 |
ທ່ານ ທອງສີ ເສົາສຸລິພົມ ກ່າວໄຂກອງປະຊຸມວ່າ: ກອງປະຊຸມຄັ້ງນີ້, ຈະດຳເນີນເປັນເວລາ 2 ວັນ(ວັນທີ 17-18 ກໍລະກົດ 2025) ແລະ ຈະໄດ້ຮັບຟັງການລາຍງານ, ພິຈາລະນາ ແລະ ຮັບຮອງບັນດາເນື້ອໃນທີ່ສໍາຄັນພື້ນຖານຂອງແຂວງ ເປັນຕົ້ນແມ່ນ: ວຽກງານຂອງອົງການປົກຄອງແຂວງ, ບົດລາຍງານກ່ຽວກັບການຄົ້ນຄ້ວາສ້າງຕັ້ງຕາແສງ ຢູ່ 7 ເມືອງ ລວມທັງໝົດມີ 31 ຕາແສງ ແລະ ຈະກໍານົດເອົາ 4 ຕາແສງ ເປັນຈຸດທົດລອງຢູ່ 4 ເມືອງ ຂອງແຂວງຜົ້ງສາລີຄື: ຕາແສງກົກຊາ ເມືອງຜົ້ງສາລີ, ຕາແສງສິນໄຊ ເມືອງຂວາ, ຕາແສງບ້ານຢໍ້ ເມືອງບຸນເໜືອ ແລະ ຕາແສງສໍາພັນໄຊ ເມືອງບຸນໃຕ້. ຜ່ານມະຕິຂອງຄະນະປະຈຳສະພາແຫ່ງຊາດ ວ່າດ້ວຍການຍົກຍ້າຍສະມາຊິກສະພາແຫ່ງຊາດປະຈຳເຂດເລືອກຕັ້ງກບົດລາຍງານ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ໄລຍະ 6 ເດືອນຕົ້ນປີ ແລະ ທິດທາງແຜນວຽກຈຸດສຸມ 6 ເດືອນທ້າຍປີ 2025; ຕິດພັນກັບ 2 ວາລະແຫ່ງຊາດ (ການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນແລະ ການແກ້ໄຂບັນຫາຢາເສບຕິດ).ບົດລາຍງານ ກ່ຽວກັບຜົນການແກ້ໄຂຜົນການກວດສອບ ວ່າດ້ວຍການເຊົ່າ-ສໍາປະທານທີ່ດິນຂອງລັດ.ບົດລາຍງານ ກ່ຽວກັບບັນຫາພົ້ນເດັ່ນ ຂອງການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2025; ບົດລາຍງານ ກ່ຽວກັບຍຸດທະສາດ ແລະ ການຈັດຕັ້ງປະຕິບັດວຽກງານທ່ອງທ່ຽວ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2025; ວຽກງານຂອງສະພາປະຊາຊົນແຂວງ: ບົດລາຍງານ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານແຕ່ກອງປະຊຸມສະໄໝສາມັນເທື່ອທີ 8 ຫາ ເທື່ອທີ 9 ແລະ ແຜນການເຄື່ອນໄຫວວຽກງານຮອດກອງປະຊຸມສະໄໝສາມັນເທື່ອທີ 10 ຂອງສະພາປະຊາຊົນແຂວງ ຊຸດທີ II; ວຽກງານການສ້າງ ແລະ ປັບປຸງນິຕິກໍາໃຕ້ກົດໝາຍ: ພິຈາລະນາຮັບຮອງເອົານິຕິກໍາໃຕ້ກົດໝາຍ, ຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນທາງຫຼວງທ້ອງຖິ່ນ. ນອກນັ້ນ, ຍັງຈະໄດ້ຮັບຟັງການຊີ້ແຈງ ຂອງສະມາຊິກອົງການປົກຄອງແຂວງ ແລະ ຂອງພາກສ່ວນກ່ຽວຂ້ອງ ຈໍານວນໜຶ່ງ ຕໍ່ຄໍາຊັກຖາມຂອງຄະນະປະຈຳສະພາປະຊາຊົນແຂວງ ແລະ ຕໍ່ຄຳເຈາະຈີ້ມຂອງບັນດາສະມາຊິກສະພາປະຊາຊົນແຂວງ.
 |
ໃນໄລຍະດຳເນີນກອງປະຊຸມ, ຄະນະເລຂາທິການສະພາປະຊາຊົນແຂວງ ໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກປະຊາຊົນທີ່ມີຄຳສະເໜີຕໍ່ກັບບໍລິຫານວຽກງານ ຂອງອົງການບໍລິຫານລັດ ໂດຍຜ່ານໂທລະສັບສາຍດ່ວນທີ່ບໍ່ເສຍຄ່າ ໃນໂມງລັດຖະການ ຕາມໝາຍເລກ ໂທລະສັບ 088 156 ຫຼື ແຟັກ 088 210 102.
(ຂ່າວ: ສົມຄິດ)
ຄໍາເຫັນ