 |
ທ່ານ ວົງສະຫວັນ ເທບພະຈັນ ກ່າວໄຂກອງປະຊຸມວ່າ: ກອງປະຊຸມໃນຄັ້ງນີ້, ຈະໄດ້ສະຫຼຸບການຈັດຕັ້ງປະຕິບັດວຽກງານ 5 ປີ, ວຽກງານປະຈໍາປີ ຂອງສະພາປະຊາຊົນແຂວງ, ການຈັດຕັ້ງປະຕິບັດວຽກງານຂອງອົງການປົກຄອງແຂວງ, ອົງການກວດສອບປະຈໍາພາກເໜືອ1, ອົງການກວດກາລັດແຂວງ ແລະ ອົງການຕຸລາການ, ໃນໄລຍະໜຶ່ງປີທີ່ຜ່ານມາ ຊຶ່ງເປັນໄລຍະທີ່ປະສົບຜົນສໍາເລັດ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ ແລະ ເປັນໄລຍະແຫ່ງການສືບຕໍ່ເລັ່ງໃສ່ ແກ້ໄຂວຽກງານຈຸດສຸມຂອງແຂວງ ຕາມ 2 ວາລະແຫ່ງຊາດ, ສາມາດບັນລຸຜົນສໍາເລັດຫຼາຍດ້ານ, ແຕ່ເຫັນວ່າຍັງມີບັນຫາ, ອຸປະສັກ ແລະ ຄວາມຫຍຸ້ງຍາກຫຼາຍໆປະການ ທີ່ກະທົບຕໍ່ການຈະເລີນເຕີບໂຕ ຂອງເສດຖະກິດ-ສັງຄົມ ແລະ ການດໍາລົງຊີວິດຂອງປະຊາຊົນ. ໂອກາດນີ້, ທ່ານໄດ້ຮຽກຮ້ອງໃຫ້ພະນັກງານ, ທະຫານ, ຕຳຫຼວດ, ແພດໝໍ, ສື່ມວນຊົນ ແລະ ປະຊາຊົນລາວບັນດາເຜົ່າ ຈົ່ງໄດ້ພ້ອມກັນຕິດຕາມຮັບຟັງ ການດຳເນີນກອງປະຊຸມຄັ້ງນີ້, ພ້ອມທັງໃຫ້ສະແດງຄຳເຫັນ ແລະ ສະເໜີບັນຫາ ຜ່ານໂທລະສັບສາຍດ່ວນ ໝາຍເລກ 071 156 (ໂທແບບບໍ່ເສຍຄ່າ) ເພື່ອເຮັດໃຫ້ກອງປະຊຸມຄັ້ງນີ້ ມີເນື້ອໃນຄົບຖ້ວນ, ສົມບູນ ແລະ ບັນລຸຜົນສຳເລັດຕາມຄາດໝາຍທີ່ວາງໄວ້.
ກອງປະຊຸມຄັ້ງນີ້, ເປັນກອງປະຊຸມທ້າຍສະໄໝສາມັນ ຂອງສະພາປະຊາຊົນແຂວງ ຊຸດທີ IV, ໂດຍຈະດໍາເນີນໄປເປັນເວລາ 2 ວັນ, ຊຶ່ງຈະໄດ້ຮັບຟັງການລາຍງານ ແລະ ການພິຈາລະນາ, ຮັບຮອງ ບັນຫາສຳຄັນພື້ນຖານຂອງແຂວງ ຈຳນວນໜຶ່ງ, ເປັນຕົ້ນ ການສະເໜີຮັບຮອງໂຄງປະກອບກົງຈັກການຈັດຕັ້ງຂອງຄະນະກໍາມະການປົກຄອງແຂວງ; ການສະເໜີແຕ່ງຕັ້ງ ປະທານ-ຮອງປະທານ ຄະນະກໍາມະການປົກຄອງແຂວງ; ທັງຮັບຟັງການລາຍງານ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານ ປະຈໍາປີ 2025 ແລະ ທິດທາງແຜນການ ປະຈຳປີ 2026 ຂອງອົງການປົກຄອງແຂວງ, ລວມທັງວຽກງານສຳຄັນອີກຈຳນວນໜື່ງ ແລະ ຈະໄດ້ຮັບຟັງ ການປະກອບຄໍາເຫັນຂອງສະມາຊິກສະພາປະຊາຊົນແຂວງ ຊຸດທີ IV, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 6 ໃສ່ແຕ່ລະບົດລາຍງານ ແລະ ຈະໄດ້ມີການຂຶ້ນຊີ້ແຈງ ແລະ ອະທິບາຍ ຈາກພະແນກການກ່ຽວຂ້ອງ ໄປຕາມແຕ່ລະກໍລະນີ ຕາມພາລະບົດບາດ, ສິດ ໜ້າທີ່ ແລະ ຄວາມຮັບຜິດຊອບດ້ານການເມືອງ ບົນພື້ນຖານເຫດຜົນ ແລະ ຄວາມເປັນຈິງທີ່ຖືກຕ້ອງ ຕາມກົດໝາຍ.
(ຂ່າວ: ອາພຸດເດດ ບຸບຜາ, ພາບ: ທະນູສີນ ອິດທິພົນ)
ຄໍາເຫັນ