ໃນກອງປະຊຸມ, ທ່ານ ບຸນຍະວັດ ວິລະໄຊຍ໌ ຫົວໜ້າພະແນກໂຍທາທິການ ແລະ ຂົນສົ່ງ ນວ ຕາງໜ້າໃຫ້ຄະນະສະພາບໍລິຫານຂອງລັດວິສາຫະກິດນ້ຳປະປານະຄອນຫຼວງວຽງຈັນ ລາຍງານການປັບລາຄາການຊົມໃຊ້ນ້ຳປະປາ ຕໍ່ກອງປະຊຸມ ສະໄໝສາມັນ ເທື່ອທີ 9 ຂອງສະພາປະຊາຊົນນະຄອນຫຼວງວຽງຈັນຊຸດທີ II ໃນວັນທີ 9 ກໍລະກົດ ຜ່ານມານີ້ ທີ່ສໍານັກງານປົກຄອງ ນວ ຊຶ່ງມີເນື້ອໃນບາງດ້ານ ຄື: ນະຄອນຫຼວງວຽງຈັນມີ 9 ຕົວເມືອງ, ມີ 481 ບ້ານ, ລັດວິສາຫະກິດນ້ຳປະປາສາມາດສະໜອງນ້ຳໄດ້ພຽງ 344 ບ້ານ (ກວມ 71%), ສ່ວນບ້ານທີ່ຍັງບໍ່ມີນໍ້າປະປາຊົມໃຊ້ມີ 137 ບ້ານ (ກວມ 29%) ຊຶ່ງສ່ວນໃຫຍ່ແມ່ນຈະຢູ່ປາກງື່ມ, ເມືອງສັງທອງ ແລະ ບາງເຂດຂອງເມືອງໄຊທານີ ສຳລັບຂອບເຂດການບໍລິການນ້ຳປະປາໃນ 7 ຕົວເມືອງໃນທີ່ສາມາດເຂົ້າເຖິງການຊົມໃຊ້ນໍ້າ ກວມ 93%, ມີໝໍ້ແທກນໍ້າທັງໝົດ 205,120 ໜ່ວຍ. ການບໍລິການນໍ້າປະປາ ແບ່ງອອກເປັນ 3 ປະເພດຄື: ປະເພດ 1: ຄົວເຮືອນ 183,203 ໜ່ວຍ (ກວມ 89%); ປະເພດ 2: ອົງການລັດ 1,852 ໜ່ວຍ (ກວມ 1%); ປະເພດ 3: ການຄ້າ-ອຸດສາຫະກຳ 20,065 ໜ່ວຍ (ກວມ 10%).
ຢູ່ ນວ ມີໂຮງງານຜະລິດນ້ຳປະປາທັງໝົດ 6 ແຫ່ງ ໃນນັ້ນ 4 ແຫ່ງ ແມ່ນເປັນຂອງລັດວິສາຫະກິດນ້ຳປະປາ ນວ ແລະ ອີກ 2 ແຫ່ງ ເປັນຂອງບໍລິສັດເອກະຊົນ (ໃນຮູບການ BOT) ມີກໍາລັງການຜະລິດນໍ້າທັງໝົດ 348,000 ແມັດກ້ອນຕໍ່ວັນ. ນອກຈາກນັ້ນ, ລັດວິສາຫະກິດນ້ຳປະປານະຄອນຫຼວງວຽງຈັນ ຍັງມີໂຮງງານຜະລິດນ້ຳປະປາຂະໜາດນ້ອຍ ຢູ່ເມືອງສັງທອງມີ 6 ໂຮງງານ, ກໍາລັງການຜະລິດໄດ້ 2,610 ແມັດກ້ອນຕໍ່ວັນ; ເມືອງປາກງື່ມມີ 4 ໂຮງງານ, ກຳລັງການຜະລິດໄດ້ 2,300 ແມັດກ້ອນຕໍ່ວັນ
ເຫດຜົນ ແລະ ຄວາມຈຳເປັນ: ລາຄາຕົ້ນທຶນການຜະລິດນ້ຳປະປາສູງກວ່າລາຄາຂາຍ ເນື່ອງຈາກວ່າຍັງຈັດຕັ້ງປະຕິບັດລາຄານ້ຳແຕ່ປີ 2014 ຈຶ່ງເຮັດໃຫ້ການດໍາເນີນທຸລະກິດຂາດທຶນ ແລະ ຂາດສະພາບຄ່ອງ ທາງດ້ານການເງິນຢ່າງຕໍ່ເນື່ອງ; ເສດຖະກິດຕະຫຼາດມີການເໜັງຕີງສູງ ເປັນຕົ້ນແມ່ນ ຄ່າກະແສໄຟຟ້າ, ນໍ້າມັນເຊື້ອໄຟ, ວັດຖຸດິບ-ສານເຄມີ, ວັດຖຸອຸປະກອນທໍ່ນໍ້າ, ຄ່າຜິດດ່ຽງຈາກອັດຕາແລກປ່ຽນເງິນຕາ ແລະ ອື່ນໆເພີ່ມຂຶ້ນ; ລາຄາການຊົມໃຊ້ນໍ້າປະປາ ໃນນະຄອນຫຼວງວຽງຈັນແມ່ນຍັງຕໍ່າຫຼາຍ ເມື່ອທຽບໃສ່ລາຄານໍ້າປະປາຢູ່ທົ່ວປະເທດ ແລະ ລາຄານໍ້າປະປາ ຈາກປະເທດອ້ອມຂ້າງ, ທຽບໃສ່ການປັບປຸງເງິນເດືອນຂັ້ນຕ່ຳໃນປີ 2014 ແມ່ນ 950,000 ກີບ ມາເປັນ 2,500,000 ກີບ ໃນປີ 2025.
ລາຄານໍ້າປະປາ ໃນ ນວ ຍັງປະຕິບັດ ໃນລາຄາຂອງປີ 2014 ແລະ ຍັງນໍາໃຊ້ມາຈົນເຖິງປັດຈຸບັນ, ການປັບລາຄາການຊົມໃຊ້ນ້ຳປະປາເປັນແຕ່ລະງວດ ເປັນເວລາ 3 ປີ ຊຶ່ງການປັບລາຄານັ້ນ ແມ່ນຈະປັບຂຶ້ນໃນອັດຕາສ່ວນເທື່ອລະໜ້ອຍ ແມ່ນມີຄວາມເໝາະສົມໃນສະພາບປັດຈຸບັນ.
ຜົນໄດ້ຮັບຈາກການປັບລາຄາຊົມໃຊ້ນ້ຳປະປາ ແມ່ນຈະສາມາດຂະຫຍາຍກຳລັງການຜະລິດຂອງໂຮງງານ ໄດ້ຕາມແຜນທີກຳນົດໄວ້ ເພີ່ມອີກ 6 ແຫ່ງ ລວມເປັນ 12 ແຫ່ງ, ສາມາດຂະຫຍາຍ, ບຳລຸງຮັກສາປ່ຽນຖ່າຍລະບົບທໍ່ເກົ່າແກ່; ກຳລັງການຜະລິດແມ່ນຈະເພີ່ມຂຶ້ນ, ສາມາດສະໜອງນໍ້າໃຫ້ພຽງພໍໃນເຂດບໍລິການ ແລະ ຂະຫຍາຍລະບົບນ້ຳປະປາ ໃຫ້ເຂດບ້ານທີ່ບໍ່ມີນ້ຳປະປາຈໍານວນໜຶ່ງໃນ 137 ບ້ານ; ມີງົບປະມານໃນການບຳລຸງຮັກສາລະບົບໂຮງງານຜະລິດນ້ຳປະປາ ເປັນຕົ້ນ ປ່ຽນຖ່າຍປ້ຳດູດນ້ຳ, ລະບົບໄຟຟ້າໃນໂຮງງານ; ມີງົບປະມານໃນການແກ້ໄຂບັນຫານ້ຳບໍ່ສ້າງລາຍຮັບໃຫ້ຫຼຸດລົງ ເປັນຕົ້ນ ປ່ຽນທໍ່ເກົ່າທໍ່ໂດກ, ປ່ຽນໝໍ້ແທກນ້ຳທີ່ໝົດອາຍຸ, ສ້ອມແປງນ້ຳແຕກນ້ຳຮົ່ວ ໃຫ້ທັນສະພາບການ. ພາຍຫຼັງຮັບຟັງການລາຍງານ ແລະ ຊີ້ແຈງແລ້ວ ບັນດາ ສສຊ, ສສນວ ໄດ້ຜັດປ່ຽນກັນ ປະກອບຄໍາເຫັນຢ່າງຄົບຖ້ວນ ພ້ອມທັງລົງຄະແນນສຽງຮັບຮອງເອົາຢ່າງເປັນເອກະສັນ. (ຂ່າວ: ແສງຈັນ)
ຄໍາເຫັນ