກາໃຫ້ດີຂຶ້ນ ດ້ວຍການຖອດຖອນບົດຮຽນ ເສີມຂະຫຍາຍ ຈຸດດີ, ແກ້ໄຂຈຸດອ່ອນ ແລະ ຂໍ້ຄົງຄ້າງ ໃນການຈັດຕັ້ງປະຕິບັດແຜນການເຄື່ອນໄຫວໃນໄລຍະຜ່ານມາ; ເອົາໃຈໃສ່ກໍ່ສ້າງພະນັກງານ-ນັກກວດກາ ໃຫ້ເປັນມືອາຊີບ, ຍົກສູງຄຸນທາດການເມືອງ, ຈັນຍາບັນ-ຈັນຍາທຳ ເພື່ອຮັບປະກັນຄຸນນະພາບ ແລະ ສ້າງຄວາມເຊື່ອໝັ້ນ ຕໍ່ວຽກກວດກາ; ເອົາໃຈໃສ່ຫັນເປັນທັນສະໄໝ ວຽກງານກວດກາ ໂດຍນຳໃຊ້ເຕັກໂນໂລຊີ, ອຸປະກອນ, ເຄື່ອງມື ເຂົ້າໃນວຽກງານກວດກາໃຫ້ຫຼາຍຂຶ້ນ ເພື່ອຮັບປະກັນປະສິດທິພາບ, ປະສິດທິຜົນສູງຂຶ້ນ; ສະເໜີໃຫ້ລັດຖະບານ ຄົ້ນຄວ້າງົບປະມານ ເພື່ອຕອບສະໜອງຄວາມຕ້ອງການທີ່ຈຳເປັນຮັບໃຊ້ການເຄື່ອນໄຫວວຽກງານຂອງອົງການກວດກາແຫ່ງລັດ ຕາມການສະເໜີຂອງອົງການ ກວດກາແຫ່ງລັດ.
ຂ່າວ:ບຸນຕອມ.ຮູບ:ໄອຄຳ
ຄໍາເຫັນ