ສະຫາຍ ສີວັນ ຫອມໄຊຍະເດດ ໄດ້ໃຫ້ກຽດຕ້ອນຮັບ ແລະ ຕີລາຄາສູງ ຕໍ່ການພົວພັນຮ່ວມມືໃນວຽກງານຕ່າງໆ ໂດຍສະເພາະວຽກງານຂ່າວສານຕ່າງໆ ລະຫວ່າງໜັງສືພິມປະຊາຊົນ ແລະ ສະຖານເອກອັກຄະລັດຖະທູດ ຫວຽດນາມ ປະຈໍາ ລາວ ທີ່ເປັນຂົວຕໍ່ອັນດີງາມຕະຫຼອດໄລຍະຜ່ານມາ. ໜັງສືພິມປະຊາຊົນພ້ອມໃຫ້ການຮ່ວມມືໃນການໂຄສະນາໃນວຽກງານຂ່າວສານຕ່າງໆ, ການພົວພັນຮ່ວມມືຮອບດ້ານ, ຄວາມສາມັກຄີພິເສດລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ແລະ ປະຊາ ຊົນສອງຊາດລາວ-ຫວຽດນາມ, ຫວຽດນາມ-ລາວ ກໍຄືໜັງສືພິມປະຊາຊົນ ແລະ ສະຖານເອກອັກຄະລັດຖະທູດຫວຽດນາມ ປະຈໍາ ລາວ ໃຫ້ນັບມື້ແຕກດອກອອກຜົນຍິ່ງໆຂຶ້ນໄປ.
ສະຖານເອກອັກຄະລັດຖະທູດຫວຽດນາມ ປະຈຳ ລາວ ກໍໄດ້ຕີລາຄາສູງ ການພົວພັນຮ່ວມມືສະໜິດແໜ້ນ ແລະ ມີປະສິດທິຜົນ ລະຫວ່າງອົງການສື່ມວນຊົນຫວຽດນາມ ແລະ ລາວ ໃນໄລຍະຜ່ານມາ. ພ້ອມນັ້ນ, ສະຖານເອກອັກຄະລັດຖະທູດຫວຽດນາມ ປະຈຳ ລາວ ກໍໄດ້ໂຄສະນາບັນດາຂ່າວ-ບົດ ກ່ຽວກັບບັນດາຜົນງານຂອງຫວຽດນາມ ແລະ ການພົວພັນຮ່ວມມືອັນດີງາມ ລະຫວ່າງຫວຽດນາມ - ລາວ. ພິເສດນັບແຕ່ຕົ້ນປີ 2026 ເຖິງປັດຈຸບັນ, ໄດ້ມີການປະສານສົມທົບຢ່າງຕັ້ງໜ້າ ກ່ຽວກັບສະພາບການ, ຜົນສໍາເລັດຂອງກອງປະຊຸມໃຫຍ່ທົ່ວປະເທດຂອງພັກ ຂອງສອງປະເທດ ແລະ ບັນດາຜົນການຢ້ຽມຢາມຂັ້ນສູງ ຂອງການນໍາຂັ້ນສູງສອງພັກ, ສອງລັດ ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ, ການຮ່ວມມືຮອບດ້ານ ແລະ ຫຸ້ນສ່ວນຍຸດທະສາດ ລາວ-ຫວຽດນາມ ນັບມື້ພັດທະນາເຂົ້າສູ່ລວງເລິກ, ແທດຈິງ ແລະ ມີປະສິດທິຜົນໃນທຸກຂົງເຂດວຽກງານ.
ສະຖານເອກອັກຄະລັດຖະທູດຫວຽດນາມ ປະຈຳ ລາວ ເຊື່ອໝັ້ນວ່າ: ໃນໄລຍະຈະມາເຖິງການຮ່ວມມື ລະຫວ່າງບັນດາອົງການສື່ມວນຊົນສອງຊາດຫວຽດນາມ - ລາວ ຈະນັບມື້ໄດ້ຮັບການຍູ້ແຮງ ແລະ ພັດທະນາຂຶ້ນໄປເລື້ອຍໆ. ສະຖານເອກອັກຄະລັດຖະທູດ ຫວຽດນາມ ປະຈຳ ລາວ ຢັ້ງຢືນວ່າ: ຈະປະກອບສ່ວນບົດບາດຢ່າງຕັ້ງໜ້າ ໃນການເປັນຂົວຕໍ່ທີ່ສໍາຄັນເພື່ອເພີ່ມທະວີຍິ່ງກວ່າເກົ່າ ການພົວພັນຮ່ວມມືສອງຝ່າຍດ້ານສື່ມວນຊົນ ປະກອບສ່ວນເຂົ້າໃນການພັດທະນາລວມຂອງສອງຊາດ ຫວຽດນາມ - ລາວ ໃຫ້ນັບມື້ພັດທະນາຢ່າງບໍ່ຢຸດຢັ້ງ.
ໂອກາດນີ້, ຮັກສາການຫົວໜ້າບັນນາທິການໃຫຍ່ໜັງສືພິມປະຊາຊົນ ຍັງໄດ້ສະແດງຄວາມຮູ້ບຸນຄຸນ ແລະ ຂໍຂອບໃຈຕໍ່ສະຖານເອກອັກຄະລັດຖະທູດຫວຽດນາມ ປະຈໍາ ລາວ ທີ່ໄດ້ນໍາເອົາກະຕ່າດອກໄມ້ມາອວຍພອນໜັງສືພິມປະຊາຊົນ ຂໍໃຫ້ສະຫາຍ ຈົ່ງມີສຸຂະພາບພາລະນາໄມແຂງແຮງ ແລະ ຂໍໃຫ້ການພົວພັນຮ່ວມມືອັນດີງາມ ລະຫວ່າງສອງຊາດລາວ-ຫວຽດນາມ, ຫວຽດນາມ-ລາວ ກໍຄືໜັງສືພິມປະຊາຊົນ ແລະ ສະຖານເອກອັກຄະລັດຖະທູດ ຫວຽດນາມ ປະຈໍາ ລາວ ໜັ້ນຄົງຂະນົງແກ່ນເລື້ອຍໆໄປ.
(ຂ່າວ-ພາບ: ວັນເພັງ)
ຄໍາເຫັນ