ສະພາແຫ່ງຊາດຮັບຮອງເອົາກົດໝາຍຈໍານວນ 7ສະບັບ

ກອງປະຊຸມສະໄໝສາມັນ ເທື່ອທີ6 ຂອງສະພາແຫ່ງຊາດ ຊຸດທີIX, (20ພະຈິກນີ້, ທີ່ ສພຊ, ພາຍໃຕ້ການເປັນປະທານຂອງທ່ານໄຊສົມພອນ ພົມວິຫານ, ປະທານສະພາແຫ່ງຊາດ.ໂດຍມີບັນດາ ສະມາຊິກສະພາແຫ່ງຊາດ(ສສຊ)ໄດ້ຮັບຮອງເອົາກົດໝາຍຈໍານວນ 7ສະບັບ.
    ໃນວາລະກອງປະຊຸມ, ພາຍຫຼັງຄະນະຮັບຜິດຊອບຮ່າງກົດໝາຍຂຶ້ນນໍາສະເໜີ ແລະ ໃຫ້ຄວາມກະຈ່າງແຈ້ງຕໍ່ບັນດາຮ່າງກົດໝາຍແລ້ວ, ບັນດາ ສສຊ ໄດ້ຜັດປ່ຽນກັນຂຶ້ນປະກອບຄໍາເຫັນເພື່ອໃຫ້ຮ່າງກົດໝາຍ ມີຄວາມຮັດກຸມ, ກະທັດຮັດ ແລະ ສົມບູນຄົບຖ້ວນທາງດ້ານເນື້ອໃນ ດ້ວຍຄວາມສ້າງສັນ, ລົງຄະແນນສຽງຮັບຮອງເອົາກົດໝາຍ ຈໍານວນ 7ສະບັບດ້ວຍຄວາມເປັນເອກະພາບ ເປັນຕົ້ນແມ່ນ: ກົດໝາຍວ່າດ້ວຍລະບົບການຊໍາລະ(ປັບປຸງ), ກົດໝາຍປັບປຸງວ່າດ້ວຍການບັນຊີ(ປັບປຸງ), ກົດໝາຍວ່າດ້ວຍການຕິດຕາມ ກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ(ປັບປຸງ), ກົດໝາຍວ່າດ້ວຍການປິ່ນປົວ(ປັບປຸງ), ກົດໝາຍວ່າດ້ວຍການຮັກສາສຸຂະພາບຂັ້ນຕົ້ນ(ປັບປຸງ), ກົດໝາຍວ່າດ້ວຍຊັບສິນທາງປັນຍາ(ປັບປຸງ), ກົດໝາຍວ່າດ້ວຍຜູ້ພິພາກສາ(ປັບປຸງ).
    ໃນກອງປະຊຸມ, ບັນດາທ່ານຄະນະຮັບຜິດຊອບຮ່າງກົດໝາຍ ໄດ້ຜັດປ່ຽນກັນຂຶ້ນລາຍງານ, ຊີ້ແຈງຄືນຕໍ່ຄໍາຊັກຖາມຂອງ ສສຊ.  ຈາກນັ້ນ, ທ່ານ ຄໍາແພງ ວິລະພັນ, ປະທານກໍາມາທິການຍຸຕິທໍາສະພາແຫ່ງຊາດ, ໄດ້ຂຶ້ນລາຍງານກ່ຽວກັບການຄົ້ນຄວ້າປັບປຸງກົດໝາຍວ່າດ້ວຍການຕິດຕາມ ກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເປັນຕົ້ນ: ຄໍາເຫັນຕໍ່ມາດຕາ 2 ການຕິດຕາມກວດກາຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຄະນະຮັບຜິດຊອບເຫັນດີປັບປຸງຕາມການສະເໜີຂອງສສຊ ແລະມາດຕາ 3, 9, 10, 11,  15, 25, 27, 50.  ນອກຈາກບັນດາມາດຕາດັ່ງກ່າວແລ້ວ ຍັງມີມາດຕາອື່ນ ທີ່ຄະນະຮັບຜິດຊອບໄດ້ປັບປຸງ ຕາມການສະເໜີຂອງບັນດາທ່ານ ສສຊ ແລະ ມາດຕາທີ່ບໍ່ໄດ້ປັບປຸງ ກໍໄດ້ອະທິບາຍເຫດຜົນລະອຽດ. ສະນັ້ນ, ຕິດພັນກັບການປັບປຸງ ຕາມຄໍາເຫັນຂອງບັນດາ ສສຊ ໃນຮ່າງກົດໝາຍ ກໍຍັງມີຫຼາຍເນື້ອໃນ ເກາະກ່າຍກັນ ເຊັ່ນ: ໄດ້ປັບປຸງຢູ່ພາກຂອງສະພາແຫ່ງຊາດ ແຕ່ຍັງບໍ່ທັນໄດ້ປັບປຸງຢູ່ພາກຂອງສະພາປະຊາຊົນຂັ້ນແຂວງ ລວມທັງ ເຕັກນິກ, ຄໍາສັບ ແລະ ວິທີການຂຽນຕ່າງໆ. ຄະນະຮັບຜິດຊອບ ຈະໄດ້ສືບຕໍ່ນໍາເອົາໄປປັບປຸງ, ຮຽບຮຽງຄືນໃໝ່ເພື່ອໃຫ້ມີຄວາມເປັນເອກະພາບ.(ຂ່າວ: ແສງຈັນ)